ພັດທະນາຄວາມສະຫລາດທາງອາລົມເພື່ອຄອບຄົວ

- advert banner 728 90 728x90 - ພັດທະນາຄວາມສະຫລາດທາງອາລົມເພື່ອຄອບຄົວ

ຄອບຄົວໜຶ່ງຈະຢູ່ດ້ວຍກັນໄດ້ຢ່າງມີຄວາມສຸກນັ້ນ ຕ້ອງອາໄສຄວາມເຂົ້າໃຈ, ການຍອມຮັບ ແລະ ການປະນີປະນອມກັນ ຈຶ່ງຈະເຮັດໃຫ້ເກີດຄວາມສຸກຂຶ້ນພາຍໃນເຮືອນໄດ້, ຫາກຕ່າງຄົນຕ່າງເອົາແຕ່ຄວາມຄິດຂອງຕົນເອງເປັນໃຫຍ່, ເອົາແຕ່ເຫດຜົນສ່ວນໂຕມາອ້າງ, ບໍ່ພະຍາຍາມເຂົ້າໃຈກັນ ແລະ ກັນ ຫລື ຍອມຮັບຄວາມບົກພ່ອງຂອງແຕ່ລະຝ່າຍ ເມື່ອມີບັນຫາກໍມັກຈະຖົກຖຽງກັນ ເຮັດໃຫ້ບັນຫາບໍ່ໄກ່ເກ່ຍ ຮ້າຍແຮງຍັງທຳຮ້າຍກັນທັງວາຈາແລະຮ່າງກາຍ.

- lattana 1 - ພັດທະນາຄວາມສະຫລາດທາງອາລົມເພື່ອຄອບຄົວ

ການມີຄອບຄົວທີ່ມີຄວາມສຸກ ຈຶ່ງຕ້ອງອາໄສການຮຽນຮູ້ຄວາມຕ້ອງການ ແລະ ທຳມະຊາດຂອງຝ່າຍກົງຂ້າມ ເພາະຄົນເຮົາເມື່ອເຂົ້າໃຈກັນແລ້ວ ການຍອມຮັບກໍຕາມມາ ເຮັດໃຫ້ເຮົາສາມາດອ່ານອາລົມ ແລະ ເຂົ້າໃຈການຕັດສິນໃຈຂອງຄູ່ເຮົາໄດ້ ເຊິ່ງຫລັກໃນການພັດທະນາຄວາມສະຫລາດທາງອາລົມ ຫລື E.Q ເພື່ອການສ້າງຄອບຄົວໃຫ້ມີຄວາມສຸກມີຄື :

– ໃຫ້ຄວາມເອົາໃຈໃສ່ ແລະ ເຂົ້າໃຈຄວາມວິຕົກກັງວົນຂອງຜູ້ອື່ນໃນຄອບຄົວ.

– ຮັບຮູ້ ແລະ ຕອບສະໜອງຕໍ່ຄວາມຕ້ອງການຂອງສະມາຊິກໃນຄອບຄົວໄດ້.

– ເຂົ້າໃຈສັກກະຍະພາບຂອງຄົນໃນຄອບຄົວ ແລະ ສະໜັບສະໜູນໃຫ້ໃຊ້ຄວາມຮູ້ຄວາມສາມາດນັ້ນໄດ້ຢ່າງຖືກທາງ.

– ຈິງໃຈຕໍ່ກັນ ນີ້ເປັນພື້ນຖານຄວາມຜູກພັນທາງອາລົມທີ່ຈະເຮັດໃຫ້ຢູ່ຮ່ວມກັນໄດ້ດົນທີ່ສຸດ.

ສະໝອງທີ່ສະຫລາດຫລັກແຫລມ ຫລື ມີ I.Q  ສູງຫລາຍໆນັ້ນ ຍິ່ງຈະສ້າງບັນຫາໃຫ້ກັບຄອບຄົວຫລາຍກ່ວາ ເພາະວ່າຍິ່ງສະຫລາດເທົ່າໃດ, ຍິ່ງມີເຫດຜົນຫລາຍເທົ່າໃດ ກໍຍິ່ງບໍ່ຍອມກັນ, ຈະພະຍາຍາມເອົາຊະນະກັນຕະຫລອດ ຈະເຫັນໄດ້ວ່າຄົນເກັ່ງໆໃນສັງຄົມຈຳນວນບໍ່ໜ້ອຍບໍ່ສາມາດໃຊ້ຊີວິດຄູ່ໄດ້ຢ່າງມີຄວາມສຸກ. ການໃຊ້ຊີວິດຄູ່ໃຫ້ມີຄວາມສຸກນັ້ນບໍ່ມີສູດຕາຍໂຕ ເພາະທຸກຄູ່ກໍມີບັນຫາ ແລະ ອຸປະສັກທີ່ແຕກຕ່າງກັນໄປ ການຮັກສາຄວາມສຸກຂອງຄອບຄົວເອົາໄວ້ ຈຶ່ງເປັນເລື່ອງທີ່ຄົນພາຍໃນຄອບຄົວຕ້ອງຮຽນຮູ້ກັນເອງດ້ວຍຫົວໃຈ ແລະ ຄວາມຮັກຈຶ່ງຈະສາມາດປະຄັບປະຄອງຄອບຄົວເອົາໄວ້ໄດ້.