ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ

- china - ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ
- Untitled design - ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ

  ຄຳເຫັນຂອງທ່ານ ຫວາງ ເຫວິນທ່ຽນ ເອກອັກຄະລັດຖະທູດແຫ່ງ ສປຈີນ ປະຈຳລາວ ເນື່ອງໃນໂອກາດລະນຶກວັນສ້າງຕັ້ງສາຍພົວພັນການທູດຈີນ-ລາວ ຄົບຮອບ 57 ປີ (25 ເມສາ 1961-25 ເມສາ 2018).

ວັນທີ 25 ເມສາ 1961 ຖືເປັນວັນໜຶ່ງທີ່ໜ້າ ຈາລຶກໄວ້ໃນ ປະຫວັດສາດການພົວພັນລະຫວ່າງສອງປະເທດຈີນ-ລາວ, ຊຶ່ງເປັນມື້ທີ່ການນໍາສອງປະເທດໄດ້ຕົກລົງຄັ້ງປະຫວັດສາດດ້ວຍສາຍຕາຍຸດທະສາດອັນຍາວໄກ ແລະ ສະຕິປັນຍາທາງການເມືອງທີ່ໂດດເດັ່ນ, ເພື່ອສ້າງການພົວພັນທາງການທູດ ອັນໄດ້ໄຂສັງກາດໃໝ່ແຫ່ງມິດຕະພາບ ແລະ ການໄປມາຫາສູ່ກັນລະຫວ່າງປະຊາຊົນສອງປະເທດ. ຕະຫລອດໄລຍະ 57 ປີມານີ້, ມິດຕະພາບອັນເປັນມູນເຊື້ອລະຫວ່າງຈີນ-ລາວ ໄດ້ຜ່ານການທົດສອບແຫ່ງການປ່ຽນແປງຂອງຍຸກສະໄໝ ແລະ ການປ່ຽນແປງຂອງສະຖານະການໂລກ, ຜູກພັນກັນດ້ວຍຄວາມຈິງໃຈຊ່ວຍຊູຍູ້ໜູນຊຶ່ງກັນ ແລະ ກັນ, ໄດ້ສ້າງເປັນແບບຢ່າງຖານບ້ານໃກ້ເຮືອນຄຽງທີ່ດີຕໍ່ກັນທີ່ຕ່າງຝ່າຍຕ່າງໄດ້ຮັບຜົນປະໂຫຍດຕົວຈິງ. ປັດຈຸບັນ, ການພົວພັນຈີນ-ລາວ ພວມຢູ່ໃນໄລຍະດີທີ່ສຸດໃນປະຫວັດສາດ, ໄດ້ຈໍ່ຕົວເປັນສະຖານະການພັດທະນາຢ່າງຮອບດ້ານ, ໃນຫລາຍລະດັບ ແລະ ຫລາຍຂົງເຂດທີ່ກວ້າງຂວາງ.
ຄວາມໄວ້ເນື້ອເຊື່ອໃຈຊຶ່ງກັນ ແລະ ກັນທາງການເມືອງ ໄດ້ຍົກສູງຂຶ້ນເລື້ອຍໆ. ຈີນ-ລາວ ເປັນປະເທດເດີນຕາມສັງຄົມນິຍົມ ທີ່ນຳພາໂດຍພັກກອມມູນິດ, ມີອຸດົມການອັນດຽວກັນ, ເສັ້ນທາງພັດທະນາກໍຄ້າຍຄືກັນ, ອະນາຄົດ ແລະ ຊະຕາກຳມີການຜູກພັນກັນ. ການນຳສອງພັກ ແລະ ລັດຖະບານສອງປະເທດ ໄດ້ຮັກສາການພົວພັນແບບສະນິດແໜ້ນ, ໄດ້ກຳກັບສະພາບແຫ່ງການພົວພັນຈີນ-ລາວ ຈາກຄວາມສູງຍຸດທະສາດຕະຫລອດມາ ແລະ ໄດ້ວາງແຜນໃຫ້ແກ່ການພັດທະນາການພົວພັນສອງປະເທດໃນອະນາຄົດ.

ເດືອນພະຈິກ 2017 ຜ່ານມາ, ທ່ານ ສີ ຈິ້ນຜິງ ເລຂາທິການໃຫຍ່ສູນກາງພັກກອມມູນິດ, ປະທານປະເທດແຫ່ງ ສປຈີນ ໄດ້ຢ້ຽມຢາມ ສປປ ລາວ ຢ່າງ ສຳເລັດຜົນ, ໄດ້ຮ່ວມກັບທ່ານ ບຸນຍັງ ວໍລະຈິດ ເລຂາທິການໃຫຍ່ສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ໄດ້ວາງແຜນອັນ ຍິ່ງໃຫຍ່ແຫ່ງການພັດທະນາການພົວພັນຈີນ-ລາວໃນຍຸກໃໝ່, ເປັນເອກກະສັນກັນເຫັນດີສ້າງປະຊາຄົມຮ່ວມຊາຕາກຳຈີນ-ລາວທີ່ມີຄວາມໝາຍຍຸດທະສາດຢ່າງໝັ້ນແກ່ນ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວ ທີ່ ໄວ້ເນື້ອເຊື່ອໃຈກັນ, ຊ່ວຍເຫລືອຊຶ່ງກັນ ແລະ ກັນ ແລະ ໄດ້ຮັບຜົນປະໂຫຍດຮ່ວມກັນຂຶ້ນສູ່ລະດັບສູງໃໝ່.
ການເຊື່ອມຕໍ່ກັນດ້ານຍຸດທະສາດນັບມື້ເພີ່ມທະວີຂຶ້ນ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນ ແລະ ຍຸດທະສາດ “ຫັນຈາກປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມຕໍ່ກັບບັນດາປະເທດອາຊຽນ” ຂອງລາວ ມີລັກສະນະ ຄ້າຍຄືກັນ, ການນຳສອງປະເທດເຫັນດີຖືເສັ້ນລົດໄຟຈີນ-ລາວ ເປັນພື້ນຖານ, ຮ່ວມກັນສ້າງລະບຽງເສດຖະກິດຈີນ-ລາວ ທີ່ທາງພາກເໜືອໂດຍເລີ່ມຈາກແຂວງຢຸນນານຈີນລົງໄປເຖິງພາກໃຕ້ຂອງລາວ.

ປັດຈຸບັນ, ໂຄງການເສັ້ນທາງລົດໄຟຈີນ-ລາວ ພວມດຳເນີນໄປຢ່າງສະ ດວກ, ໂຄງການດາວທຽມຈີນ-ລາວ ໄດ້ຢູ່ໃນໄລຍະໝູນເດີນ ແລະ ຄຸ້ມຄອງບໍລິຫານ ແລະ ໄດ້ເປີດການບໍລິການດ້ານໂທລະຄົມດາວທຽມ, ໂທລະພາບດາວທຽມ ແລະ ໂທລະຄົມມະນາຄົມທາງໜ້າດິນ, ໂຄງການເຂື່ອນໄຟຟ້ານໍ້າຕົກ ແລະ ໂຄງການສາຍສົ່ງໄຟຟ້າຫລາຍໂຄງການພວມດໍາເນີນການກໍ່ສ້າງຢູ່, ອັນໄດ້ຜ່ອນຄາຍບັນຫາຂາດເຂີນພະລັງໄຟຟ້າຂອງລາວ, ພວມຊ່ວຍປະເທດລາວບັນລຸເປົ້າໝາຍພັດທະນາທີ່ຖືເອົາການຜະລິດພະລັງງານໄຟຟ້າເປັນພື້ນຖານໃນການພັດທະນາເສດຖະກິດແຫ່ງຊາດ. ການສ້າງສາເຂດຮ່ວມມືເສດຖະ ກິດບໍ່ຫານ-ບໍ່ເຕັນ ແລະ ເຂດພັດທະນາໄຊເສດຖາວຽງຈັນ ພວມກ້າວໄປໜ້າຢ່າງໜັກແໜ້ນ, ຊຶ່ງວິສາຫະກິດ ແລະ ອົງການຈັດຕັ້ງຫລາຍແຫ່ງໄດ້ເຂົ້າປະຈຳຢູ່ໃນເຂດດັ່ງກ່າວ, ອັນໄດ້ຊ່ວຍປະເທດລາວບັນລຸການຍົກລະດັບຫລາຍຂະແໜງການ, ດຶງດູດທຶນຕ່າງປະເທດ, ຊຸກຍູ້ການປະກອບອາຊີບ ແລະ ນຳພາວິສາຫະກິດຂະໜາດນ້ອຍ ແລະ ກາງພັດທະນາໄປ.

ປັດຈຸບັນ, ພາກສ່ວນຕ່າງໆຂອງສອງປະເທດ ພວມເລັ່ງລັດການຜັນຂະຫຍາຍ ຄວາມຮັບຮູ້ທີ່ເປັນເອກະພາບກັນຂອງການນຳສອງປະເທດ, ບັນລຸການພັດທະນາແບບຕ່າງຝ່າຍຕ່າງໄດ້ຮັບຜົນປະໂຫຍດ, ຈາກການເພີ່ມທະວີການເຊື່ອມຈອດກັນດ້ານຍຸດທະສາດ.
ການຮ່ວມມືຢ່າງຕິດແທດຕົວຈິງສືບຕໍ່ລົງເລິກໄປ, ການຮ່ວມມືຢ່າງຕິດແທດຕົວຈິງລະຫວ່າງຈີນ-ລາວ ໄດ້ຢຶດໝັ້ນຫລັກການສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດຕະຫລອດມາ, ຈີນຊົມເຊີຍລາວທີ່ໄດ້ຮັບໂອກາດພັດທະນາ ໄປຄຽງຄູ່ກັບການພັດທະນາເສດຖະກິດຢ່າງວ່ອງໄວຂອງຈີນ. ປັດຈຸບັນ, ຈີນໄດ້ກາຍເປັນປະເທດລົງທຶນຫລາຍທີ່ສຸດ ແລະ ເປັນຄູ່ການຄ້າໃຫຍ່ອັນດັບ 2 ຂອງລາວ.

ປີ 2017 ການຄ້າລະຫວ່າງສອງຝ່າຍບັນລຸ 3 ຕື້ 2 ແສນໂດລາສະຫະລັດ, ເພີ່ມຂຶ້ນຫລາຍກວ່າປີ 2016 ເຖິງ 28,6%, ອັດຕາເພີ່ມເປັນທີ 2 ໃນບັນດາປະເທດອາຊຽນ, ການຄ້າຂາອອກໄປຈີນຂອງສິນຄ້າລາວກໍເພີ່ມຂຶ້ນເລື້ອຍໆ, ເຂົ້າສານ, ກາເຟ, ກ້ວຍ, ໝາກໂມ ແລະ ຜະລິດຕະພັນກະສິກຳທີ່ປອດສານພິດຕ່າງໆໄດ້ວາງຂາຍຢູ່ໃນຊຸບເປີມາເກັດ ແລະ ຮ້ານຄ້າທາງອິນເຕີເນັດຂອງຈີນ. ການລົງທຶນໂດຍກົງທີ່ບໍ່ແມ່ນປະເພດການທະນາຄານຂອງຈີນຕໍ່ລາວບັນລຸ 1 ຕື້ 380 ລ້ານໂດລາສະຫະລັດ, ເພີ່ມຂຶ້ນຫລາຍກວ່າໄລຍະດຽວກັນ 139,1% ເພີ່ມເປັນອັນດັບ1 ໃນອາຊຽນ.

- Wave100S AD to Website 2020 0 - ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ

ປັດຈຸບັນ, ຈີນລົງທຶນໂດຍກົງຢູ່ລາວລວມມີມູນຄ່າກວ່າ 6 ຕື້ 100 ລ້ານໂດລາສະຫະລັດ, ອັນໄດ້ຊຸກຍູ້ຂະແໜງການພະລັງງານໄຟຟ້ານ້ຳຕົກ, ບໍ່ແຮ່, ການບໍລິການ, ການຄ້າ ແລະ ຂະແໜງການອື່ນໆພັດທະນາຢ່າງໃຫຍ່ຫລວງ, ຈີນຍັງໄດ້ເພີ່ມທະວີການຊ່ວຍເຫລືອດ້ານເສດຖະກິດຕໍ່ປະເທດລາວ.

ໃນຫລາຍປີມໍ່ໆມານີ້, ໄດ້ສ້າງໂຄງການຊ່ວຍເຫລືອຊີວິດການເປັນຢູ່ຂອງປະຊາຊົນຈຳນວນໜຶ່ງ ເຊັ່ນ: ໂຮງໝໍ, ເສັ້ນທາງ, ໂຮງຮຽນ ແລະ ອື່ນໆ, ອັນໄດ້ ຊຸກຍູ້ການພັດທະນາເສດຖະກິດ-ສັງຄົມຂອງປະເທດລາວ.
ການແລກປ່ຽນດ້ານບຸກຄະລາກອນ ແລະ ວັດທະນະທຳ ມີຄວາມແໜ້ນແຟ້ນຂຶ້ນຕື່ມ. ຈີນ-ລາວ ມີພູຜາສາຍນ້ຳຕິດຈອດກັນ, ແມ່ນໍ້າລ້ານຊ້າງ-ແມ່ນ້ຳຂອງ ໄດ້ຮັດແໜ້ນການພັວພັນລະຫວ່າງປະຊາຊົນສອງປະເທດ, ປັດຈຸບັນ ຢູ່ລະຫວ່າງຈີນ-ລາວ ມີເສັ້ນທາງການບິນ 10 ເສັ້ນ, ແຕ່ລະອາທິດມີຖ້ຽວບິນໄປມາຫາກັນ 69 ຖ້ຽວ, ນັກທ່ອງທ່ຽວຈີນມາທ່ຽວລາວເພີ່ມຂຶ້ນທຸກປີ ແລະ ໃນປີ2017 ຜ່ານມານີ້ບັນລຸເຖິງ 7 ແສນ 6 ໝື່ນຄົນ. ຈີນໄດ້ກາຍເປັນປະເທດທີ່ເລືອກກ່ອນໝູ່ສຳລັບນັກສຶກສາລາວໄປຮຽນຢູ່ຕ່າງປະເທດ, ນັບມາຮອດປີ 2017 ນັກສຶກສາລາວຮຽນຢູ່ຈີນທີ່ໄດ້ຮັບທຶນສຶກສາຈາກລັດຖະບານຈີນມີຈໍານວນ 3.416 ຄົນ, ຢູ່ລາວກໍເກີດມີກະແສມັກຮຽນພາສາຈີນ, ສະຖາບັນຂົງ

ຈື້ຂອງມະຫາວິທະຍາໄລແຫ່ງຊາດລາວ, ມະຫາວິທະຍາໄລຊູໂຈ່ວຢູ່ປະເທດລາວ ໄດ້ກາຍເປັນວິທີໃໝ່ແຫ່ງການແລກປ່ຽນກັນດ້ານວັດທະນະທຳ ແລະ ການສຶກສາລະຫວ່າງສອງປະເທດ, ວິທະຍຸ FM93 ຂອງວິທະຍຸສາກົນແຫ່ງປະ ເທດຈີນ (CRI) ໄດ້ຮັບຄວາມນິຍົມຊົມຊອບຈາກຜູ້ຮັບຟັງລາວ, ໄດ້ລາຍງານຂ່າວລະຫວ່າງສອງປະເທດ, ກາຍເປັນສື່ກາງທາງຈິດໃຈລະຫວ່າງປະຊາຊົນສອງປະເທດ, ຮູບເງົາເລື່ອງດອກຈຳປາບານທີ່ເປັນຮູບເງົາເລື່ອງທຳອິດທີ່ຈີນ-ລາວ ຮ່ວມມືກັນຖ່າຍທຳນັ້ນ, ໄດ້ສາຍອອກຢ່າງສຳເລັດຜົນ, ເພງ ອີຕ້າຍອີລູ ທີ່ຮ້ອງໂດຍນັກຮ້ອງຊື່ດັງຂອງລາວໄດ້ຮັບຄວາມນິຍົມຊົມຊອບຈາກແຟນເພງນັບເປັນຫລາຍສິບລ້ານຄົນ! ເຫັນວ່າມາຮອດສູ່ມື້ືນີ້ ມິດຕະພາບຈີນ-ລາວ ໄດ້ຊາບຊຶມເຂົ້າໃນຊີວິດຂອງປະຊາຊົນສອງປະເທດແລ້ວ.
ຈ້ອງມອງເບິ່ງອະນາຄົດ, ກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນໄດ້ເປີດຂະບວນການໃໝ່ໃຫ້ແກ່ການປະຕິຮູບ ແລະ ໄຂປະຕູສູ່ພາຍນອກຂອງຈີນ ແລະ ໄດ້ເລີ່ມຕົ້ນນະໂຍບາຍການຕ່າງປະເທດຈີນໃນຍຸກໃໝ່. ໃນຖານະເປັນຜູ້ກໍ່ສ້າງການພົວພັນສາກົນແບບໃໝ່ທີ່ຖືການຮ່ວມມືກັນ ແລະ ໄດ້ຮັບຜົນປະໂຫຍດຮ່ວມກັນ, ເປັນເນື້ອໃນໃຈກາງ ແລະ ຜູ້ປົກປັກຮັກສາລະບົບການຄ້າ ເສລີທົ່ວໂລກ, ຈີນຈະສືບຕໍ່ຊູຄັນທຸງແຫ່ງມິດຕະພາບ, ການພັດທະນາ, ຮ່ວມມື ແລະ ໄດ້ຮັບຜົນປະໂຫຍດຮ່ວມກັນ, ດ້ວຍແນວຄິດທີ່ພ້ອມກັນພັດທະນາ, ສ້າງຜົນປະໂຫຍດນຳກັນ, ຮ່ວມກັບປະເທດຕ່າງໆ ເຊິ່ງລວມທັງ ສປປ ລາວ, ປະກອບສ່ວນອັນໃໝ່ທີ່ໃຫຍ່ຫລວງກວ່າເກົ່າເຂົ້າໃນສັນຕິພາບ ແລະ ການພັດທະນາຂອງໂລກ. ພວກເຮົາມີຄວາມໝັ້ນໃຈ ແລະ ຄວາມຄອງຄອຍອັນເຕັມປ່ຽມ ຕໍ່ອະນາຄົດອັນດີງາມແຫ່ງການຮ່ວມມືຢ່າງມີໄມຕີຈິດມິດຕະພາບລະຫວ່າງຈີນ-ລາວ. ພວກເຮົາຈະສືບຕໍ່ຢຶດຖືທັດສະສະນະການຕ່າງປະເທດທີ່ “ສະໜິດສະໜົມກັນ, ຈິງໃຈຕໍ່ກັນ, ໃຫ້ຜົນປະໂຫຍດແກ່ກັນ ແລະ ມີຄວາມໂອບເອື້ອຍອາລີຊຶ່ງກັນ ແລະ ກັນ” ເປັນເພື່ອນບ້ານທີ່ດີ, ສະຫາຍທີ່ດີ, ເພື່ອນທີ່ດີ ແລະ ໝູ່ຄູ່ທີ່ດີຂອງລາວຕະຫລອດໄປ.

- WhatsApp Image 2020 05 27 at 5 - ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ
- WhatsApp Image 2020 05 27 at 5 - ຮ່ວມມືກັນສ້າງປະຊາຄົມຮ່ວມຊາຕາກຳຈີນ-ລາວທີ່ໜັກແໜ້ນ
error: Alert: ເນື້ອຫາຂ່າວມີລິຂະສິດ !!