ກອງປະຊຸມສຸດຍອດທຸລະກິດອະນຸພາກພື້ນແມ່ນໍ້າຂອງຄັ້ງທຳອິດໄດ້ຈັດຂຶ້ນທີ່ນະຄອນຫຼວງຮ່າໂນ້ຍ
ກອງປະຊຸມສຸດຍອດທຸລະກິດອະນຸພາກພື້ນແມ່ນ້ຳຂອງຄັ້ງທຳອິດ ໄດ້ຈັດຂຶ້ນໃນຕອນຄໍ່າວັນທີ 30 ມີນາຜ່ານມານີ້ ທີ່ນະຄອນຫລວງຮ່າໂນ້ຍ ສສ ຫວຽດນາມ ພາຍໃຕ້ການເປັນປະທານຂອງທ່ານ ຫງວຽນ ຊວນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ເຊິ່ງມີຜູ້ນໍາບັນດາປະເທດສະມາຊິກອະນຸພາກພື້ນແມ່ນໍ້າຂອງ, ເລຂາທິການໃຫຍ່ອາຊຽນ, ທະນາຄານພັດທະນາອາຊີ, ທະນາຄານໂລກ ຕະຫຼອດຮອດນັກທຸລະກິດທີ່ເປັນຕົວແທນຈາກບັນດາປະເທດອະນຸພາກພື້ນດັ່ງກ່າວເຂົ້າຮ່ວມ 1.000 ກວ່າຄົນ.
ໃນວາລະດໍາເນີນກອງປະຊຸມ, ບັນດາຜູ້ນຳປະເທດສະມາຊິກກໍໄດ້ຮ່ວມປຶກສາຫາລືກ່ຽວກັບຕົວຂັບເຄື່ອນໃໝ່ສຳລັບການພັດທະນາໃນພາກພື້ນແມ່ນໍ້າຂອງ ໃນອະນາຄົດ, ການຈັດໃຫ້ມີກອງປະຊຸມສຸດຍອດທຸລະກິດອະນຸພາກພື້ນແມ່ນໍ້າຂອງຄັ້ງນີ້ເປັນການເປີດກວ້າງການຮ່ວມມື ແລະ ສົ່ງເສີມທຸລະກິດຂອງບັນດາປະເທດອະນຸພາກພື້ນແມ່ນໍ້າຂອງ. ກອງປະຊຸມຍັງໄດ້ຍົກລະດັບກົນໄກການຮ່ວມມືຂອງພາກສ່ວນທຸລະກິດ GMS ຈາກກົນໄກກອງປະຊຸມທຸລະກິດອະນຸພາກພື້ນທີ່ຈັດຂຶ້ໃນນຫຼາຍປີໃຫ້ມາເປັນລະດັບກອງປະຊຸມສຸດຍອດທີ່ມີຜູ້ນໍາສູງສຸດຂອງສະມາຊິກ GMS ເຂົ້າຮ່ວມ ເຊິ່ງເປັນການສະແດງໃຫ້ເຫັນເຖິງຄວາມສໍາຄັນທີ່ຜູ້ນໍາ GMS ໄດ້ມີບົດບາດ ແລະ ການປະກອບສ່ວນຂອງພາກສ່ວນທຸລະກິດໃນຂອບການຮ່ວມມືຂອງ GMS. ກອງປະຊຸດສຸດຍອດທຸລະກິດ GMS ຄັ້ງນີ້ ຍັງຈະເປີດໂອກາດໃຫ້ພາກທຸລະກິດຂອງປະເທດອະນຸພາກພື້ນແມ່ນໍ້າຂອງໄດ້ປຶກສາຫາລືກັນກ່ຽວກັບຊ່ອງທາງໃນການດໍາເນີນທຸລະກິດ, ແລກປ່ຽນບົດຮຽນນໍາກັນແລ້ວສ້າງເຄືອຂ່າຍແລະ ຈັບຄູ່ທຸລະກິດຮ່ວມກັນ. ພ້ອມດຽວກັນນັ້ນ ກໍຍັງເປັນໂອກາດອັນດີທີ່ພາກທຸລະກິດຈະໄດ້ສົນທະນາກັບການນໍາຂອງປະເທດສະມາຊິກ GMS, ປະທານທະນາຄານພັດທະນາອາຊີ, ອໍານວຍການທະນາຄານໂລກ ແລະ ເລຂາທິການໃຫຍ່ອາຊຽນ ກ່ຽວກັບການພົວພັນຮ່ວມມື ແລະ ປະສານງານກັນລະຫວ່າງພາກລັດ ແລະ ເອກະຊົນ ກໍຄືຄວາມພະຍາຍາມຂອງລັດຖະບານໃນການສົ່ງເສີມ ແລະ ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຄ້າ, ການລົງທຶນ, ການທ່ອງທ່ອງທ່ຽວ ແລະ ການດໍາເນີນທຸລະກິດໃນຂະແໜງການຕ່າງໆ ລວມທັງທຸລະກິດຂະໜາດນ້ອຍ ແລະ ຂະໜາດກາງ ຫຼື SME. ການເຂົ້າເຖິງແຫຼ່ງທຶນ ແລະ ເຕັກໂນໂລຊີທີ່ທັນສະໄໝ ເຊິ່ງໃນກອງປະຊູມດັ່ງກ່າວ, ທ່ານ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ສະເໜີແນວທາງການຈັດຕັ້ງປະຕິບັດວຽກງານໃນຕໍ່ໜ້າກ່ຽວກັບການພັດທະນາເສດຖະກິດ-ສັງຄົມຂອງ ສປປ ລາວ ໂດຍສະເພາະການສ້າງສະພາບແວດລ້ອມທີ່ເອື້ອອຳນວຍໃຫ້ບັນດານັກລົງທຶນພາຍໃນ ແລະ ພາຍນອກ ອະນຸພາກພື້ນເຂົ້າໄປລົງທຶນໃນ ສປປ ລາວ ເນື່ອງຈາກວ່າ ອະນຸພາກພື້ນແມ່ນໍ້າຂອງແມ່ນພາກພື້ນໜຶ່ງທີ່ມີທ່າແຮງອັນໃຫຍ່ຫຼວງສໍາລັບການຮ່ວມມື. ສະນັ້ນ ຈຶ່ງສະເໜີໃຫ້ພາກທຸລະກິດຂອງປະເທດສະມາຊິກ ແລະ ຄູ່ຮ່ວມມືເອົາໃຈໃສ່ຄົ້ນຄວ້າ, ສຶກສາຊອກຫາຊ່ອງທາງໃນການດໍາເນີນທຸລະກິດໃນຂະແໜງການທີ່ເຫັນວ່າຕົນມີຄວາມສາມາດ ແລະ ຊໍານິຊຳນານງານ ລວມທັງຊອກຫາຕະຫລາດໃໝ່ອີກດ້ວຍ.
