ງວດທຳອິດປີນີ້ກອງກວດກາພາສີອຸດົມໄຊເກັບລາຍຮັບໄດ້ 3,5 ຕື້ກີບ
ໃນງວດທຳອິດຂອງປີ 2018 ນີ້, ກອງກວດກາພາສີແຂວງອຸດົມໄຊສາມາດເກັບລາຍຮັບເຂົ້າງົບປະມານໄດ້ 3,5 ຕື້ກີບ, ທຽບໃສ່ແຜນການງວດເທົ່າກັບ 97,99%, ສາເຫດເຮັດໃຫ້ການຈັດເກັບລາຍຮັບບໍ່ໄດ້ຕາມແຜນການຍ້ອນເສັ້ນທາງໄປມາມີຄວາມຫຍຸ້ງຍາກ, ການນໍາເຂົ້າສິນຄ້າຫລຸດລົງ ແລະ ບັນຫາອື່ນໆ.
ທ່ານ ຫັດສະດີ ພົມມະເທບ ຮອງຫົວໜ້າກອງຄຸ້ມຄອງພາສີ II ຫົວໜ້າກອງກວດກາພາສີແຂວງອຸດົມໄຊ ໃຫ້ຮູ້ວ່າ: ໃນປີ 2017 ຜ່ານມາກອງກວດກາພາສີ ປະຈໍາແຂວງອຸດົມໄຊ ໄດ້ຮັບຕົວເລກມອບໝາຍ 9,2 ຕື້ກີບ. ໃນນັ້ນ, ກອງກວດກາພາສີປະຈຳແຂວງ 1,7 ຕື້ກີບ, ດ່ານພາສີທ້ອງຖິ່ນພູຫລັກຄໍາ 7,5 ຕື້ກີບ, ແຕ່ຜ່ານການຈັດຕັ້ງປະຕິບັດຕົວຈິງໄດ້ທັງໝົດ 17,5 ຕື້ກີບລື່ນແຜນການປີວາງໄວ 91% ໃນນັ້ນ, ກອງກວດພາສີປະຕິບັດໄດ້ 6,4 ຕື້ກີບ, ດ່ານພາສີທ້ອງຖິ່ນພູຫລັກຄຳປະຕິບັດໄດ້ 11,1 ຕື້ກີບ. ສາເຫດໃຫ້ພາໃຫ້ການເກັບລາຍຮັບລື່ນແຜນການປີກໍຍ້ອນການແກ້ໄຂພາຫະນະບໍ່ຖືກຕ້ອງຂອງຄະນະສະເພາະກິດ, ການນຳເຂົ້າສິນຄ້າຜ່ານດ່ານເພີ່ມຂຶ້ນ, ມີການສົ່ງອອກແຮ່ທາດເຫລັກຂອງບໍລິສັດ ເຊິ່ງຊ່າງ ແລະ ຈາກການເກັບຄ່າຊັກພິເສດ ແລະ ລາຍຮັບອື່ນໆອີກ.
ສຳລັບການຈັດຕັ້ງປະຕິບັດແຜນງົບປະມານແຫ່ງລັດປີ 2018 ໄດ້ຮັບຕົວເລກຈັດເກັບທັງໝົດ 14,5 ຕື້ກວ່າກີບ ໃນນັ້ນ, ກອງກວດກາພາສີປະຈຳແຂວງ 1,8 ຕື້ກີບ, ດ່ານພາສີທ້ອງຖິ່ນ ພູຫລັກຄຳ 12,6 ຕື້ກີບ, ແຕ່ຜ່ານການຈັດຕັ້ງປະຕິບັດຕົວຈິງໃນງວດທຳອິດຂອງປີ 2018 ສາມາດປະຕິບັດໄດ້ທັງໝົດ 3,5 ຕື້ກີບ. ສັງລວມແລ້ວການຈັດຕັ້ງປະຕິບັດໃນງວດທຳອິດບໍ່ບັນລຸຕາມແຜນການ, ຍ້ອນເສັ້ນທາງເປ່ເພ, ມີການກໍ່ສ້າງສ້ອມແປງ, ລາຍຮັບຈາກການສົ່ງອອກແຮ່ເຫລັກບໍ່ມີ ຍ້ອນບໍ່ທັນມີແຜນອະນຸຍາດສົ່ງອອກ, ການນຳເຂົ້າສິນຄ້າຜ່ານດ່ານຫລຸດລົງ ໂດຍສະເພາະໃນຊ່ວງເທດສະການປີໃໝ່ຊາວຈີນ ແລະ ບັນຫາອື່ນໆ.
ທ່ານຮອງຫົວໜ້າກອງຄຸ້ມຄອງພາສີ II, ຫົວໜ້າກອງກວດກາພາສີປະຈຳແຂວງອຸດົມໄຊ ກ່າວຕື່ມອີກວ່າ: ກອງກວດກາພາສີ ປະຈຳແຂວງອຸດົມໄຊ. ນອກຈາກການຈັດຕັ້ງປະຕິບັດວຽກງານວິຊາສະເພາະແລ້ວຍັງເອົາໃຈໃສ່ວຽກງານການຄຸ້ມຄອງເຄື່ອນຍ້າຍສິນຄ້າ, ເຄື່ອງຂອງໂຄງການທາງລົດໄຟລາວ-ຈີນ ແລະ ໂຄງການລົງທຶນອື່ນໆ.
