ທ່ານ ທຣຳ ຢືນຢັນຈະຖອນ ທະຫານອອກຈາກຊີຣີ
ກະຊວງປ້ອງກັນປະເທດ ແລະ ກະຊວງການຕ່າງປະເທດອາເມລິກາ ປະຕິເສດສະແດງຄວາມຄິດເຫັນ, ຫລັງປະທານາທິບໍດີ ໂດນັນ ທຣຳ ກ່າວວ່າອາເມລິກາຈະຖອນທະຫານອອກຈາກຊີຣີ “ໃນໄວໆນີ້”.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 30 ມີນາວ່າ: ປະທານາທິບໍດີ ໂດນັນ ທຣຳ ກ່າວວັກໜຶ່ງໃນການລົງພື້ນທີ່ປາໄສໃນລັດໂອໄຮໂອ ວັນທີ 29 ມີນາວ່າ: ອາເມລິກາຈະຖອນທະຫານອອກຈາກຊີຣີ ”ໃນໄວໆນີ້” ເພາະປະຕິບັດການມີຄວາມຄືບໜ້າຫລາຍໃນການຮັດແຄບພື້ນທີ່ກັບຄືນຈາກກຸ່ມ IS ແລະ ກ່າວອີກວ່າ: ຕະຫລອດໄລຍະເວລາຜ່ານມາ, ງົບປະມານທາງທະຫານຂອງລັດຖະບານວໍຊິງຕັນໃນຕາເວັນອອກກາງ “ສູນເສຍ” ໄປຫລາຍກວ່າ 7 ຕື້ໂດລາສະຫະລັດ.
ເຖິງຢ່າງໃດກໍຕາມ, ກະຊວງປ້ອງກັນປະເທດ ແລະ ກະຊວງການຕ່າງປະເທດ ປະຕິເສດສະແດງຄວາມຄິດເຫັນຕໍ່ຄຳກ່າວຂອງທ່ານ ທຣຳ ໂດຍທ່ານນາງ ດານາ ໄວ ໂຄສົກຂອງເພນຕາກອນ ກ່າວວ່າ: ພາລະກິດຂອງອາເມລິກາບໍ່ພຽງແຕ່ການກວາດລ້າງກອງກຳລັງຂອງກຸ່ມ IS, ແຕ່ລວມທັງການລຶບລ້າງແນວຄິດຮຸນແຮງທີ່ກ່ຽວຂ້ອງໃຫ້ໝົດໄປ. ຂະນະທີ່ ພົນເອກ ເຈມ ແມຕທິສ ລັດຖະມົນຕີກະຊວງປ້ອງກັນປະເທດອາເມລິກາ ເຄີຍກ່າວໃນທ້າຍປີຜ່ານມາວ່າ: ເພນຕາກອນຍັງບໍ່ມີນະໂຍບາຍກຽມຖອນທະຫານອອກຈາກຊີຣີ ໂດຍປັດຈຸບັນອາເມລິກາມີຈຳນວນທະຫານປະຈຳການຢູ່ຊີຣີ “ຢ່າງເປີດເຜີຍ” ຫລາຍກວ່າ 2.000 ຄົນ ສ່ວນຫລາຍປັກຫລັກຢູ່ພາກເໜືອ ແລະ ພາກຕາເວັນອອກ, ສ່ວນທະຫານຂອງຣັດເຊຍສ່ວນຫລາຍປະຈຳການຢູ່ພາກຕາເວັນຕົກຂອງຊີຣີ.
