ປ່ອງຢ້ຽມເຮືອບິນແອອິນເດຍ ຫລຸດກາງອາກາດ
ຜູ້ໂດຍສານສາຍການບິນແອອິນເດຍລຸ້ນລະທຶກ ຫລັງປ່ອງຢ້ຽມໃນຫ້ອງໂດຍສານຫລຸດລະຫວ່າງເຮືອບິນກຳລັງໃຫ້ບໍລິການຢູ່ເທິງຟ້າ, ເບື້ອງຕົ້ນ ມີຜູ້ບາດເຈັບ 3 ຄົນ.
https://www.youtube.com/watch?v=8HoPjvbE9MI
ວິນາທີລະທຶກຂະນະທີ່ພະນັກງານຕ້ອນຮັບຢູ່ເຮືອບິນພະຍາຍາມສ້ອມແປງປ່ອງຢ້ຽມຂອງເຮືອບິນສາຍການບິນອິນເດຍທີ່ຫລຸດອອກມາລະຫວ່າງທີ່ເຮືອບິນໂບອິ້ງລຳນີ້ກຳລັງບິນຢູ່ໃນຄວາມສູງ 1 ໝື່ນ 5 ພັນຟຸດ. ເລື່ອງນີ້ສ້າງຄວາມຕົກໃຈໃຫ້ຜູ້ໂດຍສານ 240 ກວ່າຊີວິດທີ່ຮ່ວມຊະຕາກຳໃນເຮືອບິນທີ່ມີຊິ້ນສ່ວນພາຍໃນຫ້ອງໂດຍສານຫລຸດອອກມາ, ມີລາຍງານວ່າມີຜູ້ໂດຍສານໄດ້ຮັບບາດເຈັບ 3 ຄົນ ຂະນະທີ່ພະນັກງານຕ້ອນຮັບພະຍາຍາມປອບຂວັນຜູ້ໂດຍສານທີ່ນັ່ງບ່ອນປ່ອງຢ້ຽມຫລຸດໃຫ້ຮູ້ສຶກດີຂຶ້ນ.
ເບື້ອງຕົ້ນ ທາງໜ່ວຍງານທີ່ຮັບຜິດຊອບເລື່ອງການບິນກຳລັງຢູ່ລະຫວ່າງການສອບສວນຫາສາເຫດໃນຄັ້ງນີ້ ເຊິ່ງມີລາຍງານວ່າ ຖ້ຽວບິນລຳນີ້ບິນຈາກເມືອງອະມະລິດສາໄປນະຄອນຫລວງນິວເດລີ ໃຊ້ເວລາໃນການບິນ 30 ນາທີ, ແຕ່ລະຫວ່າງທີ່ນັກບິນນຳເຮືອບິນເຫີນຟ້ານັ້ນ ມີເຫດສະພາບອາກາດແປປວນເຖິງ 15 ນາທີ ເຊິ່ງເຈົ້າໜ້າທີ່ຈະສອບສວນວ່າກ່ຽວຂ້ອງກັບການເຮັດໃຫ້ຊິ້ນສ່ວນເຮືອບິນຫລຸດ ຫລື ບໍ່.
