ສະເປີ-ເຊລຊີ ຕ້ອງຈ່າຍ 25 ລ້ານປອນ ຖ້າຫວັງດຶງ ແມດດິສັນ
ເຊລຊີ ກັບ ທ໊ອດແນມ ຮ໊ອດສະເປີ ອາດຕ້ອງຈ່າຍເງິນເຖິງ 25 ລ້ານປອນ ຖ້າຫວັງດຶງ ເຈມ ແມດດິສັນ ກອງກາງອະນາຄົດໄກ ນໍຣິ ຊິຕີ້ ເຫດນັກເຕະໂຊຟອມສຸດເກັ່ງ ແລະ ຖືກຍົກໃຫ້ເປັນໜຶ່ງໃນນັກເຕະອະນາຄົດໄກທີ່ສຸດຂອງວົງການບານເຕະອັງກິດ.
ເດິ ມິເຣີ ສື່ຊື່ດັງຂອງອັງກິດ ລາຍງານຂ່າວວ່າ: ທ໊ອດແນມ ຮ໊ອດສະເປີ ແລະ ເຊລຊີ 2 ທີມດັງແຫ່ງພຣີເມຍລີກ ອັງກິດ ອາດຕ້ອງຈ່າຍເງິນເຖິງ 25 ລ້ານປອນ ຖ້າຫວັງຄວ້າ ເຈມ ແມດດິສັນ ມິດຟິລດາວຮຸ່ງ ນໍຣິ ຊິຕີ້ ສະໂມສອນຈາກເດິແຊມປ້ຽນຊິບ ໃນຊ່ວງໜ້າຮ້ອນນີ້.
ສະເປີ ກັບ ເຊລຊີ ຕ່າງສະແດງຄວາມສົນໃຈຄວ້າກອງກາງອາຍຸ 21 ປີ ເນື່ອງຈາກ ນໍຣິ ຊິຕີ້ ພ້ອມຂາຍນັກເຕະໃນຊ່ວງຕະຫລາດຊື້-ຂາຍນັກເຕະໜ້າຮ້ອນນີ້. ຂະນະທີ່ ເອຟເວີຕັນ ແລະ ແມນເຊັສເຕີ ຊິຕີ້ ກໍຕ້ອງການຄວ້າຕົວເຊັ່ນກັນ. ເຖິງຢ່າງໃດກໍຕາມ, ທຸກທີມທີ່ຢາກໄດ້ນັກເຕະອາດຕ້ອງຈ່າຍເງິນເຖິງ 25 ລ້ານປອນ ເນື່ອງຈາກ ແມດດິສັນ ຖືກຍົກໃຫ້ເປັນໜຶ່ງໃນນັກເຕະນອກພຣີເມຍລີກ ທີ່ມີອະນາຄົດສົດໃສຫລາຍທີ່ສຸດ.
ເດິ ມິເຣີ ອ້າງອີກວ່າ: ນໍຣິ ມີຄວາມຕັ້ງໃຈຈະໄດ້ເງິນກ້ອນໃຫຍ່ຈາກການຂາຍ ແມດດິສັນ ທີ່ຍິງໄປ 14 ປະຕູ ກັບອີກ 10 ແອສຊິສ ໃນລະດູການນີ້ ແລະ ເຊື່ອວ່ານັ້ນເປັນລາຄາທີ່ຍຸຕິທຳແລ້ວເມື່ອທຽບໃສ່ຄ່າຕົວນັກເຕະທີ່ຊື້-ຂາຍກັນໃນໄລຍະຜ່ານມາ.
