ເວົ້າ​ໄດ້​ຫລາຍພາ​ສາ ພາໃຫ້​ຈະ​ເລີນ​ແທ້ບໍ່ ?

- QuizThumbsUp - ເວົ້າ​ໄດ້​ຫລາຍພາ​ສາ ພາໃຫ້​ຈະ​ເລີນ​ແທ້ບໍ່ ?
- AGL banner - ເວົ້າ​ໄດ້​ຫລາຍພາ​ສາ ພາໃຫ້​ຈະ​ເລີນ​ແທ້ບໍ່ ?

ໂດຍ : ມຶກບໍ່ແຫ້ງ

ເມື່ອບໍ່​ດົນ​ມານີ້​ນັກ​ວິ​ທະ​ຍາ​ສາດ​ຄົ້ນ​ພົບ​ວ່າ ປະ​ເທດ​ໃດ​ທີ່​ມີ​ຄົນ​ເວົ້າ​ຫຼາຍ​ພາ​ສານັ້ນ ຈະ​ພາ​ໃຫ້​ເສດ​ຖະ​ກິດ​ເຂັ້ມ​ແຂງ ແລະ​ຂະ​ຫຍາຍ​ຕົວ​ດີ, ເຮົາ​ມາ​ເບິ່ງວ່າ​ເປັນ​ຫຍັງ​ເພິ່ນ​ຈຶ່ງ​ເວົ້າ​ແນວນັ້ນ​?

ທ່ານ ກາບ​ຣິວ ໂຮ​ແກນ​ບ​ຣັນ (Gabrielle Hoganbrun) ນັກ​ຄົ້ນ​ຄວ້າ​ທາງ​ດ້ານ​ພາ​ສາ ຂອງ​ມະ​ຫາ​ວິ​ທະ​ຍາ​ໄລ ບ​ຣິ​ສ​ໂຕນ (University of Bristol) ປະ​ເທດ ອັງ​ກິດ ເວົ້າ​ວ່າ “ພາ​ສາ​ແມ່ນ​ມີ​ຄວາມ​ສຳ​ຄັນ​ຕໍ່​ລະ​ບົບ​ເສດ​ຖະ​ກິດ​ມະ​ຫາ​ພາກ ແລະ​ກໍ​ຍັງ​ສຳ​ຄັນ​ຕໍ່ການ​ດຳ​ເນີນ​ທຸ​ລະ​ກິດ​ຂະ​ນ້ອຍ​ນຳ​ອີກ”.

​ຍົກ​ຕົວ​ຢ່າງ ປະ​ເທດ​ສະ​ວິດ​ເຊີ​ແລນ ທີ່​ມີ​ພາ​ສາ​ທາງ​ການ 4 ພາ​ສາ​ຄື ເຢຍ​ລະ​ມັນ, ຝ​ຣັ່ງ, ອີ​ຕາ​ລີ ແລະ ໂຣ​ມັນ​ສ໌ (Romansh) ເຊິ່ງ​ນັກ​ຄົ້​ນ​ຄວ້າ​ພົບ​ວ່າ 10% ຂອງ​ລາຍ​ໄດ້​ລວມ​ຂອງ​ປະ​ເທດນັ້ນ ແມ່ນ​ເນື່ອງ​ມາ​ຈາກ​ປັດ​ໄຈ ທາງ​ດ້ານ​ພາ​ສາ. ກົງ​ກັ​ນ​ຂ້າມ, ປະ​ເທດ​ອັງ​ກິດ ທີ່​ຄົນ​ສ່ວນ​ໃຫຍ່​ຂອງ​ປ​ະ​ເທດ​ເວົ້າ​ໄດ້​ແຕ່​ພາ​ສາ​ດຽວ ຄື​ພາ​ສາ​ອັງ​ກິດນັ້ນ ພົບ​ວ່າ ລາຍ​ຮັບ​ລວມ​ຂອງ​ປະ​ເທດຫຼຸດ​ລົງ​ປີ​ລະ 3.5% ເນື່ອງ​ຈາກວ່າ ປະ​ຊາ​ຊົນ​ຂອງ​ປະ​ເທດ​ຖືກ ຮຽກ​ວ່າ “ຂາດ​ທັກ​ສະ ທາງ​ດ້ານ​ພາ​ສາ”.

ສິ່ງ​ດັ່ງ​ກ່າວ ກໍ​ເນື່ອງ​ຈາກວ່າ ການ​ເວົ້າ​ໄດ້ຫຼາຍ​ພາ​ສາ ພາ​ໃຫ້​ການ​ພົວ​ພັນ ຄ້າ​ຂາຍ​ໄດ້​ສະ​ດວກ​ສະ​ບາຍຂຶ້ນ, ຕົວ​ຢ່າງ​ການ​ສຶກ​ສາ​ກ່ຽວ​ກັບ ກ​ານ​ດຳ​ເນີນ​ທຸ​ລະ​ກິດ ຂະ​ນ້ອຍ ແລະ​ກາງ ໃນ​ປະ​ເທດ ຊູ​ແອັດ, ເຢຍ​ລະ​ມັນ, ເດັນ​ມາກ ແລະ ຝ​ຣັ່ງ ພົບ​ວ່າ “ປະ​ເທດ​ໃດ​ທີ່​ລົງ​ທຶນ​ໃສ່​ການ​ພັດ​ທະ​ນາ​ທັກ​ສະ​ທາງ​ດ້ານ​ພາ​ສາ​ແກ່​ປະ​ຊາກ​ອນຫຼາຍ ​ກໍ​ສາ​ມາດ​ສົ່ງ​ສິນ​ຄ້າ​ອອກ​​ຂາຍ​ໄດ້ຫຼາຍກວ່າ​ໝູ່”.

- Wave100S AD to Website 2020 0 - ເວົ້າ​ໄດ້​ຫລາຍພາ​ສາ ພາໃຫ້​ຈະ​ເລີນ​ແທ້ບໍ່ ?

ມັນ​​ກໍ​ເປັນ​ສິ່ງບໍ່​ແປກ​ເລີຍ​ວ່າ ໃນ​ສະ​ໄໝ ທ່ານ ລີ​ກວນ​ຢູ ລິ​ເລີ່ມ​ການ​ພັກ​ດັນ​ໃຫ້​ປະ​ຊາ​ກອນ​ພາຍ​ໃນ​ປະ​ເທດ​ສິງ​ປະ​ໂປ ​ຮຽນ​ຫຼາຍ​ພາ​ສາ​ໄປ​ພ້ອມໆ​ກັນ ເຊັ່ນ ພາ​ສາ​ຈີນ​ກາງ, ພາ​ສາ​ອັງ​ກິດ, ພາ​ສາ​ມາ​ເລ ໃນ​ຊຸມ​ປີ 60 ນັ້ນ​ເຖິງ ​ໄດ້ມີ​ການ​ຄັດ​ຄ້ານ​ຈາກ​ຄົນ​ພາຍ​ໃນ​ປະ​ເທດ ແຕ່​ຜູ້​ນຳ​ທ່ານນີ້​ກໍ​ຍັງ​ເຊື່ອ​ໝັ້ນ​ວ່າ ການ​ຮຽນຫຼາຍ​ພາ​ສາ ຈະ​ພາ​ໃຫ້​ຊາດ​ຈະ​ເລີນ, ມ​ຮອດ​ທຸກມື້ນີ້ ຈຶ່ງເປັນ​ສິ່ງ​ຊັດ​ເຈນວ່າ ຄົນ​ສິງ​ກະ​ໂປ ເກັ່ງ​ເລື່ອງ​ຄ້າ​ຂາຍ, ການ​ເຮັດ​ທຸ​ລະ​ກິດ​ກັບ​ສາ​ກົນ ຈົນ​ພາ​ໃຫ້​ປະ​ເທດ​ຊາດ​ພັດ​ທະ​ນາ​ລື່ນ​ເພິ່ນ​ໝົດ​ໃນ​ຂົງ​ເຂດນີ້.

ເວົ້າ​ຈໍ້​ເຂົ້າ​ມາ​ອີກ ກໍ​ແມ່ນ​ຄົນ​ຂາຍ​ນ້ຳ​ໝາກ​ຕານ​ຢູ່ ອັງ​ກໍ​ວັດ ປະ​ເທດ​ກຳ​ປູ​ເຈຍ ມໍ່ໆ​ກັບ​ລາວ​ເຮົາ​ນີ້, ເພິ່ນ​ເວົ້າ​ໄດ້​ພາ​ສາ​ຈີນ, ອັງ​ກິດ, ໄທ, ຍີ່​ປຸ່ນ ເລີຍ​ເຮັດ​ໃຫ້​ແຂກ​ຄົນ​ທີ່​ເຂົ້າ​ມາ​ທ່ຽວ​ຊົມ​ວັດ ທີ່​ມີຫຼາກ​ໜ້າຫຼາຍ​ຕາ ຫຼາຍ​ສັນ​ຊາດ ເຊື້ອ​ຊາດ ຕ່າງ​ກໍ​ແປກ​ປະຫຼາດ​ໃຈ, ມີ​ຄວາມ​ຜູກ​ພັນ ໝັ່ນ​ໃຈ​ເມື່ອ​ໄດ້​ຟັງ​ພາ​ສາ​ທີ່​ຕົນ​ເອງ​ເຂົ້າ​ໃຈ ກໍ​ຮີບ​ຟ້າວ​ຊື້ ນ້ຳ​ໝາກ​ຕານ ທີ່​ຫວານ​ເປັນ​ຂື່ນໆ​ນັ້ນ ຢ່າງ​ໄວ​ວາ ໂດຍບໍ່​ຖາມ​ຊີມ​ຊ້ຳ​ວ່າ ລົດ​ຊາດ​ເປັນ​ແນວ​ໃດ, ເຮົາ​ຈິນ​ຕະ​ນາ​ການ​ໄດ້ ວ່າ ຖ້າ​ແມ່​ຄ້າ​ຂາຍ​ນ້ຳ​ໝາກ​ຕານນັ້ນ ຫາກ​ເວົ້າ​ໄດ້​ແຕ່ ພາ​ສາ​ກຳ​ປູ​ເຈຍ ແລ້ວ ລາວ​ຄື​ຊິ​ມີ​ລູກ​ຄ້າ​ໜ້ອ​ຍົ​ງ​ເນາະ.

ເມື່ອ​ແລ​ເບິ່ງ​ປະ​ເທດ​ເຮົາ​ກໍ​ໜ້າ​ອຸກ​ໃຈ​ບໍ່​ໜ້ອຍ ທີ່​ຜົນ​ການ​ສຳຫຼວດ ທັກ​ສະ​ທາງ​ດ້ານ​ພາ​ສາ​ອັງ​ກິດ ​ຂອງ​ປະ​ເທດ​ທີ່​ໃຊ້​ພາ​ສາ​ອັງ​ກິດ​ເປັນ​ພາ​ສາ​ທີ​ສອງ (EF EPI) ​ປະ​ຈຳ​ປີ 2017 ພົບ​ວ່າ ໃນ​ຈຳ​ນວນ 80 ປະ​ເທດ​ທີ່​ໄດ້​ຮັບ​ການ​ສຳຫຼວດ ປະ​ເທດ​ລາວ​ເຮົາ ຖືກ​ຈັດ​ຢູ່​ທີ່​ທ້າຍ​ສຸດ, ຖ້າ​ທຽບ​ໃສ່​ຫ້ອງ​ຮຽນ ກໍ​ເປັນ​ທີ່​ໂຈກ ຄື​ເພິ່ນ​ວ່າ.

ເພາະ​ສະ​ນັ້ນ, ເມື່ອ​ຈະ​ກ້າວ​ສູ່ ການ​ເຊື່ອມ​ສານ​ທາງ​ດ້ານ​ເສດ​ຖະ​ກິດ​ກັບ​ພາກ​ພື້ນ, ການ​ເປີດ​ປະ​ຕູ​ສູ່ ປີ​ທ່ອງ​ທ່ຽວ​ລາວ ແລະ​ການ​ພັດ​ທະ​ນາ​ທີ່​ຍືນ​ຍົງ​ຂອງ​ປະ​ເທດນັ້ນ ການ​ລົງ​ທຶນ​ໃສ່ ການ​ຮຽນ​ພາ​ສາ​ຕ່າງ​ປະ​ເທດ ໂດຍ​ສະ​ເພາະ​ພາ​ສາ​ກາງນັ້ນ ຈຶ່ງ​ມີ​ບົດ​ບາດ​ສຳ​ຄັນ ໃນ​ການ​ສ້າງ​ສາ​ປະ​ເທດ​ເຮົາ​ຢ່າງ​ຍິ່ງ, ມາ​ຮຽນຫຼາຍໆ​ພາ​ສາ​ນຳ​ກັນ​ເນາະ!

- lattana 1 - ເວົ້າ​ໄດ້​ຫລາຍພາ​ສາ ພາໃຫ້​ຈະ​ເລີນ​ແທ້ບໍ່ ?
error: Alert: Content is protected !!