ແຄນລາວມໍລະດົກລາວມໍລະດົກໂລກ
ນັບເປັນຄວາມໂຊກດີ ແລະ ພາກພູມໃຈທີ່ ສປປ ລາວເຮົາ ສາມາດນຳສະເໜີແຄນຂື້ນເປັນມໍລະດົກໂລກ ແລະ ສາກົນ ຍອມຮັບວ່າເຄື່ອງດົນຕີປະເພດແຄນແມ່ນຕົ້ນກຳເນີດຈາກຄົນລາວ ແລະ ເປັນຂອງຄົນລາວ, ເຖິງແມ່ນວ່າຈະເຫັນຢູ່ໃນຝືນແຜ່ນດິນແຫ່ງຫົນໃດ ກໍສະແດງໄດ້ວ່ານັ້ນແມ່ນຂອງລາວ, ແຕ່ໜ້າເປັນຫ່ວງຫລາຍໃນປັດຈຸບັນຄືຜູ້ເປົ່າແຄນນັບມື້ຫລຸດໜ້ອຍຖອຍລົງຢ່າງໜ້າເປັນຫ່ວງ ຫາກບໍ່ເອົາໃຈໃສ່ສົ່ງເສີມລູກຫລານຢ່າງກວ້າງຂວາງຜູ້ສືບທອດເປົ່າແຄນກໍຈະໝົດໄປ.
ກ່ອນໜ້ານີ້, ໃນໄລຍະຊຸມປີ 90 ຂະບວນການເປົ່າແຄນຍັງປະກົດມີໃຫ້ເຫັນກັນຢ່າງຫລວງຫລາຍຕາມບ້ານຕ່າງໆ, ເຊິ່ງຜູ້ເຖົ້ານິຍົມນຳມາເປົ່າເປັນສຽງດົນຕຣີປະສານກັບສຽງຮ້ອງ, ສຽງຂັບ-ສຽງລຳ ໃນງານເທດສະການຕ່າງໆ ບໍ່ວ່າຈະເປັນງານບຸນວັດ, ງານຂຶ້ນເຮືອນໃໝ່, ບ່າວ-ສາວລົມກັນ, ງານເຮືອນດອງ, ງານບວດ ຫລື ງານປະເພນີຕ່າງໆ ກໍມີສຽງແຄນດັງຢ່າງອອນຊອນ, ເຮັດໃຫ້ມີບັນຍາກາດເຕັມໄປດ້ວຍຄວາມຍິ້ມແຍ້ມແຈ່ມໄສ ຍ້ອນສຽງແຄນຂັບຂານກ່ອມອາລົມເຮັດໃຫ້ມີຊີວິດຊີວາ ຟັງແລ້ວມີຄວາມສຸກອີ່ຫລີ.
ແນວໃດກໍຕາມ, ຫລັງຊຸມປີ 2000 ມານີ້, ສຽງດົນຕີສາກົນ ເລີ່ມມີອິດທິພົນແຜ່ລາມເຂົ້າມາໃນລາວຫລາຍຂື້ນ, ຊາວໜຸ່ມ-ເຍົາວະຊົນ ຄົນຮຸ່ນໃໝ່ໄດ້ ຊຶມຊັບເອົາ ຈົນລືມ ແລະ ບໍ່ຮູ້ວ່າເຮົາມີສຽງແຄນອັນໄພເລາະຊື່ນຊ້ອຍທີ່ເປັນດົນຕີພື້ນເມືອງຂອງລາວເຮົາເສຍແລ້ວ ແລະ ຜູ້ເຖົ້າຜູ້ແກ່ທີ່ເຄີຍມີມູນເຊື້ອເປົ່າແຄນກໍເລີ່ມຫ່າງເຫີນບໍ່ຄ່ອຍຈະເປົ່າດຸຄືແຕ່ກ່ອນ, ຈຶ່ງເຮັດໃຫ້ລູກຫລານເກີດໃໝ່ໃຫຍ່ລຸນບໍ່ຄ່ອຍໄດ້ຍິນສຽງແຄນ ແລະ ບາງຄົນຮອດບໍ່ຮູ້ຈັກວ່າແຄນ.
ຫລາຍປີຜ່ານມາ, ລັດຖະບານກໍມີຄວາມພະຍາຍາມປົກປ້ອງແຄນລາວໄວ້ ບໍ່ໃຫ້ຊາດອື່ນຍຶດເປັນເຄື່ອງດົນຕີຂອງເຂົາເຈົ້າ, ໂດຍສະເໜີຕໍ່ອົງການອຸຍແນັດສໂກ ເພື່ອຢັ້ງຢືນເປັນມໍລະດົກໂລກ, ຫລ້າສຸດໃນເດືອນມີນາ 2018 ກໍໄດ້ຖືກຮັບຮອງເອົາແຄນລາວເຂົ້າມໍລະດົກໂລກແລ້ວ ແລະ ສປປ ລາວ ກຳລັງຈະສະຫລອງໃຫຍ່ທີ່ນະຄອນຫລວງວຽງຈັນເລີ່ມແຕ່ວັນທີ 9-11 ເມສານີ້, ໂດຍຈະມີການແຫ່ແຄນອ້ອມນະຄອນຫລວງວຽງຈັນ ແລະ ໄປສັກກາລະບັນພະບູລຸດລາວທີ່ມີຄຸນງາມຄວາມດີຕໍ່ປະເທດຊາດ ຈາກນັ້ນກໍຈະມີພິທີສະຫລອງຢ່າງເປັນທາງການທີ່ຫໍວັດທະນະທຳແຫ່ງຊາດ, ເຊິ່ງຈະມີການຖ່າຍທອດສົດຜ່ານໂທລະພາບແຫ່ງຊາດລາວຕະຫລອດງານ.
ແຄນແມ່ນເຄື່ອງເສບຊະນິດໜຶ່ງທີ່ເຮັດຈາກໄມ້ອໍ້, ໄມ້ເຮ້ຍປ່ອງລຽວ ແລ້ວນຳມາຈັດລຽງຕາມລຳດັບສັ້ນຍາວຜ່ານເຕົ້າໄມ້ ໂອບດ້ວຍຂີ້ສູດ ເພື່ອເຮັດໃຫ້ສຽງແຕກຕ່າງກັນ ແລະ ລູກແຄນ ກໍຕ້ອງໄດ້ໃສ່ລີ້ນທອງແດງເພື່ອເຮັດໃຫ້ມີສຽງດັງ ຍິ່ງເປົ່າປະສານໃສ່ກັນຫລາຍດວງຍິ່ງເຮັດໃຫ້ມີສະເໜ່ເໜືອທີ່ຈະພັນລະນາອ້ອຍອິ່ນອອນຊອນ.
