ປີຜ່ານມາເສດຖະກິດປະເທດເຮົາຂະຫຍາຍ ຕົວ 6,9%.
ບານເປີດກວ້າງຄັ້ງທີ 1 ປີ 2018 ວ່າ: ປີຜ່ານມາ, ລວມຍອດຜະລິດຕະພັນ ພາຍໃນ GDP ຂອງປະເທດຂະຫຍາຍຕົວໃນລະດັບ 6,9% (ແຜນການສະພາແຫ່ງຊາດຮັບຮອງແມ່ນ 7%) ມີມູນຄ່າທັງໝົດ 140.749 ຕື້ກີບ, ສະເລ່ຍລາຍຮັບ 2.468 ໂດລາສະຫະລັດຕໍ່ຄົນຕໍ່ປີ. ໃນນັ້ນຂະແໜງກະສິກຳເພີ່ມຂຶ້ນ 2,9%, ອຸດສາຫະກຳເພີ່ມຂຶ້ນ 11,6%, ບໍລິການເພີ່ມຂຶ້ນ 4,5%, ພາສີ-ອາກອນ ແລະ ການນຳເຂົ້າເພີ່ມຂຶ້ນ 7,0% ຂອງ GDP. ການຂະຫຍາຍຕົວດັ່ງກ່າວ, ມາຈາກການເພີ່ມຂຶ້ນຂອງຂະແໜງພະລັງງານທີ່ເຕີບໂຕລະດັບ 32,4%, ໃນນັ້ນໄດ້ຈາກເຂື່ອນຂະໜາດໃຫຍ່ 2 ແຫ່ງຄື: ເຂື່ອນນ້ຳເທີນ 2 ແລະ ໂຮງໄຟຟ້າຖ່ານຫີນຫົງສາລິກໄນ ທີ່ສາມາດຜະລິດລື່ນແຜນການ 12% ແລະ 3,8% ຕາມລຳດັບ. ນອກນີ້ຍັງມີອີກ 12 ເຂື່ອນຂະໜາດນ້ອຍທີ່ໄດ້ເລີ່ມການຜະລິດໃນປີ 2017 ແລະ ຂະແໜງກໍ່ສ້າງເຫັນວ່າຂະຫຍາຍຕົວໃນລະດັບສູງ 18% ໂດຍໂຄງການສໍາຄັນແມ່ນການກໍ່ສ້າງເສັ້ນທາງລົດໄຟລາວ-ຈີນ ທີ່ກຳລັງດຳເນີນການກໍ່ສ້າງຢູ່ຫລາຍຈຸດ. ສ່ວນຂະແໜງບໍ່ແຮ່ເຫັນວ່າຕິດລົບ -0,4% ໃນປີຜ່ານມາ ແລະ ຂະແໜງບໍລິການກໍເຊັ່ນດຽວກັນເຫັນວ່າບໍ່ໄດ້ຕາມແຜນສອງປີຊ້ອນຄືຕິດຄ່າລົບ (-1,2) ໃນປີ 2016 ແລະ (-4,8%) ໃນປີ 2017, ຍ້ອນຕົວເລກນັກທ່ອງທ່ຽວເຂົ້າມາຫລຸດລົງ. ສໍາລັບຂະແໜງກະສິກຳກໍເຫັນວ່າບໍ່ບັນລຸແຜນ, ເຊິ່ງໄດ້ພຽງ 2,9% (ແຜນຮັບຮອງ 3,1%) ຍ້ອນການຜະລິດເຂົ້າໄດ້ພຽງ 95% ຂອງແຜນການ. ສ່ວນຂະແໜງປ່າໄມ້ກໍຫລຸດລົງເຊັ່ນກັນ, ເນື່ອງຈາກລາວເຮົາເລັ່ງຈໍາກັດການຕັດໄມ້ໄດ້ມີປະສິດທິຜົນດີຂຶ້ນ, ໂດຍສະເພາະການປະຕິບັດຄໍາສັ່ງເລກທີ 15/ນຍ ໄດ້ມີຜົນສໍາເລັດສູງ.
