ລາວສຳເລັດການແຂ່ງຂັນສີມືແຮງງານແຫ່ງຊາດຄັ້ງທີ 3 ເລືອກໄດ້ 21 ຄົນ
ໃນລະຫວ່າງວັນທີ 26 ມີນາຫາ 5 ເມສາ 2018 ນີ້, ທີ່ນະຄອນຫລວງວຽງຈັນໄດ້ຈັດການແຂ່ງຂັນສີມືແຮງງານແຫ່ງຊາດຄັ້ງທີ 3 ຂຶ້ນ, ໂດຍການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເພື່ອເປັນເວທີທີ່ເປີດໂອກາດໃຫ້ຊາວໜຸ່ມ-ໄວໜຸ່ມ, ກຳມະກອນລາວບັນດາເຜົ່າໄດ້ສະແດງຄວາມຮູ້, ຄວາມສາມາດ, ທັກສະສີມື, ທັງເປັນການຊຸກຍູ້ສົ່ງເສີມເຂົາເຈົ້າເຫັນໄດ້ຄວາມສຳຄັນໃນການຝຶກວິຊາຊີບ ແລະ ການພັດທະນາສີມືແຮງງານຂອງຕົນ, ພ້ອມນັ້ນກໍ ເພື່ອຄັດເລືອກເອົານັກແຂ່ງຂັນຜູ້ໜຸ່ມນ້ອຍທີ່ມີສີມືດີເລີດໄປຝຶກຊ້ອມ ແລະ ເປັນຕົວແທນທີມຊາດລາວເຂົ້າຮ່ວມການແຂ່ງຂັນສີມືແຮງງານອາຊຽນຄັ້ງທີ 12 ຢູ່ປະເທດໄທ ທີ່ຈັດຂຶ້ນໃນທ້າຍເດືອນສິງຫາຫາຕົ້ນເດືອນກັນຍານີ້.
ການແຂ່ງຂັນດັ່ງກ່າວ, ມີນັກແຂ່ງຂັນ 66 ຄົນ, ຍິງ 14 ຄົນ, ມີ 7 ສາຂາຊ່າງ ແລະ ສາມາດຄັດເລືອກ 21 ຄົນ ເຊັ່ນ: ສາຂາວິຊາຊ່າງໄມ້ເຄື່ອງເຮືອນ ຫລຽນຄຳໄດ້ແກ່ທ້າວ ສີປະເສີດ ມາຈາກສູນພັດທະນາ ແລະ ທົດສອບສີມືແຮງງານເວດສະພົງ, ຫລຽນເງິນໄດ້ແກ່ທ້າວ ສົມຈັນ ບົວຄຳ ຈາກໂຮງງານປຸ່ງແຕ່ງໄມ້ສຳເລັດຮູບມູນເທວາ, ຫລຽນທອງແມ່ນທ້າວ ສົມສຸກ ສີສະຫວັດ ຈາກໂຮງານປຸງແຕ່ງໄມ້ສຳເລັດຮູບຄົບວົງຈອນ ທີເອັນເຄ ຫລວງພະບາງ, ສາຂາວິຊາຊ່າງກໍ່ ຫລຽນຄຳໄດ້ແກ່ທ້າວ ມີ ຂັນທະມາລີ ມາຈາກວິທະຍາໄລເຕັກນິກປາກປ່າສັກ, ຫລຽນເງິນແມ່ນທ້າວ ສີນວນ ເພັງສະຫວັດ ມາຈາກກຸ່ມດວງຈຳປາການກໍ່, ຫລຽນທອງແມ່ນທ້າວ ອຸ່ນສຸລິດ ບຸນນິວົງ ມາຈາກວິທະຍາໄລເຕັກນິກປາກປ່າສັກ, ສາຂາວິຊາຊ່າງຕິດຕັ້ງໄຟຟ້າໃນອາຄານໄດ້ຫລຽນຄຳໄດ້ແກ່ທ້າວ ສຸວັນໄຊ ແສງຈັນ ຈາກສະຖາບັນພັດທະນາສີມືແຮງງານລາວ-ເກົາຫລີ, ຫລຽນເງິນແມ່ນທ້າວ ໄມອ່ອນ ສົມບັດຈະເລີນ ຈາກສະຖາບັນພັດທະນາສີມືແຮງງານລາວ-ເກົາຫລີ ແລະ ຫລຽນທອງໄດ້ແກ່ທ້າວ ຈັນລະຄອນ ຈັນທະພອນ ຈາກວິທະຍາໄລເຕັກນິກວິຊາຊີບ ແຂວງຫລວງພະບາງ, ສ່ວນສາຂາວິຊາຊ່າງຫຍິບເຄື່ອງນຸ່ງຫລຽນຄຳໄດ້ແກ່ ນາງ ມະໄລພອນ ໄຊຍະວົງ ຈາກສູນພັດທະນາສີມືຕັດຫຍິບ, ຫລຽນເງິນ ແມ່ນນາງ ພຸດມີນາ ໄຊຈັນເພັງ ຈາກສູນພັດທະນາສີມືຕັດຫຍິບ, ຫລຽນທອງແມ່ນນາງ ບຸນມີ ພູດາລີ ຈາກວິທະຍາໄລເຕັກນິກປາກປ່າສັກ. ສາຂາວິຊາຊ່າງປຸງແຕ່ງອາຫານຫລຽນຄຳໄດ້ແກ່ນາງ ວັນເພັງ ຈັນທະວົງ ຈາກສະຖາບັນການທ່ອງທ່ຽວ ແລະ ການໂຮງແຮມແຫ່ງຊາດ, ຫລຽນເງິນແມ່ນທ້າວ ລັດຕະນະກຸນ ແກ້ວປະເສີດ ຈາກສະຖາບັນການທ່ອງທ່ຽວ ແລະ ການໂຮງແຮມແຫ່ງຊາດ, ຫລຽນທອງແມ່ນນາງ ວາດສະໜາ ພົງປະຈິດ ຈາກສະຖາບັນການທ່ອງທ່ຽວ ແລະ ການໂຮງແຮມແຫ່ງຊາດ. ສໍາລັບສາຂາວິຊາຊ່າງເຕັກໂນໂລຊີອອກແບບກຣາບຟິກຫລຽນຄຳໄດ້ແກ່ທ້າວ ຄຳເກີດ ຟານຄຳ ຈາກຄະນະວິສະວະກຳສາດມະຫາວິທະຍາໄລແຫ່ງຊາດ, ຫລຽນເງິນແມ່ນ ທ້າວ ປາຫວີດ ຈັນທະວົງ ຈາກຄະນະວິສະວະກຳສາດມະຫາວິທະຍາໄລແຫ່ງຊາດ, ຫລຽນທອງແມ່ນທ້າວ ສົມຊາຍ ສະວັນນະຮັກ ຈາກສູນພັດທະນາສີມືແຮງງານນະຄອນຫລວງວຽງຈັນ ແລະ ສາຂາວິຊາຊ່າງຈອດໂລຫະ ຫລຽນຄຳໄດ້ແກ່ທ້າວ ເມັ່ງຢ່າງ ແສງດາວ ຈາກວິທະຍາໄລເຕັກນິກລາວ-ເຢຍລະມັນ, ຫລຽນເງິນແມ່ນທ້າວ ພິດ ສຸນິກອນ ຈາກວິທະຍາໄລເຕັກນິກ-ວິຊາຊີບຫລວງພະບາງ ແລະ ຫລຽນທອງແມ່ນນາງ ພິນ ລໍວັນຄຳ ຈາກວິທະຍາໄລເຕັກນິກ-ວິຊາຊີບຫລວງພະບາງ.
ນັກແຂ່ງຂັນແຕ່ລະສາຂາຊ່າງທີ່ໄດ້ຫລຽນຄຳ, ຫລຽນເງິນ ແລະ ຫລຽນທອງ ແມ່ນໄດ້ຮັບເງິນສົດ 3 ລ້ານ, 2 ລ້ານ ແລະ 1 ລ້ານກີບ, ພ້ອມທັງໄດ້ຮັບໃບຢັ້ງຢືນການເຂົ້າຮ່ວມແຂ່ງຂັນສີມືແຮງງານແຫ່ງຊາດຄັ້ງທີ III.
