ມີຄວາມຮັກໂດຍບໍ່ເປັນທຸກ

ມີຄວາມຮັກໂດຍບໍ່ເປັນທຸກ - 022304 2018 - ມີຄວາມຮັກໂດຍບໍ່ເປັນທຸກ
ມີຄວາມຮັກໂດຍບໍ່ເປັນທຸກ - Untitled design - ມີຄວາມຮັກໂດຍບໍ່ເປັນທຸກ

ຄວາມສຸກຄວາມສຳພັນອັນເລິກເຊິ່ງຂອງຄູ່ຮັກ ເມື່ອຄູ່ຮັກຄົບຫາເບິ່ງໃຈກັນຕ່າງຝ່າຍກໍຢາກມີຄວາມສຸກ, ແຕ່ຫາກຄວາມຮັກກາຍເປັນຄວາມທຸກ ຄວາມສຸກທາງໃຈກໍຄົງຈະບໍ່ມີ. ດັ່ງນັ້ນ, ເຮົາຈຶ່ງຄວນຮຽນຮູ້ເຖິງການຈະຮັກຢ່າງຖືກວິທີ ແລະ ຮັກແນວໃດບໍ່ໃຫ້ເປັນທຸກ.

  1. ຄວນມີຄວາມສຸກໄດ້ດ້ວຍຕົນເອງ ຄົນອື່ນເປັນພຽງໂບນັດທີ່ເພີ່ມເຂົ້າມາ.
  2. ຄວນປາຖະໜາໃຫ້ຜູ້ອື່ນມີຄວາມສຸກນຳ ບໍ່ແມ່ນຄິດເຖິງແຕ່ຄວາມສຸກຂອງເຮົາ ເຊັ່ນ : ເມື່ອຄົນທີ່ເຮົາຮັກບໍ່ຮັກເຮົາ, ແຕ່ເຂົາມີຄວາມສຸກຂອງເຂົາ ເຖິງເຮົາຈະໂສກເສົ້າເສຍໃຈກໍຍັງຄິດໄດ້ວ່າຢ່າງໜ້ອຍກໍໄດ້ເຫັນຄົນທີ່ເຮົາຮັກມີຄວາມສຸກ.
  3. ຫລຸດຄວາມຄາດຫວັງ ເຖິງວ່າເຮົາຈະເປັນຄົນທຳມະດາ ເຊິ່ງຄົງຈະຕັດຄວາມຄາດຫວັງບໍ່ໄດ້, ແຕ່ຖ້າເຮົາຍິ່ງຄາດຫວັງຈາກເຂົາໜ້ອຍ ໂອກາດທີ່ເຮົາຈະສົມຫວັງກໍຍິ່ງມີຫລາຍຂຶ້ນ.
  4. ຍອມຮັບຄວາມແຕກຕ່າງ ທັງດ້ານຮູບຮ່າງ ແລະ ຄວາມຄິດຂອງຜູ້ອື່ນ, ຄວາມຄິດບໍ່ກົງກັນນັ້ນ ຖືເປັນເລື່ອງທຳມະຊາດ ຫາກຝ່າຍໜຶ່ງບໍ່ພະຍາຍາມເຮັດໃຫ້ອີກຝ່າຍໜຶ່ງຄິດຄືກັນ ແລະ ພະຍາຍາມເຂົ້າໃຈວ່າຍ້ອນຫຍັງຈຶ່ງຄິດຕ່າງກັນ ບັນຫາກໍຈະບໍ່ເກີດ, ຫາກເຂົ້າໃຈ ແລະ ຍອມຮັບໄດ້ແລ້ວ ເມື່ອເຫັນເຂົາເຮັດໂຕບໍ່ຖືກໃຈ, ບໍ່ໜ້າຮັກ, ມັກຈົ່ມ, ໃຈຮ້ອນ ເຮົາກໍປັບໂຕໃຫ້ເຂົ້າກັບເຂົາ ແລະ ມອບຄວາມຮັກໃຫ້ໄດ້ງ່າຍຂຶ້ນ.
  5. ຮູ້ຈັກຍອມຮັບຄວາມປ່ຽນແປງຕ່າງໆ ຄວາມຮັກຈຶ່ງຈະຍືນຍາວ ເພາະຄວາມປ່ຽນແປງເປັນທຳມະດາຂອງໂລກ, ເພງມັກຟັງຊຳ້ໆ, ອາຫານຈານມັກກິນຕະຫລອດກໍເບື່ອ, ຄວາມຮັກທີ່ເຄີຍສົດໃສອາດຈືດຈາງລົງ,​ ແຕ່ຍັງຄົງຄວາມຜູກພັນ ແລະ ສຳພັນອັນດີ ຫລື ເຖິງຈະເລີກລາຢ່າຮ້າງບາງຄູ່ກໍຍັງເປັນໝູ່ຮູ້ໃຈຕໍ່ກັນໄດ້.
  6. ບໍ່ຄວນເຮັດແຕ່ສິ່ງທີ່ໂຕເອງມັກ ຫລື ສິ່ງທີ່ຕົນເອງຄິດວ່າດີໃຫ້ຄົນອື່ນພຽງຢ່າງດຽວ ຈະຕ້ອງເບິ່ງເຖິງຄວາມຕ້ອງການຂອງເຂົານຳ ຈະໄດ້ບໍ່ຕ້ອງມານ້ອຍໃຈວ່າເຮົາອົດສາຫວັງດີ, ຍອມອິດເມື່ອຍເຮັດເພື່ອເຂົາ, ແຕ່ເຂົາຊຳ້ພັດບໍ່ເຫັນຄຸນຄ່າ.
  7. ຄວາມເກງໃຈ ເປັນອົງປະກອບສຳຄັນ ຄວນເອົາໃຈເຂົາມາໃສ່ໃຈເຮົາ ເພາະຄົນໃກ້ຊິດສະໜິດກັນ ມັກຄິດວ່າຈະສາມາດເຮັດຫຍັງຕາມໃຈໂຕເອງໄດ້ເກືອບທຸກເລື່ອງ ຈົນລືມຄິດເຖິງຄວາມຮູ້ສຶກຂອງອີກຄົນໜຶ່ງໄປ.
  8. ເວົ້າຈາຍ້ອງຍໍຊົມເຊີຍໃນສິ່ງທີ່ດີຂອງກັນ ແລະ ກັນ ເປັນອີກໜຶ່ງວິທີມອບຄວາມຮັກທີ່ຄວນຈະເຮັດ, ບາງຄົນເບິ່ງຂ້າມວ່າຢູ່ນຳກັນມາດົນ ເລື່ອງດີເຂົາຮູ້ຢູ່ແລ້ວບໍ່ຕ້ອງຍ້ອງ ຈຶ່ງເມົາແຕ່ເວົ້າເຖິງສິ່ງບໍ່ດີ ຫລື ຢາກໃຫ້ຝ່າຍກົງຂ້າມປ່ຽນແປງ, ມີແຕ່ຈົ່ມໂດຍບໍ່ເຄີຍຍ້ອງ ຄົນຟັງກໍທໍ້ໃຈຄືກັນ.
  9. ການສະແດງອອກຂອງຄວາມຮັກ ຖ້າຮັກແລ້ວບໍ່ສະແດງອອກເລີຍ ອີກຝ່າຍໜຶ່ງຄົງບໍ່ຮູ້ ເພາະເຂົາບໍ່ມີຕາທິບ,​ ແຕ່ການສະແດງຄວາມຮູ້ສຶກເທົ່າໃດ ແນວໃດຄົງຕ້ອງເບິ່ງວ່າເປັນສິ່ງທີ່ອີກຝ່າຍຕ້ອງການ. ສ່ວນຄວາມຕ້ອງການຂອງເຮົາກໍຄວນບອກໂດຍກົງ ບໍ່ແມ່ນຄາດຫວັງໃຫ້ຄູ່ຂອງເຮົານັ້ນເປັນໝໍມໍເດົາໃຈເຮົາເອາເອງ.

ແລະ ຖ້າຈະຮັກໃຫ້ດີຕໍ່ສຸຂະພາບຈິດ ທຸກໆຄົນຄວນຄິດໃຫ້ຄວາມຮັກເປັນດອກໄມ້ງົດງາມ, ເປັນຂອງຫວານສຳລັບຊີວິດ, ຢ່າຍຶດຕິດວ່າເປັນທຸກສິ່ງທຸກຢ່າງ, ຢ່າຄິດວ່າຮັກເປັນສິ່ງຂອງ,  ອາຫານ ຫລື ອາກາດທີ່ຂາດບໍ່ໄດ້. ຢາກໃຫ້ຄົນທີ່ມີຄວາມທຸກຍ້ອນຄວາມຮັກຄິດນຳວ່າກ່ອນທີ່ຈະມາພົບຄົນຮັກ ຍັງມີພໍ່ແມ່ພີ່ນ້ອງໝູ່ຄູ່ ແລະ ຄົນອື່ນອີກຫລາຍທີ່ເຮົາຮັກ ແລະ ຮັກເຮົາ ຢ່າໃຫ້ຄົນພຽງຄົນດຽວເປັນທຸກສິ່ງທຸກຢ່າງ ແລ້ວປ່ອຍໃຫ້ເກີດເຫດການອັນຕະລາຍຮ້າຍແຮງຕໍ່ຮ່າງກາຍ ແລະ ຊີວິດ. ສະຫລຸບແລ້ວການຈະຮັກໃຜຄວນຮັກຢ່າງມີສະຕິ ບໍ່ທຸ້ມເທຈົນໝົດໂຕ ແລະ ຄວນເຜື່ອໃຈໃຫ້ກັບໂຕເອງ, ຄອບຄົວ ແລະ ໝູ່ ເພາະຫາກເກີດພາດພັ້ງ ຄອບຄົວ ແລະ ຄົນໃກ້ຊິດມີສ່ວນສຳລັບຄົນທີ່ຈະດູແລ ຫລື ເຕືອນສະຕິບໍ່ໃຫ້ຜູ້ຜິດຫວັງໃນຄວາມຮັກກະທຳເລື່ອງທີ່ຈະເສຍໃຈໃນອະນາຄົດໄດ້ ເທົ່ານີ້ທ່ານກໍຈະມີຄວາມຮັກທີ່ດີຕໍ່ສຸຂະພາບຮ່າງກາຍແລະຈິດໃຈແລ້ວ.

ມີຄວາມຮັກໂດຍບໍ່ເປັນທຸກ - Wave100S AD to Website 2020 0 - ມີຄວາມຮັກໂດຍບໍ່ເປັນທຸກ
ມີຄວາມຮັກໂດຍບໍ່ເປັນທຸກ - WhatsApp Image 2020 05 27 at 5 - ມີຄວາມຮັກໂດຍບໍ່ເປັນທຸກ
ມີຄວາມຮັກໂດຍບໍ່ເປັນທຸກ - WhatsApp Image 2020 05 27 at 5 - ມີຄວາມຮັກໂດຍບໍ່ເປັນທຸກ
error: Alert: ເນື້ອຫາຂ່າວມີລິຂະສິດ !!