ສິ່ງທີ່ທ່ານຈະໄດ້ຈາກການເຊົາຫລິ້ນເຟດບຸກ

ເຊື່ອວ່າທຸກມື້ນີ້ຫລາຍຄົນມີອາການຕິດສື່ອອນລາຍ ໂດຍສະເພາະແມ່ນເຟສບຸກ ທີ່ຈະຕ້ອງເຂົ້າໄປອັບເດດຄວາມເປັນໄປມື້ລະຫລາຍໆເທື່ອ ບໍ່ວ່າຈະເຮັດຫຍັງ, ຢູ່ກັບໃຜ, ບ່ອນໃດກໍຕ້ອງໂພສ ແຕ່ຢູ່ອຳສະເຕີດຳຂອງປະເທດເນເທີແລນເພິ່ນມີ The 99 Days project ຫລື ໂຄງການໃຫ້ຄົນເຊົາໃຊ້ເຟສບຸກເປັນເວລາ 99 ມື້ ເພື່ອເອົາມາໃຊ້ໃນການວິໄຈອາການເສບຕິດ Facebook.

Merijn Straathof ຜູ້ລິເລີ່ມໂຄງການກ່າວວ່າ : ເຫັນໄດ້ຈະແຈ້ງວ່າຄົນສ່ວນຫລາຍຮູ້ສຶກມີຄວາມສຸກຂຶ້ນເມື່ອທົດລອງເຊົາໃຊ້ເຟສບຸກ, ເກືອບທຸກຄົນບອກວ່າ ພວກເຂົາມີເວລາເພີ່ມຫລາຍຂຶ້ນທີ່ຈະໄປເຮັດກິດຈະກຳອື່ນໆ ເຊັ່ນ : ອ່ານໜັງສື ຫລື ອອກໄປເຮັດຫຍັງມ່ວນໆກັບໝູ່ ເຊິ່ງຍິ່ງໄປກ່ວານັ້ນຍັງພົບວ່າ ປະມານ 25% ຂອງຜູ້ເຂົ້າຮ່ວມໂຄງການທີ່ເຊົາຫລິ້ນເຟສບຸກໄດ້ 99 ມື້ຄົບຈຳນວນ ໄດ້ເຊົາຫລິ້ນ Facebook ຢ່າງຈິງຈັງ ແລະ ບໍ່ກັບໄປຫລິ້ນອີກເລີຍ.

ສຳລັບຂໍ້ມູນຈາກໂຄງການນີ້ຈະຖືກເອົາໄປເປັນສ່ວນໜຶ່ງຂອງການວິໄຈຢູ່ມະຫາວິທະຍາໄລ Leiden ແລະ ມະຫາວິທະຍາໄລ  Vrije ໃນນະຄອນຫລວງອຳສະເຕີດຳ ກ່ຽວກັບອາການເສບຕິດ   Facebook ຕໍ່ໄປ.