ກາແດງລາວປະດັບຫຼຽນກາມິດຕະພາບໃຫ້ກາແດງເຢຍລະມັນ

ໃນວັນທີ 30 ມີນາ ຜ່ານານີ້, ອົງການກາແດງລາວໄດ້ຈັດພິທິປະດັບຫຼຽນກາມິດຕະພາບ ແລະ ມອບໃບຍ້ອງຍໍໃຫ້ສະພາກາແດງເຢຍລະມັນ. ຂຶ້ນທີ່ນະຄອນຫຼວງວຽງຈັນ, ໂດຍທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ ເປັນກຽດປະດັບຫຼຽນກາມິດຕະພາບດັ່ງກ່າວໃຫ້ ທ່ານ Ms Gerda Hasselfeldt ປະທານສະພາກາແດງເຢຍລະມັນ. ທີ່ໄດ້ປະກອບສ່ວນຊ່ວຍເຫຼືອປະຊາຊົນລາວຜູ້ທຸກຍາກຂາດເຂີນຕະຫຼອດໄລຍະ 10 ປີ ຜ່ານມາ (2007-2017) ຊຶ່ງປະກອບມີໂຄງການ ບໍລິຈາກເລືອດຂອງອົງການກາແດງລາວ ລວມມີມູນຄ່າຫຼາຍກວ່າ 1,89 ລ້ານ ເອີໂຣ ໃນນັ້ນ, ໄດ້ປະຕິບັດຢູ່ 09 ແຂວງ ແລະ 14 ເມືອງໃນທົ່ວປະເທດ. ໄລຍະທີ 1 ເລີ່ມປະຕິບັດມາແຕ່ປີ 2007-2011, ກາແດງເຢຍລະມັນໄດ້ໃຫ້ການຊ່ວຍເຫຼືອດ້ານຕ່າງໆເຊັ່ນ: ວິທີການຈັດຕັ້ງປະຕິບັດຕົວຈິງ, ລະບົບການເຄື່ອນໄຫວ, ການສະໜອງອຸປະກອນການແພດເປັນຕົ້ນ: ຕູ້ເຢັນສຳລັບເກັບຮັກສາເລືອດ, ເຄື່ອງມືຮັບໃຊ້ທາງການແພດ, ລົດຕູ້ຮັບໃຊ້ເຄື່ອນໄຫວວຽກງານບໍລິຈາກເລືອດ, ອາຄານສູນເລືອດໃຫ້ 3 ແຂວງຄື: ສາລະວັນ, ຄຳມ່ວນ ແລະ ແຂວງໄຊຍະບູລີ ລວມມີມູນຄ່າຫຼາຍກວ່າ 311,000 ເອີໂຣ; ໃນໄລຍະທີ 2 ນັບແຕ່ປີ 2012-2014 ໄລຍະນີ້ກາແດງເຢຍລະມັນໄດ້ຕັ້ງຫ້ອງການປະຈຳຢູ່ລາວຂຶ້ນ ເພື່ອໃຫ້ການຊ່ວຍເຫຼືອດ້ານຕ່າງໆ ຢ່າງໃກ້ຊິດຕິດແທດ, ລົງເລິກການຊ່ວຍເຫຼືອດ້ານອຸປະກອນການແພດທີ່ທັນສະໄໝ ແລະ ວິທີການນຳໃຊ້ຢ່າງມີປະສິດທິຜົນ, ພ້ອມກັນນັ້ນກໍໄດ້ສ້າງອາຄານສູນເລືອດໃຫ້ 3 ແຂວງຄື: ບໍລິຄຳໄຊ, ບໍ່ແກ້ວ ແລະ ແຂວງຫຼວງນ້ຳທາ ລວມມູນຄ່າ 590.000 ເອີໂຣ ແລະ ໄລຍະທີ 3 ນັບແຕ່ປີ 2015-2017 ກາແດງເຢຍລະມັນ ໄດ້ສືບຕໍ່ຊ່ວຍເຫຼືອດ້ານອຸປະກອນການແພດ ແລະ ການສ້າງຄວາມເຂັ້ມແຂງໃຫ້ແກ່ພະນັກງານວິຊາການ ທີ່ຮັບຜິດຊອບວຽກງານເລືອດ ແລະ ສ້າງອາຄານສູນເລືອດໃຫ້ 2 ແຂວງຄື: ຫົວພັນ ແລະ ແຂວງອຸດົມໄຊ ລວມມີມູນຄ່າ 990.760 ເອີໂຣ.

ນອກນີ້, ອົງການດັັ່ງກ່າວ ຍັງໄດ້ເອົາໃຈໃສ່ສ້າງຄວາມເຂັ້ມແຂງທາງດ້ານວິຊາການໃຫ້ແກ່ບຸກຄະລາກອນຢູ່ບັນດາແຂວງ ແລະ ເມືອງເປົ້າໝາຍຕ່າງໆ, ເພື່ອແນໃສ່ຍົກລະດັບຄວາມຮູ້, ຄວາມສາມາດໃນການຈັດຕັ້ງປະຕິບັດວຽກງານເລືອດຢູ່ພາກສ່ວນຕ່າງໆ ແລະ ດ້ານພື້ນຖານໂຄງລ່າງ: ອາຄານສູນເລືອດຢູ່ 8 ແຂວງ, ສະໜອງລົດຕູ້ເພື່ອເຄື່ອນໄຫວໃນການອອກຮັບບໍລິຈາກ ແລະ ຂົນສົ່ງເລືອດ ພ້ອມດ້ວຍອຸປະກອນການແພດ ທີ່ຈຳເປັນເພື່ອນຳໃຊ້ເຂົ້າໃນວຽກງານການບໍລິການ ແລະ ສະໜອງເລືອດທີ່ປອດໄພ ໃຫ້ແກ່ສັງຄົມໄດ້ພຽງພໍ.