ມູກູຣູຊາ ຄວ້າແຊ້ມເຕັນນິດ ອາເບຍໂຕ
ການແຂ່ງຂັນເຕັນນິດ ດັບເບີ້ນຢູທີເອ ທົວ ລາຍການ ອາເບຍໂຕ ຈີເອັນພີ ເຊກູຣອສ ຊິງເງິນລາງວັນ 250.000 ໂດລາສະຫະລັດ ຢູ່ເມືອງມອນເຕີເຣ ປະເທດແມັກຊິກ ໃນວັນທີ 8 ເມສາ ປະເພດຍິງດ່ຽວ ຮອບຊິງຊະນະເລີດ ຜົນປາກົດວ່າ: ກາບີເຢ ມູກູຣູຊາ ມື 1 ຂອງລາຍການຈາກສະເປນ ຕ້ອງອອກແຮງເຖິງ 3 ເຊັດ ໃຊ້ເວລາ 2 ຊົ່ວໂມງ 20 ນາທີ ກ່ອນຈະເອົາຊະນະ ທິເມຍ ບາບອສ ມື 4 ຂອງລາຍການຈາກຮົງກາລີ 2-1 ເຊັດ 3-6, 6-4, 6-3 ຄວ້າແຊ້ມໄປຄອງໄດ້ສຳເລັດ ໂດຍເສຍພຽງເຊັດດຽວຕະຫລອດການແຂ່ງຂັນ.
ຫລັງການແຂ່ງຂັນ ອະດີດແຊ້ມ ເຟຣນ ໂອເພັນ ເຊິ່ງຄວ້າແຊ້ມລະດັບດັບເບີ້ນຢູທີເອ ທົວ ເປັນລາຍການທີ 6 ໃນອາຊີບ ກ່າວວ່າ: ຂ້ອຍມີຄວາມສຸກຫລາຍທີ່ປິດທ້າຍລະດູການຢູ່ຮາດຄອດ ໂດຍການຄວ້າແຊ້ມ ມັນເປັນແຊ້ມທີ່ດີຫລາຍ ຈາກນີ້ໄປຂ້ອຍຮູ້ສຶກຕື່ນເຕັ້ນທີ່ຈະໄດ້ກັບເຂົ້າສູ່ລະດູການຢູ່ຄອດດິນ ເພາະມັນເປັນຄອດທີ່ຂ້ອຍລຶ້ງ.
