ລັດຖະບານຫາລືຫລາຍບັນຫາສໍາຄັນຂອງຊາດ

- 33333 - ລັດຖະບານຫາລືຫລາຍບັນຫາສໍາຄັນຂອງຊາດ
- Untitled design - ລັດຖະບານຫາລືຫລາຍບັນຫາສໍາຄັນຂອງຊາດ

ກອງປະຊຸມລັດຖະບານປະຈໍາເດືອນເມສາ 2018 ໄດ້ຈັດຂຶ້ນໃນວັນທີ 23-24 ນີ້, ພາຍໃຕ້ການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ແລະ ໄດ້ຮັບຮອງເອົາເອກະສານສໍາຄັນຄື: ບົດລາຍງານກ່ຽວກັບສະພາບພົ້ນເດັ່ນໃນພາກພື້ນ ແລະ ສາກົນ ແລະ ສະພາບພົ້ນເດັ່ນພາຍໃນປະເທດ. ບົດລາຍງານການກະກຽມອອກວິຊາແບບທັນສະໄໝ (E-VISA). ບົດລາຍງານແຫ່ງຊາດປະຈໍາໄລຍະ 2-3 ຂອງການຈັດຕັ້ງປະຕິບັດອະນຸສັນຍາກ່ຽວກັບການເຂົ້າຮ່ວມຂອງເດັກໃນການປະທະກັນດ້ວຍກໍາລັງປະກອບອາວຸດ ແລະ ອະນຸສັນຍາກ່ຽວກັບຄ້າເດັກ, ການຄ້າປະເວນີເດັກ ແລະ ສິ່ງລາມົກອະນາຈານກ່ຽວກັບເດັກ.

ບົດລາຍງານຄວາມຄືບໜ້າ ແລະ ຄວາມພ້ອມໃນການກະກຽມກອງປະຊຸມໂຕະມົນຂອງຄະນະຊີ້ນໍາລະດັບຊາດປະຈໍາປີ 2018. ບົດງາຍງານຜົນການສໍາຫລວດການນໍາໃຊ້ຄູ. ບົດລາຍງານຄວາມຄືບໜ້າການກະກຽມບັນດາກົດໝາຍທີ່ຈະສະເໜີສະພາແຫ່ງຊາດພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ໃນເດືອນມິຖຸນາ 2018.

ກອງປະຊຸມຄັ້ງນີ້, ທ່ານນາຍົກລັດຖະມົນຕີ ໄດ້ຍົກໃຫ້ເຫັນສະພາບພົ້ນເດັ່ນ ຂອງການຈັດຕັ້ງປະຕິບັດວຽກງານຈຸດສຸມໃນເດືອນເມສາວ່າ: ພາກສ່ວນກ່ຽວຂ້ອງຕ່າງໆ ໄດ້ສືບຕໍ່ແກ້ໄຂປະກົດການຫຍໍ້ທໍ້ຕ່າງໆຂອງສັງຄົມ, ໂດຍສະເພາະບັນຫາອຸປະຕິເຫດຕາມທ້ອງຖະໜົນ, ຢາເສບຕິດ ແລະ ອັກຄີໄພ, ພິເສດໄດ້ເອົາໃຈໃສ່ວຽກງານຄຸ້ມຄອງ ແລະ ກວດກາຄວາມເປັນລະບຽບຮຽບຮ້ອຍໃນສັງຄົມ ແລະ ການຄຸ້ມຄອງລາຄາສິນຄ້າ ລວມເຖິງຄ່າບໍລິການໃນຊ່ວງໄລຍະບຸນປີໃໝ່ລາວ, ອັນໄດ້ເຮັດໃຫ້ສະພາບອຸປະຕິເຫດ ແລະ ການສວຍໂອກາດຂຶ້ນລາຄາສິນຄ້າໃນໄລຍະດັ່ງກ່າວມີຄວາມສະຫງົບຫລາຍເມື່ອທຽບໃສ່ປີຜ່ານມາ. ໄດ້ເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າ ແລະ ສົ່ງເສີມປີທ່ອງທ່ຽວລາວຜ່ານຫລາຍກິດຈະກໍາ ເປັນຕົ້ນ: ການເປີດປີທ່ອງທ່ຽວລາວຢູ່ແຂວງຫລວງພະບາງ, ພ້ອມກັບການປະກາດເມືອງຫລວງພະບາງເປັນນະຄອນຫລວງພະບາງ, ການໂຄສະນາ ແລະ ຈັດກິດຈະກຳສົ່ງເສີມຄົນລາວທ່ຽວເມືອງລາວຜ່ານສື່ຕ່າງໆ, ການຈັດງານສົ່ງເສີມກາເຟລາວ, ງານສີມືຫັດຖະກຳລາວ, ງານສະເຫລີມສະຫລອງການຮັບຮອງເອົາສຽງແຄນເຊື້ອຊາດລາວເປັນມໍລະດົກໂລກ ແລະ ວຽກງານອື່ນໆ. ໄດ້ດໍາເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອພິຈາລະນາຫລາຍບັນຫາທີ່ສໍາຄັນ ເປັນຕົ້ນ: ການເລັ່ງປັບປຸງລັດວິສາຫະກິດການບິນລາວ, ການພິຈາລະນາທາງເລືອກເພື່ອເຂົ້າຫາແຫລ່ງທຶນຊົດເຊີຍປະຊາຊົນທີ່ໄດ້ຮັບຜົນກະທົບຈາກໂຄງ ການກໍ່ສ້າງເສັ້ນທາງລົດໄຟລາວ-ຈີນ, ຜົນການກວດກາການຂຸດຄົ້ນ ແລະ ສົ່ງອອກຫີນປາໂກໄດ, ການປັບຂຶ້ນຄ່າແຮງງານຂັ້ນຕ່ຳຂອງຜູ້ອອກແຮງງານ. ໄດ້ພິຈາລະນາ ແລະ ອອກນິຕິກໍາລຸ່ມກົດໝາຍຈໍານວນໜື່ງ ເປັນຕົ້ນແມ່ນດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງນະຄອນ, ດໍາລັດວ່າດ້ວຍການສ້າງຕັ້ງນະຄອນ (ນະຄອນຫລວງພະບາງ, ນະຄອນໄກສອນພົມວິຫານ ແລະ ນະຄອນປາກເຊ) ແລະ ແກ້ໄຂຄໍາສະເໜີຂອງບັນດາຂະແໜງການ, ທ້ອງຖິ່ນ, ນິຕິບຸກຄົນ ແລະ ບຸກຄົນ, ເຊິ່ງໄດ້ອອກເປັນແຈ້ງການທັງໝົດ 128 ສະບັບ, ນອກນີ້ທ່ານນາຍົກ-ຮອງນາຍົກ ແລະ ສະມາຊີກລັດຖະບານ ກໍໄດ້ລົງຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຈັດເກັບລາຍຮັບຢູ່ໃນຫລາຍທ້ອງຖິ່ນໃຫ້ມີຜົນສໍາເລັດຕາມຄາດໝາຍວາງໄວ້.

- Wave100S AD to Website 2020 0 - ລັດຖະບານຫາລືຫລາຍບັນຫາສໍາຄັນຂອງຊາດ
- WhatsApp Image 2020 05 27 at 5 - ລັດຖະບານຫາລືຫລາຍບັນຫາສໍາຄັນຂອງຊາດ
- WhatsApp Image 2020 05 27 at 5 - ລັດຖະບານຫາລືຫລາຍບັນຫາສໍາຄັນຂອງຊາດ
error: Alert: ເນື້ອຫາຂ່າວມີລິຂະສິດ !!