63 ປີແຫ່ງການເຕີບໃຫຍ່ຂະຫຍາຍຕົວ ຂອງຄະນະຊາວໜຸ່ມປະຊາຊົນປະຕິວັດລາວ
ເນື່ອງໃນໂອກາດວັນສ້າງຕັ້ງຄະນະຊາວໜຸ່ມ ປະຊາຊົນປະຕິວັດລາວຄົບຮອບ 63 ປີ, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູງກາງຊາວໜຸ່ມ ປະຊາຊົນປະຕິວັດລາວ ໄດ້ຖະແຫລງຂ່າວ ຕໍ່ສື່ມວນຊົນ ໃນວັນທີ 5 ເມສານີ້ວ່າ: ຕະຫລອດໄລຍະ 63 ປີ ຜ່ານມາຄະນະຊາວໜຸ່ມປະຊາຊົນປະຕິວັດລາວ ໄດ້ເອົາໃຈໃສ່ຊີ້ນຳ-ນຳພາ ສະມາຊິກຊາວໜຸ່ມ-ເຍົາວະຊົນລາວບັນດາເຜົ່າ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງຕົນ, ປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມ ແລະ ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາ ຢ່າງກວ້າງຂວາງ ເຊິ່ງໄດ້ຢັ້ງຢືນໃຫ້ເຫັນວ່າໃນ 1 ປີຜ່ານມາ ຄະນະຊາວໜຸ່ມ, ໜ່ວຍຊາວໜຸ່ມຫລາຍແຫ່ງ ໄດ້ຮັບນາມມະຍົດເປັນໜ່ວຍຊາວໜຸ່ມ 4 ບຸກ ແລະ ກອງເຍົາວະຊົນດີເດັ່ນຫລາຍໆກອງ. ນອກຈາກນີ້, ຄະນະພັກ, ຄະນະຊາວໜຸ່ມແຕ່ລະຂັ້ນ ກໍບໍ່ໄດ້ລົດລະໃນການໂຄສະນາສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ຊາວໜຸ່ມ-ເຍົາວະຊົນລາວບັນດາເຜົ່າ, ເຮັດໃຫ້ເຂົາເຈົ້າມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ແນວທາງຂອງພັກ, ລະບຽບກົດໝາຍຂອງລັດ, ມີແນວທາງຮັກຊາດຢ່າງສູງສົ່ງ ຮູ້ໄດ້ເຖິງວັດທະນະທໍາຮີດຄອງປະເພນີອັນດີງາມຂອງຊາດ, ຮູ້ເຖິງມູນເຊື້ອຂອງຊາດ, ຂອງບັນພະບູລຸດ ກໍຄື ຊາວໜຸ່ມຮຸ່ນກ່ອນ, ຊາວໜຸ່ມ-ເຍົາວະຊົນ ຈໍານວນຫລາຍໄດ້ເອົາໃຈໃສ່ຄົ້ນຄວ້າຮໍ່າຮຽນ ຊອກຮູ້ສະແຫວງຫາດ້ານດີເພື່ອນໍາພາມາພັດທະນາຕົນເອງໃຫ້ກາຍເປັນພົນລະເມືອງດີຂອງຊາດ.
ທ່ານ ອາລຸນໄຊ ສູນນະລາດ ກ່າວເນັ້ນວ່າ: ໃນໂອກາດນີ້ກໍຂໍຮຽກຮ້ອງໃຫ້ຊາວໜຸ່ມຈົ່ງນໍາໜ້າປະຈັນບານ ເຂົ້າໃນທຸກໜ້າທີ່ວຽກງານໃຫ້ສົມກັບອະດີດ ປະທານ ໄກສອນ ພົມວິຫານ ເຄີຍໄດ້ໃຫ້ສັນຍານາມໄວ້ວ່າ: ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັນກົວຕໍ່ພະຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝຂອງພວກເຮົາ, ອິນຊີທັງຫລາຍຈົ່ງບິນສູງ ບິນໄປໄກແສນໄກ ໃຕ້ທ້ອງຟ້າສີຄາມຂອງປະເທດຊາດ ແລະ ນໍາເອົາອະນາຄົດອັນສົດໃສ ມາໃຫ້ແກ່ຄົນຮຸ່ນໜຸ່ມພວກເຮົາເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຊາວໜຸ່ມລາວອາດຫານກ້າວຂຶ້ນ. ໂອກາດດັ່ງກ່າວ, ທ່ານກໍໄດ້ອວຍພອນໄຊອັນປະເສີດ ມາຍັງການນຳພັກ-ລັດ, ນັກປະຕິວັດອາວຸໂສທຸກທ່ານ ຈົ່ງມີສຸຂະພາບແຂງແຮງ, ມີຄວາມຜາສຸກ, ສືບຕໍ່ຊີ້ນຳ-ນຳພາປະເທດຊາດ ໃຫ້ໄດ້ຮັບການພັດທະນາເພື່ອກ້າວໄປສູ່ຄວາມມັ່ງຄັ່ງ, ເຂັ້ມແຂງ, ປະຊາ ຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.
