ອາເມລິກາບໍ່ພໍໃຈຈີນ ຂຶ້ນພາສີສິນຄ້າ 128 ລາຍການ
ລັດຖະບານວໍຊິງຕັນສະແດງຄວາມບໍ່ພໍໃຈຢ່າງໜັກ ຕໍ່ການທີ່ຈີນຂຶ້ນພາສີສິນຄ້າຂອງອາເມລິກາ 128 ລາຍການ ເຊິ່ງລວມທັງຊີ້ນໝູແຊ່ແຂງ ແລະ ໝາກໄມ້. ຂະນະທີ່ດັດຊະນີຮຸ້ນຫລຸດລົງ 450 ຈຸດ ຈາກຄວາມກັງວົນເລື່ອງ “ສົງຄາມການຄ້າ” ລະຫວ່າງສອງປະເທດມະຫາອຳນາດທາງເສດຖະກິດໂລກ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 2 ເມສາວ່າ: ທ່ານ ລິນເຊ ວອດເທີ ຮອງໂຄສົກທຳນຽບຂາວ ກ່າວວ່າ: ຈີນຈຳເປັນຕ້ອງຢຸດການໃຊ້ວິທີປະຕິບັດທາງການຄ້າ “ທີ່ບໍ່ເປັນທຳ” ຕໍ່ອາເມລິກາ ເຊິ່ງບໍ່ພຽງແຕ່ເປັນການທຳລາຍສະຖຽນລະພາບດ້ານນະໂຍບາຍຂອງລັດຖະບານວໍຊິງຕັນ, ແຕ່ຍັງສົ່ງຜົນກະທົບຕໍ່ກົນໄກຕະຫລາດໂລກອີກດ້ວຍ ໂດຍສະເພາະການໃຊ້ມາດຕະການອຸດໜູນ ແລະ ທຸ່ມຕະຫລາດສິນຄ້າຫລາຍລາຍການ ເຊິ່ງຖືເປັນຮາກເຫງົ້າຂອງບັນຫາທັງໝົດ ພ້ອມທັງກ່າວວ່າ: ອາເມລິກາຈະຕອບໂຕ້.
ຂະນະດຽວກັນ, ລັດຖະບານວໍຊິງຕັນມີກຳນົດເປີດເຜີຍລາຍຊື່ສິນຄ້າຂອງຈີນ 1.300 ລາຍການທີ່ຈະຖືກຮຽກເກັບພາສີເພີ່ມຂຶ້ນ ຄິດເປັນມູນຄ່າສູງເຖິງ 60.000 ລ້ານໂດລາສະຫະລັດ ເພື່ອຕອບໂຕ້ນະໂຍບາຍການຄ້າຂອງລັດຖະບານປັກກິ່ງ ທີ່ເປັນການລະເມີດຊັບສິນທາງປັນຍາ ແລະ ຈາລະກຳຂໍ້ມູນດ້ານເຕັກໂນໂລຊີການຄ້າຂອງອາເມລິກາ.
