ລັດຖະບານໄດ້ອອກແຈ້ງການກ່ຽວກັບການສະຫລອງໃຫ້ຕິດພັນກັບການສົ່ງເສີມການທ່ອງທ່ຽວ
ຫ້ອງວ່າການລັດຖະບານໄດ້ອອກແຈ້ງການເລກທີ 230/ຫສນຍ ລົງວັນທີ 21 ມີນາ 2018 ກ່ຽວກັບການຈັດຕັ້ງສະເຫລີມສະຫລອງສົ່ງທ້າຍປີເກົ່າ ພສ 2560 ແລະ ຕ້ອນຮັບປີໃໝ່ ພສ 2561, ໂດຍໃຫ້ຖືເອົາໂອກາດສຳຄັນດັ່ງກ່າວເປັນການເສີມຂະຫຍາຍຮີດຄອງປະເພນີອັນດີງາມ ແລະ ມູນເຊື້ອຄວາມສາມັກຄີເປັນປຶກແຜ່ນຂອງຊາດໃຫ້ເປັນປາງບຸນໃຫຍ່ປະຈຳຊາດສ້າງໂອກາດໃຫ້ທົ່ວປວງຊົນທັງຊາດໄດ້ອວຍໄຊໃຫ້ພອນເຊິ່ງກັນ ແລະ ກັນ, ມີບັນຍາກາດເບີກບານມ່ວນຊື່ນ ຖືກຕ້ອງຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດ ບົນຈິດໃຈປະຢັດມັດທະຍັດ. ເນື່ອງຈາກປີໃໝ່ລາວປີນີ້, ກົງກັບວັນທີ 14, 15 ແລະ 16 ເມສາ 2018, ເຊິ່ງວັນທີ 14 ແລະ 15 ເປັນວັນເສົາ ແລະ ວັນອາທິດ (ວັນພັກລັດຖະການ). ສະນັ້ນ ຈຶ່ງເຫັນດີກຳນົດເອົາວັນທີ 17 ແລະ 18 ເມສາ 2018 (ກົງກັບວັນອັງຄານ ແລະ ວັນພຸດ) ເປັນວັນພັກຊົດເຊີຍ.
ແຈ້ງການດັ່ງກ່າວ ໄດ້ລະບຸຕື່ມວ່າ: ມອບໃຫ້ກະຊວງອຸດສາຫະກຳ ແລະ ການຄ້າ, ກະສິກຳ ແລະ ປ່າໄມ້, ນະຄອນຫລວງວຽງຈັນ ແລະ ບັນດາແຂວງໃນທົ່ວປະເທດ ເອົາໃຈໃສ່ຕິດຕາມ ແລະ ຊີ້ນຳຢ່າງໃກ້ຊິດການຜະລິດສະບຽງອາຫານ, ສະໜອງເຄື່ອງອຸປະໂພກ ແລະ ບໍລິໂພກໃຫ້ພຽງພໍກັບຄວາມຕ້ອງການຂອງສັງຄົມ, ພ້ອມທັງຕິດຕາມກວດກາ ແລະ ຄຸ້ມຄອງລາຄາສິນຄ້າໃນທ້ອງຕະຫລາດ ເພື່ອບໍ່ໃຫ້ມີການສວຍໂອກາດຂຶ້ນລາຄາຕາມລໍາພັງໃຈ.ໃຫ້ບັນດາກະຊວງ, ອົງການຈັດຕັ້ງທຽບເທົ່າກະຊວງ ແລະ ທ້ອງຖິ່ນ ເອົາໃຈໃສ່ຊີ້ນຳການຮັກສາຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ, ໂດຍໃຫ້ມີການແບ່ງຄວາມຮັບຜິດຊອບໃນການຕິດຕາມກວດກາ,ເວນຍາມ ແລະ ປະຈຳການ ເພື່ອປ້ອງກັນສຳນັກງານອົງການ ຕະຫລອດໄລຍະບຸນປີໃໝ່ລາວນີ້, ເພື່ອໃຫ້ສາມາດປະສານງານໄດ້ຢ່າງປົກກະຕິ ແລະ ແກ້ໄຂບັນຫາໃຫ້ທັນການໃນກໍລະນີມີເຫດເກີດຂຶ້ນ. ໃຫ້ກະຊວງປ້ອງກັນຄວາມສະຫງົບ ສົມທົບກັບກະຊວງໂຍທາທິການ ແລະ ຂົນສົ່ງ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ້ອງຖິ່ນ ຈັດສັນ ແລະ ອຳນວຍຄວາມສະດວກໃນການສັນຈອນໄປ-ມາໃຫ້ມີຄວາມປອດໄພ ແລະ ໃຫ້ເພີ່ມທະວີການໂຄສະນາ ເພື່ອສ້າງຈິດສຳນຶກໃຫ້ພົນລະເມືອງເຄົາລົບກົດລະບຽບຈະລາຈອນ ແນໃສ່ສະກັດກັ້ນການເກີດອຸປະຕິເຫດຕ່າງໆ. ມອບໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ນະຄອນຫລວງວຽງຈັນ ແລະ ບັນດາແຂວງ ເພີ່ມທະວີການໂຄສະນາ ແລະ ປະຊາສຳພັນໃຫ້ປະຊາຊົນທົ່ວສັງຄົມໄດ້ຮັບຮູ້ ແລະ ເຂົ້າໃຈກ່ຽວກັບການສະເຫລີມສະຫລອງປີໃໝ່ປະຈຳຊາດໃຫ້ຖືກຕ້ອງ ແລະ ສອດຄ່ອງກັບວັດທະນະທຳ ແລະ ຮີດຄອງປະເພນີອັນດີງາມຂອງຊາດຕິດພັນກັບປີທ່ອງທ່ຽວລາວ 2018 ໃຫ້ໄດ້ຮັບຜົນ.
