ເຜີຍໂສມຊຸດຢາມຂອງ ແມນຢູ ລະດູການ 2018-19
ຟຸດຕີ້ ເຮດໄລ ໂພສພາບທີ່ບອກວ່າເປັນຊຸດຢາມໃໝ່ຂອງ ແມນເຊັສເຕີ ຢູໄນເຕັດ ໂດຍຈຸດທີ່ໂດດເດັ່ນທີ່ສຸດຄືມີການໃສ່ແຂບສີດຳອີກດ້ວຍ.
ຟຸດຕີ້ ເຮດໄລ ສື່ຂ່າວສານດ້ານຜະລິດຕະພັນວົງການບານເຕະ ເປີດເຜີຍພາບທີ່ອ້າງວ່າເປັນຊຸດຢາມໂຕໃໝ່ຂອງ ແມນເຊັສເຕີ ຢູໄນເຕັດ ສະໂມສອນຍັກໃຫຍແຫ່ງ ພຣີເມຍລີກ ອັງກິດ ທີ່ຈະໃຊ້ໃນລະດູການ 2018-19.
ຊຸດດັ່ງກ່າວຖືວ່າຕ່າງໄປຈາກຊຸດຢາມໂຕກ່ອນໆຂອງ ແມນເຊັສເຕີ ຢູໄນເຕັດ ແລະ ຕ່າງຈາກຮູບແບບຜ່ານໆມາຂອງ ອາດິດາສ ບໍລິສັດຜະລິດຕະພັນກິລາລະດັບໂລກນຳອີກ ເພາະເຖິງຈະຍັງໃຊ້ສີແດງເປັນຕົ້ນຕໍ ແຕ່ມີການໃສ່ແຂບເສັ້ນສີດຳຫລາຍເສັ້ນ.
ຟຸດຕີ້ ເຮດໄລ ກ່າວອີກວ່າ: ຊຸດແຂ່ງນີ້ຖືກອອກແບບມາໂດຍໄດ້ແຮງບັນດານໃຈຈາກຜູ້ທີ່ກໍ່ຕັ້ງສະໂມສອນເປັນກຸ່ມພະນັກງານລົດໄຟ ເຊິ່ງສະໄໝສະຕະວັດທີ 19 ນັ້ນ ລາງລົດໄຟມັກຈະເປັນສີແດງ-ດຳ ໂດຍ ແມນເຊັສເຕີ ຢູໄນເຕັດ ຖືກສ້າງຕັ້ງສະໂມສອນໃນປີ 1878.
ທັງນີ້ ແຟນບານ ແມນເຊັສເຕີ ຢູໄນເຕັດ ບາງສ່ວນບໍ່ມັກການອອກແບບຊຸດແຂ່ງຈາກຮູບທີ່ ຟຸດຕີ້ ເຮດໄລ ປ່ອຍອອກມາ.
