ຮອງນາຍົກລັດຖະມົນຕີ ສອນໄຊ ສີພັນດອນ ຊຸກຍູ້ວຽກງານຢູ່ແຂວງເຊກອງ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຊຸກຍູ້ວຽກງານຢູ່ແຂວງເຊກອງໃນວັນທີ 3 ເມສານີ້, ໂດຍການຕ້ອນຮັບຂອງທ່ານ ຄຳເຜີຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ພ້ອມດ້ວຍຄະນະ, ມີບັນດາທ່ານຫົວໜ້າ-ຮອງພະແນກການອ້ອມຂ້າງແຂວງເຂົ້າຮ່ວມເປັນຈໍານວນຫລາຍ ເພື່ອຊີ້ນໍາ, ຊຸກຍູ້ຕິດຕາມການ

ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII, ໂດຍທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ໄດ້ລາຍງານການເຄື່ອນໄຫວວຽກງານໂດຍຫຍໍ້ວ່າ: ໃນຜ່ານມາ, ຄະນະພັກ-ອຳນາດການປົກຄອງທ້ອງຖິ່ນ ແລະ ປະຊາຊົນບັນດາເຜົ່າຊາວແຂວງເຊກອງໄດ້ສູ້ຊົນເປັນເຈົ້າການຊີ້ນຳ-ນໍາພາຈັດຕັ້ງປະຕິບັດເຂົ້າສູ່ຂະບວນການຕົວຈິງ ໄປຄຽງຄູ່ກັບການນໍາໃຊ້ ແລະ ຂຸດຄົ້ນທ່າແຮງບົ່ມຊ້ອນກັບທີ່ ແລະ ເປີດກວ້າງການຍາດແຍ່ງຊ່ວຍເຫຼືອ-ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ຕິດພັນກັບການແກ້ໄຂຊີວິດການເປັນຢູ່ຂອງຖັນແຖວພະນັກງານ, ທະຫານ-ຕໍາຫຼວດ ແລະ ປະຊາຊົນບັນ ດາເຜົ່າໃຫ້ໄດ້ຮັບການຍົກລະດັບດີຂຶ້ນ, ເສດຖະກິດຂອງແຂວງມາຮອດປັດຈຸບັນມີລະດັບຂະຫຍາຍຕົວສູງ 9,1%, ສະເລ່ຍລາຍຮັບຕໍ່ປະຊາກອນບັນລຸໄດ້ 1.580 ໂດລາສະຫະລັດຕໍ່ຄົນຕໍ່ປີເຊິ່ງຄາດວ່າຮອດປີ 2020 ຈະບັນລຸຕາມລະດັບຄາດໝາຍທີ່ວາງໄວ້.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ໂອ້ລົມຊີ້ນໍາໃຫ້ຄະນະນຳຂອງແຂວງເອົາໃຈໃສ່ແກ້ໄຂຈຸດທີ່ເປັນຂອດບົກຜ່ອງ, ຂໍ້ຫຍຸ້ງຍາກໃນການປະຕິບັດວຽກງານຂອງຕົນໃຫ້ມີຄວາມສະດວກ ເພື່ອເຮັດໃຫ້ການຈັດຕັ້ງປະຕິບັດບັນດາແຜນການຄາດໝາຍສູ້ຊົນໃຫ້ມີຜົນສໍາເລັດ ແລະ ມີປະສິດທິພາບສູງ, ສຸມໃສ່ແກ້ໄຂບັນຫາທີ່ຍັງຄ້າງຄາ, ໂດຍສະເພາະແມ່ນດັດຊະນີໝາຍກ່ຽວກັບການນຳພາປະເທດເຮົາຫລຸດພົ້ນອອກຈາກປະເທດດ້ອຍພັດທະນາໃນປີ 2020, ເອົາໃຈໃສ່ຕິດຕາມ, ຊຸກຍູ້ສົ່ງເສີມ ແລະ ຄຸ້ມຄອງການລົງທຶນທັງພາຍໃນ ແລະ ຕ່າງປະເທດ ເພື່ອພັດທະນາພື້ນຖານໂຄງລ່າງຂອງແຂວງໃຫ້ດີຂຶ້ນກວ່າເກົ່າ, ສິ່ງທ້າທາຍແມ່ນການພັດທະນາຊັບພະ ຍາກອນມະນຸດທີ່ພົວພັນກັບຂະແໜງວັດທະນະທຳສັງຄົມ, ຕ້ອງໄດ້ມີການຄົ້ນ ຄວ້າປະຊາສໍາພັນໂຄສະນາດ້ານໂພຊະນາການໃຫ້ທົ່ວເຖິງ, ເອົາໃຈໃສ່ກໍ່ສ້າງພື້ນຖານໂຄງລ່າງ, ແກ້ໄຂບັນຫາໄພທຳມະຊາດ, ແກ້ໄຂຄວາມທຸກຍາກຂອງປະຊາຊົນໃຫ້ຫຼຸດລົງເທື່ອລະກ້າວ ແລະ ໃນຕໍ່ໜ້າເພື່ອສືບຕໍ່ປະຕິບັດຜັນຂະຫຍາຍມະຕິກອງປະຊຸມໃຫຍ່ຂອງພັກ ກໍຄືແຜນພັດທະນາເສດຖະກິດ-ສັງຄົມ 5 ປີວາງໄວ້ນັ້ນໃຫ້ສຳເລັດ ຮຽກຮ້ອງໃຫ້ບັນດາຂະແໜງການກວດກາຈຸດໃດທີ່ຍັງເປັນຄວາມສ່ຽງ, ເປັນສິ່ງທ້າທາຍ, ເບິ່ງເຫດຜົນຕົວຈິງວ່າຈະແກ້ໄຂແນວໃດ ເພື່ອໃຫ້ບັນລຸຕາມເປົ້າໝາຍຕ່າງໆນັ້ນ ຕ້ອງໄດ້ມີການປະສານກັບບັນດາຂະແໜງການຂັ້ນສູນກາງທີ່ມີສ່ວນຮ່ວມ ເພື່ອຫັນລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕາມທິດສາມສ້າງ. ນອກນີ້ ກໍໃຫ້ເອົາໃຈໃສ່ແກ້ໄຂການອະໄພຍະໂທດ, ການຕ້ານການຄ້າມະນຸດ, ສືບຕໍ່ປະຕິບັດວຽກງານສາມສ້າງໃຫ້ເປັນຮູບປະທໍາ.