ທ່ານ ທຣຳ ເນັ້ນຈະຖອນທະຫານຈາກຊີຣີ ເພນຕາກອນບໍ່ເຫັນພ້ອມ
ປະທານາທິບໍດີ ໂດນັນ ທຣຳ ເນັ້ນຄວາມຕ້ອງການຖອນທະຫານອາເມລິກາອອກຈາກຊີຣີ, ແຕ່ເຈົ້າໜ້າທີ່ລະດັບສູງຂອງເພນຕາກອນບໍ່ເຫັນພ້ອມ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 4 ເມສາວ່າ: ປະທານາທິບໍດີ ໂດນັນ ທຣຳ ກ່າວວ່າ: ພາລະກິດພື້ນຖານຂອງກອງທັບອາເມລິກາໃນຊີຣີຄືການຖອນຮາກຖອນເຫງົ້າກຸ່ມ IS ແລະ ປັດຈຸບັນ ພາລະກິດດັ່ງກ່າວມີຄວາມຄືບໜ້າເກືອບສົມບູນແລ້ວ ເຊິ່ງອາເມລິກາຈະຕັດສິນໃຈຮ່ວມກັບພັນທະມິດວ່າຈະດຳເນີນການໃດເປັນຂັ້ນຕອນຕໍ່ໄປ ໂດຍທ່ານ ທຣຳ ກ່າວວ່າ: ສິ່ງທີ່ທ່ານຕ້ອງການຫລາຍທີ່ສຸດຄືການນຳທະຫານອາເມລິກາກັບບ້ານ ຖືເປັນການເນັ້ນຄຳຖະແຫລງຂອງຕົນເອງ ເຊິ່ງກ່າວລະຫວ່າງລົງພື້ນທີ່ໃນລັດໂອໄຮໂອ ໃນອາທິດຜ່ານມາວ່າ: ອາເມລິກາຈະຖອນທະຫານອອກຈາກຊີຣີໃນມໍ່ໆນີ້ ແລະ ຫລັງຈາກນີ້ປ່ອຍໃຫ້ຄົນອື່ນເບິ່ງແຍງ.
ເຖິງຢ່າງໃດກໍຕາມ, ພົນເອກ ໂຈເຊຟ ໂວເທລ ຜູ້ບັນຊາການສູນບັນຊາການກາງອາເມລິກາ ເຊິ່ງຄວບຄຸມປະຕິບັດການຂອງໜ່ວຍເຄື່ອນທີ່ໄວ ແລະ ໜ່ວຍຮົບພິເສດຂອງອາເມລິກາໃນຕາເວັນອອກກາງ ຄວບຄຸມທັງຊີຣີ, ອີຣັກ ແລະ ອັບການິດສະຖານ ກ່າວວ່າ: ອາເມລິກາຄວນມີບົດບາດໄລຍະຍາວໃນຊີຣີ ເພື່ອຮ່ວມຟື້ນຟູສະຖຽນລະພາບໃນທຸກດ້ານໃຫ້ກັບພື້ນທີ່ທີ່ໄດ້ຮັບການປົດປ່ອຍຈາກກຸ່ມ IS. ຂະນະທີ່ ທ່ານ ເບຣດ ແມກເກິກ ທູດພິເສດດ້ານການປະສານງານຂອງພັນທະມິດຕໍ່ຕ້ານກຸ່ມ IS ກ່າວວ່າ: ພາລະກິດຂອງກອງທັບອາເມລິກາ ແລະ ພັນທະມິດໃນການກຳຈັດກຸ່ມກໍ່ການຮ້າຍນີ້ຍັງບໍ່ສຳເລັດ.
