ເຈົ້າໜ້າທີ່ລົງກວດກາລາຄາສິນຄ້າໃນຕະຫລາດຕ່າງໆ
ວັນທີ 11 ເມສານີ້, ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ແລະ ເມືອງ ໄດ້ລົງກວດກາສິນຄ້າຕາມທ້ອງຕະຫລາດໃຫຍ່ຄື: ຕະຫລາດຂົວດິນ, ຕະຫລາດອົດຊີ, ຕະຫລາດໂພນຕ້ອງ ແລະ ອີກຫລາຍແຫ່ງຢູ່ ນະຄອນຫລວງວຽງຈັນ, ເພື່ອຮັບປະກັນບໍ່ໃຫ້ແມ່ຄ້າຊາວຂາຍສວຍໂອກາດຂຶ້ນລາຄາສິນຄ້າໂດຍລັງພັງໃນໄລຍະບຸນປີໃໝ່ນີ້.
ຫົວໜ້າຫ້ອງການພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ ໃຫ້ຮູ້ວ່າ: ໃນໄລຍະບຸນສົງການນີ້, ທາງພະແນກພວກເຮົາຈະໄດ້ເພີ່ມທະວີ ການຄຸ້ມຄອງລາຄາສິນຄ້າບໍ່ໃຫ້ມີການສວຍໂອກາດຂຶ້ນລາຄາຕາມລຳພັງ, ໃນນີ້ ໄດ້ອອກແຈ້ງການໃຫ້ທາງຈັດສັນຕະຫລາດແຫ່ງຕ່າງໆເອົາໃສ່ກວດກາຢ່າງເປັນປົກກະຕິ ແລະ ເນັ້ນໃຫ້ຕິດຕັ້ງຊິງກາງ ເພື່ອບໍ່ໃຫ້ມີໂອການລັກໂລບຕາຊິງດັ່ງເຄີຍມີມາ, ທັງນີ້ເພື່ອປົກປ້ອງຜູ້ຊົມໃຊ້ໄດ້ຮັບຄວາມຍຸຕິທຳ ແລະ ຜ່ານການລົງຕິດຕາມດັ່ງກ່າວເຫັນວ່າຕະຫລາດຕ່າງໆໄດ້ເປັນເຈົ້າການເອົາໃຈໃສ່ໃນການຄວບຄຸມຄາລາສິນຄ້າຕາມແຈ້ງການຂອງພະແນກອຸດສາຫະກຳ-ການຄ້າໄດ້ເປັນຢ່າງດີ, ແຕ່ກໍຍັງພົບວ່າມີຊາວຄ້າຂາຍຈຳນວນໜຶ່ງໄດ້ນຳເອົາສິນຄ້າໝົດອາຍຸ ແລະ ອາຫານທະເລທີ່ມີສານເຈືອປົນມາວາງຂາຍ, ຊຶ່ງທາງເຈົ້າໜ້າທີ່ກໍໄດ້ຍຶດ ແລະ ປັບໃໝຕາມລະບຽບ, ແຕ່ແນວໃດກໍດີ, ສຳລັບການຕິດຕາມຄຸ້ມຄອງລາຄາສິນຄ້າໃນໄລຍະບຸນສົງການນີ້, ພວກເຮົາຈະໄດ້ລົງກວດກາເປັນປະຈຳ, ພ້ອມນັ້ນ ກໍໄດ້ເປີດສາຍດ່ວນ 1625 ສຳລັບຜູ້ທີ່ພົບເຫັນການສວຍໂອກາດຂຶ້ນລາຄາສິນຄ້າ ຫລື ໂກງຕາຊິງ ສາມາດໂທໄດ້ທຸກເວລາ, ເພື່ອຄວາມເປັນລະບຽບຮຽບຮ້ອຍ ແລະ ຍຸຕິທຳ.
