GDP ຫວຽດນາມໄຕມາດທຳອິດປີນີ້ ເຕີບໃຫຍ່ຫລາຍທີ່ສຸດໃນຮອບ 10 ປີ
ເສດຖະກິດຫວຽດນາມຂະຫຍາຍຕົວເກືອບ 7,4% ໃນໄຕມາດທຳອິດຂອງປີນີ້ ຖືເປັນສະຖິຕິດີທີ່ສຸດນັບແຕ່ໄລຍະເວລາດຽວກັນຂອງປີ 2008 ດ້ວຍຜົນຈາກມາດຕະການປະຕິຮູບຂອງພາກລັດ.
ສຳນັກຂ່າວຕ່າງປະເທດລາຍງານຈາກນະຄອນຫລວງຮ່າໂນ້ຍ ສສ ຫວຽດນາມ ໃນວັນທີ 29 ມີນາວ່າ: ສຳນັກງານສະຖິຕິແຫ່ງຊາດຂອງຫວຽດນາມ ລາຍງານອັດຕາການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ໃນໄຕມາດທຳອິດຂອງປີນີ້ ວ່າບັນລຸ 7,38% ເຊິ່ງເປັນຜົນຈາກຜົນຜະລິດດ້ານກະສິກຳ ແລະ ອຸດສາຫະກຳທີ່ເພີ່ມຂຶ້ນຢ່າງຕໍ່ເນື່ອງ ດ້ວຍນະໂຍບາຍປະຕິຮູບເສດຖະກິດຂະໜາດໃຫຍ່ຂອງລັດຖະບານ ແລະ ຖືເປັນສະຖິຕິດີທີ່ສຸດນັບແຕ່ໄຕມາດທຳອິດຂອງປີ 2008 ທີ່ GDP ໃນເວລານັ້ນຂະຫຍາຍຕົວໃນລະດັບ 7,4%.
ຂະນະທີ່ GDP ຂອງຫວຽດນາມໃນປີ 2017 ເຕີບໃຫຍ່ໃນລະດັບ 6,81% ຖືເປັນສະຖິຕິດີທີ່ສຸດນັບແຕ່ປີ 2010 ແລະ ທະນາຄານໂລກ (WB) ຄາດຄະເນເສດຖະກິດຂອງຫວຽດນາມຈະເຕີບໃຫຍ່ໃນລະດັບ 6,5% ໃນປີນີ້.
Vietnam’s economy continued to post stellar growth in the first quarter, fueled by an export boom https://t.co/8zoTNGL7aL pic.twitter.com/dx6i1Hx7Ob
— Bloomberg (@business) March 29, 2018
ທັງນີ້, ຜົນຜະລິດອຸດສາຫະກຳຂອງຫວຽດນາມເຕີບໃຫຍ່ສູງເຖິງ 13,56% ໃນໄຕມາດທຳອິດຂອງປີນີ້ ເຊິ່ງເປັນຜົນຈາກການທີ່ບໍລິສັດຂ້າມຊາດຫລາຍແຫ່ງອາໄສຫວຽດນາມເປັນຖານໃນການຜະລິດສິນຄ້າຫລາຍຂຶ້ນເຊັ່ນ: ບໍລິສັດຊຳຊຸງ ເອເລັກໂຕຣນິກ ຂອງ ສ.ເກົາຫລີ ເຊິ່ງຊ່ວຍໃຫ້ມູນຄ່າການສົ່ງອອກສິນຄ້າເອເລັກໂຕຣນິກຂອງຫວຽດນາມໃນໄຕມາດທຳອິດຂອງປີນີ້ສູງເຖິງ 12.300 ລ້ານໂດລາສະຫະລັດ ເພີ່ມຂຶ້ນແບບກ້າວກະໂດດເຖິງ 58,8% ຈາກໄລຍະເວລາດຽວກັນຂອງປີຜ່ານມາ, ສ່ວນຜົນຜະລິດກະສິກຳ ແລະ ປະມົງໃນໄລຍະ 3 ເດືອນທຳອິດຂອງປີນີ້ ເພີ່ມຂຶ້ນ 4,05% ເມື່ອທຽບໃສ່ສະຖິຕິຂອງປີ 2017 ຖືເປັນເທື່ອທຳອິດໃນຮອບ 13 ປີ ທີ່ຜົນຜະລິດກະສິກຳ ແລະ ປະມົງຂະຫຍາຍຕົວເກີນ 4,0%.
