ທູດຣັດເຊຍຂູ່ອັງກິດກາງກອງປະຊຸມ ສປຊ ກໍລະນີວາງຢາພິດອະດີດສາຍລັບ
ທູດຣັດເຊຍຂູ່ອັງກິດໃນກອງປະຊຸມສະຫະປະຊາຊາດກໍລະນີຖືກກ່າວຫາຢູ່ເບື້ອງຫລັງການວາງຢາພິດອະດີດສາຍລັບ ແລະ ລູກສາວ, ລະບຸອັງກິດກຳລັງຫລິ້ນກັບໄຟ ແລະ ຈະຕ້ອງເສຍໃຈທີ່ສ້າງເລື່ອງນີ້ຂຶ້ນມາ.
ທ່ານ ວາສຊິລີ ເນເບນເຊຍ ທູດຣັດເຊຍປະຈຳສະຫະປະຊາຊາດ ກ່າວວ່າ: ເປັນໄປໄດ້ຫລາຍທີ່ອົງການສາຍລັບຂອງບາງປະເທດຈະຢູ່ເບື້ອງຫລັງການວາງຢາພິດທ່ານ ເຊີເກ ສກຣີປາລ ອະດີດສາຍລັບສອງໜ້າຂອງຣັດເຊຍ ແລະ ນາງ ຢູເລຍ ລູກສາວ ແລະ ຫລາຍສິ່ງຫລາຍຢ່າງບົ່ງບອກວ່າ: ໄດ້ມີການຮ່ວມມືກັນ ແລະ ວາງແຜນເປັນຢ່າງດີ ເພື່ອຫວັງໃຊ້ເຫດການທີ່ເກີດຂຶ້ນທຳລາຍຄວາມໜ້າເຊື່ອຖືຂອງຣັດເຊຍ. ເຖິງຢ່າງໃດກໍຕາມ ທ່ານ ເນເບນເຊຍ ບໍ່ຍອມລະບຸຊື່ອົງການສາຍລັບດັ່ງກ່າວ ເຊິ່ງຕ້ອງການເຮັດໃຫ້ຣັດເຊຍຖືກຕັ້ງຄຳຖາມເຖິງຄວາມໄຮ້ມະນຸດສະທຳ ແລະ ບົດບາດຂອງຣັດເຊຍບໍ່ພຽງໃນຊີຣີ ລວມທັງບ່ອນອື່ນໆໃນໂລກອີກດ້ວຍ. ພ້ອມກັນນັ້ນ ໄດ້ເຕືອນອັງກິດ ແລະ ພັນທະມິດວ່າກຳລັງຫລິ້ນກັບໄຟ ແລະ ຈະຕ້ອງເສຍໃຈທີ່ສ້າງເລື່ອງນີ້ຂຶ້ນມາ.
'Theatre of the absurd' – Russian Envoy to UN on UK's Skripal case pic.twitter.com/THtS8WYwA6
— Ruptly (@Ruptly) April 6, 2018
ທ່ານ ເນເບນເຊຍ ຍັງເນັ້ນອີກວ່າ: ອັງກິດບໍ່ຍອມໃຫ້ການຮ່ວມມືກັບຣັດເຊຍ ທັງທີ່ເຫຍື່ອເປັນຊາວຣັດເຊຍ ແລະ ອາດຊະຍາກຳເກີດຂຶ້ນໃນດິນແດນອັງກິດ ເຊິ່ງອາດເປັນການກໍ່ການຮ້າຍ. ດັ່ງນັ້ນ ຣັດເຊຍຄວນໄດ້ຮັບອະນຸຍາດເຂົ້າພົບເຫຍື່ອໄດ້. ສ່ວນລູກສາວຂອງ ສກຣີປາລ ໄດ້ຖະແຫລງຜ່ານຕຳຫລວດອັງກິດວ່າ: ອາການຂອງນາງດີຂຶ້ນເປັນລຳດັບ ແລະ ຂໍຂອບໃຈທຸກຄົນທີ່ຊ່ວຍເຫລືອນາງ ແລະ ພໍ່ທີ່ຖືກສານພິດທຳລາຍປະສາດຈົນໝົດສະຕິໃນເດືອນມີນາຜ່ານມາ.
ສຳລັບການຂັບໄລ່ທູດໂຕ້ຕອບກັນລະຫວ່າງຣັດເຊຍກັບອັງກິດ ແລະ ພັນທະມິດ ເຊິ່ງຖືວ່າຮຸນແຮງທີ່ສຸດນັບແຕ່ສະໄໝສົງຄາມເຢັນນັ້ນ, ຫລ້າສຸດອາທິດຜ່ານມາ ຣັດເຊຍສັ່ງຂັບໄລ່ທູດອາເມລິກາ 60 ຄົນອອກຈາກຣັດເຊຍທັນທີໂຕ້ຕອບກັບທີ່ອາເມລິກາສັ່ງຂັບໄລ່ທູດຣັດເຊຍອອກຈາກອາເມລິກາໃນຈຳນວນດຽວກັນ.
