ລາວກຽມປັບປຸງຕົວຊີ້ວັດຂອງບົດລາຍງານການດໍາເນີນທຸລະກິດ
ໃນວັນທີ 5 ເມສານີ້, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມປຶກສາຫາລື ກ່ຽວກັບການປັບປຸງຕົວຊີ້ວັດຂອງບົດລາຍງານການດໍາເນີນທຸລະກິດຢູ່ ສປປ ລາວ ແລະ ບົດຮຽນຈາກສາກົນ ຂຶ້ນທີ່ນະຄອນຫລວງວຽງຈັນ ເພື່ອແນໃສ່ເຮັດໃຫ້ອັນດັບຄວາມສະດວກໃນການດຳເນີນທຸລະກິດຢູ່ ສປປ ລາວ ມີອັນດັບດີຂຶ້ນໃນຊຸມປີຕໍ່ໜ້າ.
ກອງປະຊຸມດັ່ງກ່າວຈັດຂຶ້ນໂດຍການເປັນປະທານຂອງທ່ານ ຄໍາລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ເຊິ່ງມີທ່ານ ພົງສະຫວັນ ພົມກອງ ຫົວໜ້າຫ້ອງການອົງການການເງິນສາກົນ (IFC) ໂດຍໄດ້ຮັບການສະໜັບສະໜູນຈາກອົງການ IFC.
ທ່ານ ຄໍາລຽນ ພົນເສນາ ກ່າວວ່າ: ເພື່ອໃຫ້ມີການປ່ຽນແປງ ແລະ ປະຕິບັດເປັນເອກະພາບກັນເຫັນວ່າ ມີຄວາມຈໍາເປັນຕ້ອງໄດ້ເຮັດວຽກຮ່ວມກັບບັນດາກະຊວງທີ່ກ່ຽວຂ້ອງ ລວມທັງສາຍຕັ້ງຢູ່ທ້ອງຖິ່ນ ແລະ ພາກເອກະຊົນເພື່ອເຮັດໃຫ້ຈຸດປະສົງຂອງລັດຖະບານປາກົດຜົນເປັນຈິງ ເຮັດໃຫ້ອັນດັບຄວາມສະດວກໃນການດຳເນີນທຸລະກິດຢູ່ ສປປ ລາວ ມີອັນດັບທີ່ດີຂຶ້ນໃນປີ 2019.
ກະຊວງແຜນການ ແລະ ການລົງທຶນ ໃນນາມເປັນຜູ້ປະສານກັບຂະແໜງການກ່ຽວຂ້ອງ ເພື່ອຕິດຕາມຄວາມຄືບໜ້າໃນການແກ້ໄຂຂອດຂັ້ນຫຍຸ້ງຍາກໃນບັນດາ 10 ຕົວຊີ້ວັດກ່ຽວກັບຄວາມສະ ດວກໃນການດໍາເນີນທຸລະກິດຢູ່ ສປປ ລາວ ທີ່ທະນາຄານໂລກກຳນົດອອກ ຈຶ່ງໄດ້ຈັດກອງປະຊຸມທີ່ມີຄວາມໝາຍຄວາມສໍາຄັນນີ້ຂຶ້ນ ໂດຍມີຈຸດປະສົງເພື່ອປຶກສາຫາລືກ່ຽວກັບການປັບປຸງສະພາບແວດລ້ອມ ແລະ ບັນຍາກາດໃນການດຳເນີນທຸລະກິດຂອງພາກເອກະຊົນທັງພາຍໃນ ແລະ ຕ່າງປະເທດ ຢູ່ ສປປ ລາວ ໃຫ້ດີຂຶ້ນກວ່າເກົ່າ ໂດຍເນັ້ນໃຫ້ຮີບຮ້ອນແກ້ໄຂຂອດຂັ້ນທີ່ເປັນອຸປະສັກຕໍ່ການເຄື່ອນ ໄຫວດຳເນີນທຸລະກິດ ໂດຍສະເພາະການຫລຸດຂັ້ນຕອນ ແລະ ໄລຍະເວລາໃນການອະນຸມັດການດຳ ເນີນທຸລະກິດໃຫ້ສັ້ນເຂົ້າ, ມີຄວາມວ່ອງໄວ, ໂປ່ງໃສ, ຍຸຕິທຳ ເພື່ອສ້າງຄວາມເຊື່ອໝັ້ນ ແລະ ດຶງດູດການລົງທຶນໃຫ້ໄດ້ທັງປະລິມານ ແລະ ຄຸນນະພາບ, ເຮັດໃຫ້ການປະເມີນຄວາມສະດວກໃນການດໍາເນີນທຸລະກິດຢູ່ ສປປ ລາວ ມີອັນດັບທີ່ດີຂຶ້ນໃນປີ 2019 ເຊິ່ງຈໍາເປັນຕ້ອງໄດ້ປັບປຸງທັງໝົດເງື່ອນ ໄຂຂອງ 10 ຕົວຊີ້ວັດ ເລີ່ມແຕ່ຕົ້ນປີ 2018 ນີ້ເປັນຕົ້ນໄປ.
ກອງປະຊຸມຄັ້ງນີ້ ຍັງໄດ້ຮັບຟັງການນໍາສະເໜີບົດຮຽນ ແລະ ປະສົບການຈາກສາກົນກ່ຽວກັບແນວທາງໃນການປັບປຸງ ສປປ ລາວ ໂດຍການນໍາສະເໜີວິທີການສຶກສາການປະເມີນຈາກຊ່ຽວຊານ ດ້ານການປັບປຸງຕົວຊີ້ວັດການດໍາເນີນທຸລະກິດຈາກກຸ່ມທະນາຄານໂລກ ເຊິ່ງເນັ້ນໃສ່ 2 ຕົວຊີ້ວັດຄື: ຕົວຊີ້ວັດການຂໍໃບອະນຸຍາດປຸກສ້າງ ເຊິ່ງປັດຈຸບັນມີ 11 ຂັ້ນຕອນ, ໃຊ້ເວລາ 83 ວັນ ແລະ ມີຄ່າໃຊ້ຈ່າຍ 0,4% ຂອງມູນຄ່າການກໍ່ສ້າງເປັນອັນດັບທີ 40 ແລະ ຕົວຊີ້ວັດການຂໍຕິດຕັ້ງໄຟຟ້າ ປັດຈຸບັນມີ 6 ຂັ້ນຕອນ, ໃຊ້ເວລາ 134 ວັນ ແລະ ມີຄ່າໃຊ້ຈ່າຍສູງເຖິງ 132,5% ຂອງລາຍຮັບຕໍ່ຫົວຄົນເປັນອັນດັບ 149 ເຊິ່ງເຮັດໃຫ້ ສປປ ລາວ ຖືກຈັດຢູ່ໃນອັນດັບທີ 141 ໃນຈໍານວນທັງໝົດ190 ຂົງເຂດເສດຖະກິດໃນທົ່ວໂລກ. ສະນັ້ນ, ຜູ້ເຂົ້າຮ່ວມຈຶ່ງໄດ້ປຶກສາຫາລືກັນເພື່ອຊອກຫາວິທີການແກ້ໄຂສິ່ງອຸດຕັນທີ່ເປັນອຸປະສັກຕໍ່ການເຄື່ອນໄຫວດຳເນີນທຸລະກິດ ໂດຍເລີ່ມປັບປຸງ 2 ຕົວຊີ້ວັດດັ່ງກ່າວນັ້ນໃຫ້ມີອັນດັບທີ່ດີຂຶ້ນ. ຫລັງຈາກນັ້ນ ພວກເຮົາຍັງຈະໄດ້ສືບຕໍ່ປັບປຸງຕົວຊີ້ວັດອື່ນໆໃນຂັ້ນຕໍ່ໄປ.
ທ່ານ ພົງສະຫັວນ ພົມກອງ ກ່າວວ່າ: ຄວາມພະຍາຍາມຂອງລັດຖະບານໃນການປັບປຸງສະ ພາບແວດລ້ອມໃນການດຳເນີນທຸລະກິດຂອງປະເທດເປັນສິ່ງທີ່ໜ້າຊົມເຊີຍ. ໃນບາດກ້າວຕໍ່ໄປ, ການສ້າງກົນໄກການປະສານງານທີ່ເຂັ້ມແຂງ, ຄົບຖ້ວນ ແລະ ມີປະສິດທິພາບ ເຊິ່ງມີການເຂົ້າຮ່ວມຂອງພາກເອກະຊົນ ຈະສະແດງໃຫ້ເຫັນເຖິງຄວາມມຸ່ງໝັ້ນຢ່າງຕໍ່ເນື່ອງຂອງລັດຖະບານໃນການປັບປຸງ. IFC ຈະສະໜັບສະໜູນການປັບປຸງທີ່ພວມດຳເນີນຢູ່ຂອງລັດຖະບານ ເພື່ອກະຕຸກຊຸກຍູ້ການເຕີບໃຫຍ່ຂອງພາກເອກະຊົນ ລວມທັງວິສາຫະກິດຂະໜາດນ້ອຍ ແລະ ຂະໜາດກາງ, ການສ້າງວຽກເຮັດງານ ທໍາ ແລະ ເພື່ອຈະຂັບເຄື່ອນເສດຖະກິດຂອງປະເທດຕໍ່ໄປ.
