ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ

- Hanoi - ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ
- Untitled design - ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ

 

ກອງປະຊຸມສຸດຍອດອະນຸພາກພື້ນແມ່ນໍ້າຂອງ ຄັ້ງທີ 6 ພາຍໃຕ້ຫົວຂໍ້ “ກຳລັງແຮງຂອງການຮ່ວມມື 25 ປີ ແລະ ການສ້າງອະນຸພາກພື້ນແມ່ນໍ້າຂອງໃຫ້ມີຄວາມຍືນຍົງ, ເຊື່ອມໂຍງ ແລະ ຈະເລີນຮຸ່ງເຮື່ອງ” ​ໄດ້​ເປີດ​ຂຶ້ນ​ໃນ​ວັນ​ທີ 31 ມີນາ​ນີ້ ທີ່ ສສ ຫວຽດນາມ, ໂດຍພາຍ​ໃຕ້ການເປັນປະທານຂອງທ່ານ ຫງວຽນ ຊວນ ຟຸກ ນາຍົກລັດຖະມົນຕີແຫ່ງ ສສ ຫວຽດນາມ ເຊິ່ງມີຜູ້ນໍາປະເທດສະມາຊິກຄື: ສປປ ລາວ, ຣາຊະອານາຈັກກໍາປູເຈຍ, ຣາຊະອານາຈັກໄທ, ສາທາລະນະລັດສະຫະພາບມຽນມາ, ສປ ຈີນ, ທະນາຄານພັດທະນາອາຊີ, ທະນາຄານໂລກ ແລະ ຜູ້ແທນຈາກພາກສ່ວນກ່ຽວຂ້ອງຕ່າງໆເຂົ້າຮ່ວມ 1.500 ຄົນ. ກອງປະຊຸມດັ່ງກ່າວໄດ້ຮັບຟັງການລາຍງານກ່ຽວກັບຜົນສຳເລັດໃນການຈັດຕັ້ງປະຕິບັດວຽກງານການຮ່ວມມືໃນອະນຸພາກພື້ນແມ່ນໍ້າຂອງ ໄລຍະ 25 ປີຜ່ານ​ມາ ອັນເກີດມາຈາກຄວາມພະຍາຍາມ ແລະ ການປະກອບສ່ວນຢ່າງຕັ້ງໜ້າຂອງບັນດາປະເທດສະມາຊິກນຳກັນ. ນອກນັ້ນ ຍັງໄດ້ຮັບຟັງກ່ຽວກັບບັນດາສິ່ງກີດຂວາງຕ່າງໆ ທີ່ທ່ວງດຶຶງການພັດທະນາໃນຂົງເຂດດັ່ງກ່າວ ແລະ ການຮ່ວມມືກັນ ເພື່ອພັດທະນາຂອບອະນຸພາກພື້ນແມ່ນໍ້າຂອງໃຫ້ນັບມື້ດີຂຶ້ນ. ໃນກອງປະຊຸມ, ທ່ານ ນາຍົກລັດຖະມົນຕີ ແຫ່ງ ສປປ ລາວ ທອງ​ລຸນ ສີ​ສຸ​ລິດ ໄດ້ກ່າວປາ​ໄສ ເຊິ່ງທ່ານໄດ້​ເວົ້າເຖິງການປະຕິບັດບັນດາເປົ້າໝາຍຍຸດທະສາດຂອງການຮ່ວມມືເຂດອະນຸພາກພື້ນ ເຊິ່ງ ສປປ ລາວ ໄດ້ຖືເອົາການພັດທະນາພື້ນຖານໂຄງລ່າງເປັນບູລິມະສິດໜຶ່ງຂອງລັດຖະບານ ເພື່ອຮັບໃຊ້ຍຸດທະສາດການຫັນ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລໃຫ້ເປັນປະເທດເຊື່ອມຕໍ່. ພ້ອມນີ້ ທ່ານກໍໄດ້ເຊີນຊວນຜູ້ເຂົ້າຮ່ວມກອງປະຊຸມ​ໄດ້ໄປຢ້ຽມຢາມ ສປປ ລາວ ເນື່ອງໃນໂອກາດປີທ່ອງທ່ຽວ 2018 ອີກດ້ວຍ. ໃນກອງປະຊຸມສູດຍອດໃນຄັ້ງນີ້ ໄດ້ຮັບຮອງເອົາຖະແຫຼງການຮ່ວມ (The Sixth GMS Summit Joint Declaration), ແຜນດຳເນີນງານຮ່າໂນ້ຍ ໃນປີ 2018-2022 (The Ha Noi Action Plan 2018-2022) ແລະ ບັນຊີໂຄງການລົງທຶນໃນຂອບການລົງທຶນພາກພື້ນແມ່ນໍ້າຂອງ 2022 (The Regional Investment Framework 2022) ເພື່ອເປັນທິດທາງໃນການຮ່ວມມືກັນໃນຕໍ່ໜ້າ. ພ້ອມດຽວກັນນັ້ນ, ກໍໄດ້ຢ້ຽມຊົມງານວາງສະແດງ ຮູບພາບ ທີ່ສະທ້ອນໃຫ້ເຫັນຜົນສໍາເລັດຂອງການຮ່ວມມືອະນຸພາກພື້ນແມ່ນໍ້າຂອງ ໃນໄລຍະ 25 ປີທີ່ຜ່ານມາ.

ໃນຕອນບ່າຍຂອງວັນທີ 31, ພະນະທ່ານ ນາຍົກລັດຖະມົນຕີ ໄດ້ເຂົ້າຮ່ວມກອງປະຊຸມສຸດຍອດເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້ງທີ 10 ເຊິ່ງກອງປະຊຸມໄດ້ຕີລາຄາຄືນຜົນການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດ ກໍາປູເຈຍ-ລາວ-ຫວຽດນາມ ຄັ້ງທີ 9 ໃນປີ 2016 ຜ່ານມາ ທີ່ສຽມລຽບ ແລະ ໄດ້ປຶກສາຫາລືກ່ຽວກັບທິດທາງການຮ່ວມມືພັດທະນາໃນຂົງເຂດດັ່ງກ່າວໃນຕໍ່ໜ້າ, ​ໄດ້​ຮ່ວມ​ກັນລົງນາມ ແລະ ຮັບຮອງຖະແຫຼງການຮ່ວມ ກອງປະຊຸມສຸດຍອດເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້ງທີ 10 (Joint Declaration of the 10th Cambodia-Laos PDR-Viet Nam Summit on Development Triangle Area) ແລະ ຮັບຮອງເອົາແຜນປະຕິບັດງານ ວ່າດ້ວຍການເຊື່ອມຈອດເສດຖະກິດ ກຳປູເຈຍ-ລາວ-ຫວຽດນາມ ຮອດປີ 2030 (The Action Plan for Cambodia-Laos-Viet Nam Economic Connectivity up to 2030) ເພື່ອສົ່ງເສີມການເຊື່ອມຈອດຮອບດ້ານລະຫວ່າງສາມປະເທດໃນຕໍ່ໜ້າ.

- Wave100S AD to Website 2020 0 - ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ

ໃນໂອກາດເຂົ້າຮ່ວມກອງປະຊຸມຄັ້ງນີ້, ພະນະທ່ານ ນາຍົກລັດຖະມົນຕີ ແຫ່ງ ສປປ ໄດ້ພົບປະສອງຝ່າຍກັບທ່ານ ຫວັງ ອີ້ ທີ່ປຶກສາແຫ່ງລັດ ແລະ ລັດຖະມົນຕີການຕ່າງປະເທດ ສປ ຈີນ ເພື່ອປຶກສາຫາລືແຜນການຮ່ວມມືກັນໃນຕໍ່ໜ້າອີກ​ດ້ວຍ.

 

- WhatsApp Image 2020 05 27 at 5 - ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ
- WhatsApp Image 2020 05 27 at 5 - ກອງປະຊຸມ​ສຸດ​ຍອດ​ອະນຸ​ພາກພື້ນ​ແມ່ນ້ຳຂອງຄັ້ງທີ 6 ຈັດ​ຂຶ້ນທີ່ ສສ ຫວຽດນາມ
error: Alert: ເນື້ອຫາຂ່າວມີລິຂະສິດ !!