ປະທານກວດກາກະຊວງ ຜທ ເນັ້ນໃຫ້ຖືວຽກກວດກາເປັນທິດນໍາພາ

ໃນໂອກາດເປັນປະທານກອງປະຊຸມສະຫລຸບວຽກງານກວດກາທົ່ວກະຊວງແຜນການ ແລະ ການລົງທຶນ (ຜທ) ປະຈຳປີ 2017 ເມື່ອບໍ່ດົນນີ້ຂອງທ່ານ ຄໍາລຽນ ພົນເສນາ ຮອງລັດຖະມົນຕີ, ທັງເປັນປະທານກວດກາພັກກະຊວງດັ່ງກ່າວ, ເຊິ່ງທ່ານໄດ້ຍົກໃຫ້ເຫັນວ່າ: ວຽກງານກວດກາແມ່ນບົດບາດການຊີ້ນຳ-ນໍາພາຂອງພັກ ແລະ ລັດ, ຖ້າບໍ່ມີການກວດກາກໍໝາຍວ່າບໍ່ມີການນຳພາ ແລະ ວຽກງານດັ່ງກ່າວແມ່ນສອດຫ້ອຍເຂົ້າທຸກຂົງເຂດວຽກງານ ແລະ ເຮັດເປັນປົກກະຕິ, ເພື່ອໃຫ້ເຫັນຈຸດບົກຜ່ອງດ້ານຫຍໍ້ທໍ້ຕ່າງໆ ແລະ ດ້ານທີ່ຕັ້ງໜ້າໃນການປະຕິບັດວຽກງານຕົວຈິງ. ໃນໂອກາດນີ້, ທ່ານຮອງລັດຖະມົນຕີ ໄດ້ເນັ້ນໃຫ້ຄະນະພັກ-ຄະນະກວດກາທຸກຂັ້ນ, ຕ້ອງມີຄວາມເຂົ້າໃຈທີ່ຖືກຕ້ອງເປັນເອກະພາບກ່ຽວກັບວຽກງານກວດກາໄລຍະໃໝ່, ການແກ້ໄຂຜົນຂອງການກວດກາຕ້ອງຮັບປະກັນຄວາມຖືກຕ້ອງໂປ່ງໃສ, ພ້ອມທັງມີການລົງວິໄນຢ່າງເຂັ້ມງວດຕໍ່ຜູ້ກະທຳຜິດ, ໃຫ້ທຸກພາກສ່ວນເປັນເຈົ້າການຮ່ວມກັນເພື່ອສະກັດກັ້ນການລະເມີດລະບຽບກົດໝາຍ, ເອົາໃຈໃສ່ປັບປຸງທາງດ້ານການຈັດຕັ້ງ, ບຸກຄະລາ ກອນ ແລະ ລະບອບແບບແຜນວິທີເຄື່ອນໄຫວຂອງວຽກງານກວດກາໃຫ້ລະອຽດ ແລະ ເພີ່ມທະວີຄວາມຮັບຜິດຊອບຕໍ່ການຕົກລົງແກ້ໄຂຜົນຂອງການກວດກາໃຫ້ເຂັ້ມງວດ, ສັກສິດຕາມລະບຽບຫລັກການ ແລະ ກົດໝາຍ, ຖ້າກວດກາແລ້ວບໍ່ມີການແກ້ໄຂກໍຖືວ່າການກວດການັ້ນບໍ່ມີຄວາມໝາຍ, ການກວດກາເປັນການສຶກສາອົບຮົມການປະຕິບັດກົດລະບຽບຂອງພັກ ແລະ ກົດໝາຍຂອງລັດຢ່າງເຂັ້ມງວດ, ເປົ້າໝາຍຖືກກວດກາເສີມຂະຫຍາຍໄດ້ດ້ານດີ ແລະ ແກ້ໄຂຈຸດອອ່ນ, ຂໍ້ຂາດຕົກບົກຜ່ອງ, ຜູ້ເຮັດດີມີຜົນງານກໍຕ້ອງໄດ້ຮັບການຍ້ອງຍໍສັນລະເສີນ ແລະ ໃຫ້ມີຄວາມກ້າວໜ້າຂຶ້ນ, ຜູ້ທີ່ລະເມີດ ຫລື ກະທຳຜິດກໍຕ້ອງໄດ້ຮັບໂທດຕາມລະບຽບກົດໝາຍ.