ນະຄອນຫລວງວຽງຈັນເລັ່ງລວງຄອງລະບາຍນ້ຳຮອງຮັບລະດູຝົນ
ປັດຈຸບັນ, ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໄດ້ເລັ່ງຈັດຕັ້ງປະຕິບັດການລ່ວງຄອງລະບາຍນ້ຳຮັບປະກັນບໍ່ໃຫ້ມີນໍ້າຖ້ວມນ້ຳຂັງໃນເຂດຕົວເມືອງຕ່າງໆຂອງນະຄອນຫລວງວຽງຈັນດັ່ງທີ່ເຄີຍເປັນມາ, ຊຶ່ງລວມມີໄລຍະທາງຍາວຫລາຍກ່ວາ 132 ກິໂລແມັດ ແລະ 17 ສາຍຫວ້ຍທີ່ເປັນຈຸດຫລໍ່ແຫລມມີຄວາມສ່ຽງເກີດນ້ຳຖ້ວມທຸກປີ ແລະ ຄາດວ່າຈະສຳເລັດກ່ອນລະດູຝົນນີ້.
ທ່ານ ຄຳຫລ້າ ນວນທະສິງ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໃຫ້ຮູ້ວ່າ: ເພື່ອເປັນການສືບຕໍ່ປ້ອງກັນບໍ່ໃຫ້ມີສະພາບນ້ຳອັ່ງຂັງຖະໜົນຫົນທາງ ແລະ ເນື້ອທີ່ທຳການຜະລິດກະສິກຳຂອງປະຊາຊົນໃນລະດູຝົນນີ້, ເຈົ້າຄອງ-ຮອງເຈົ້າຄອງຈຶ່ງໄດ້ແນະນໍາໃຫ້ຮີບຮ້ອນລ່ວງຄອງລະບາຍນ້ຳເຂດບຶງທາດຫລວງຫາຫ້ວຍໝາກຮຽວ ແລະ ບ່ອນອື່ນໆທີ່ກວມເອົາ 6 ຕົວເມືອງໃຫ້ສຳເລັດໂດຍໄວ.
ຫົວໜ້າພະແນກດັ່ງກ່າວໃຫ້ຮູ້ວ່າ: ທີ່ຕັ້ງນະຄອນຫລວງວຽງຈັນຂ້ອນຂ້າງຕ່ຳ ແລະ ແຕ່ລະປີມັກມີນ້ຳຖ້ວມຂັງຫລາຍຈຸດ, ສະນັ້ນ ເພື່ອແກ້ໄຂບັນຫາດັ່ງກ່າວ ເລີ່ມປີ 2008 ລັດຖະບານໄດ້ລົງທຶນຈຳນວນ 300 ກວ່າຕື້ກີບ ລວງບຶງທາດຫລວງ, ຈາກນັ້ນກໍສາມາດແກ້ໄຂສະພາບນ້ຳຖ້ວມຂັງໄດ້ໃນລະດັບໜຶ່ງ, ດັ່ງນັ້ນຈຶ່ງຈຳເປັນສືບຕໍ່ໂຄງການດັ່ງກ່າວໂດຍປ່ຽນຊື່ມາເປັນຄອງນ້ຳວຽງຈັນ ກຳນົດເອົາເຂດບຶງທາດຫລວງຫາຫ້ວຍໝາກຮຽວ ແລະ ບຶງທາດຫລວງຫາຫ້ວຍເດື່ອ ຍາວ 69 ກິໂລແມັດ, ໂດຍມີເປົ້າໝາຍເພື່ອລະບາຍນ້ຳອອກຈາກຕົວເມືອງ, ບໍ່ໃຫ້ມີນ້ຳຖ້ວມຂັງ ແລະ ພັດທະນາເຂດນີ້ໃຫ້ກາຍເປັນຮ່ອງນ້ຳວຽງຈັນທີ່ສາມາດ ທ່ອງທ່ຽວ ແລະ ດຳເນີນທຸລະກິດໄດ້.
