ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ

- PM - ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ
- Untitled design - ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ

ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ແນະນໍາໃຫ້ສະມາຊິກລັດຖະ ບານເອົາໃຈໃສ່ວຽກງານຈຸດສຸມໃນເດືອນພຶດສະພານີ້, ໂດຍສະເພາະວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ສະກັດກັ້ນບັນດາໜໍ່ແໜງຂອງອາຊະຍາກຳ, ການຄ້າມະນຸດ, ຂີ້ລັກ-ງັດແງະ, ການຄ້າຂາຍ ຢາເສບຕິດ, ແກ໋ງກວນເມືອງ, ອັກຄີໄພ, ການໃຊ້ສື່ອອນລາຍເຄື່ອນໄຫວແບ່ງແຍກ ແລະ ຍຸແຍ່ໃຫ້ປະຊາຊົນເຂົ້າໃຈຜິດຕໍ່ການຈັດຕັ້ງພວກເຮົາ ແລະ ການເຄື່ອນໄຫວທີ່ບໍ່ສອດຄ່ອງກັບລະບຽບກົດໝາຍຕ່າງໆ, ສືບຕໍ່ຕິດຕາມສະ ພາບການພາກພື້ນ ແລະ ສາກົນ, ໂດຍມີການວິເຄາະວິໃຈເລີກເຊິ່ງກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມທີ່ອາດມີຕໍ່ປະເທດເຮົາ. ເອົາໃຈໃສ່ຊຸກຍູ້ ແລະ ຄຸ້ມຄອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຕາມແຜນການວາງໄວ້, ໂດຍສຸມໃສ່ວຽກງານຄຸ້ມຄອງການເກັບລາຍຮັບ, ຂຸດຄົ້ນຫາແຫລ່ງລາຍຮັບທີ່ບົ່ມຊ້ອນ ແລະ ສະກັດກັ້ນ, ອັດຊ່ອງວ່າງການຮົ່ວໄຫລ, ລັກລອບ ແລະ ຫລົບຫລີກການເສຍພັນ ທະພາສີອາກອນ ແລະ ອື່ນໆ, ຄຸ້ມຄອງອັດຕາເງິນເຝີ້ ແລະ ອັດຕາແລກປ່ຽນໃຫ້ຢູ່ໃນເກນປົກກະຕິ, ຕິດຕາມການເຄື່ອນໄຫວຂອງທະນາຄານທຸລະກິດ ແລະ ບັນດາສະຖາບັນການເງິນໃຫ້ຖຶກຕ້ອງຕາມລະບຽບກົດໝາຍ,    ຄົ້ນຄວ້າອັດຕາດອກເບ້ຍເງິນກູ້ ແລະ ກົນໄກການສະໜອງທຶນເພື່ອຊຸກຍູ້ສົ່ງເສີມການຜະລິດພາຍໃນ, ໂດຍສ້າງເງື່ອນໄຂໃຫ້ພາກທຸລະກິດພາຍໃນສາມາດເຂົ້າເຖິງແຫລ່ງທຶນ,       ຄຸ້ມຄອງລາຄາສິນຄ້າ ແລະ ການບໍລິການໃຫ້ຢູ່ໃນສະພາບສະຫງົບ, ສົມເຫດສົມຜົນ ແລະ ບໍ່ສ້າງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ສືບຕໍ່ປັບປຸງສະພາບແວດລ້ອມ ແລະ ຄວາມສະດວກໃນການດຳເນີນທຸລະກິດ ແລະ ສົ່ງເສີມການລົງທຶນຂອງຕ່າງປະເທດ ເພື່ອກະຕຸ້ນເສດຖະກິດໃຫ້ຂະຫຍາຍຕົວແຂງແຮງກວ່າເກົ່າ. ສືບຕໍ່ລົງກວດກາຜົນການກວດສອບເປົ້າໝາຍໂຄງການລົງທຶນຂອງລັດແຕ່ຫົວທີ ເພື່ອຮັບປະກັນບໍ່ໃຫ້ມີບັນຫາຫຍຸ້ງຍາກທີ່ຈະຕາມມາ ພາຍຫລັງໂຄງການສໍາເລັດ, ສືບຕໍ່ຊຸກຍູ້ການແກ້ໄຂໜີ້ສິນໂຄງການລົງທຶນຂອງລັດດ້ວຍຮູບແບບອວ່າຍໜີ້ສາມແຈໃຫ້ສໍາເລັດໂດຍໄວ, ເພາະເຫັນວ່າການຈັດຕັ້ງປະຕິບັດຕົວຈິງຍັງຊັກຊ້າ, ໃຫ້ຄະນະສະເພາະກິດສະຫລຸບຖອດຖອນບົດຮຽນການຈັດຕັ້ງປະຕິບັດຄຳສັ່ງເລກທີ 15/ນຍ ລວມທັງການເບິກ-ຈ່າຍເງິນເດືອນໃຫ້ທົ່ວເຖິງຢ່າງປົກກະຕິ ເພື່ອລາຍງານຕໍ່ກອງປະຊຸມນາຍົກ-ຮອງນາຍົກລັດຖະມົນຕີໃນເດືອນພຶດສະພານີ້. ໃຫ້ຂະແໜງການ ແລະ ທ້ອງຖິ່ນໃນຂອບເຂດທົ່ວປະເທດ ເອົາໃຈໃສ່ກະກຽມຮອບດ້ານໃຫ້ແກ່ການຜະລິດລະດູຝົນໃຫ້ທັນລະດູການ ໂດຍປະສານສົມທົບໃຫ້ຄຳແນະນຳ, ຊຸກຍູ້ຊ່ວຍເຫລືອປະຊາຊົນ ແລະ ຜູ້ປະກອບການໃນການກະກຽມລະດູການຜະລິດ, ເຝົ້າລະວັງພະຍາດສັດ ແລະ ສັດຕູພືດຕ່າງໆທີ່ອາດຈະເກີດຂຶ້ນ, ນັບທັງການແຜ່ລະບາດຂອງຕັກກະແຕນຢູ່ບັນດາແຂວງພາກເໜືອ ແລະ ໃຫ້ຂໍ້ມູນຂ່າວສານ, ພ້ອມທັງແນະນໍາ ແລະ ການເຊື່ອມຕໍ່ການຜະລິດກັບຕະຫລາດພາຍໃນ ແລະ ຕ່າງປະເທດ. ສືບຕໍ່ເອົາໃຈໃສ່ການຈັດຕັ້ງປະຕິບັດກົດໝາຍ ແລະ ລະບຽບການຕ່າງໆ, ໂດຍສະເພາະໃນຂົງເຂດການລົງທຶນຂອງລັດ, ການຫັນຊັບສິນເປັນທຶນໃນໄລຍະຜ່ານມາ, ການລົງທຶນຂອງພາກທຸລະກິດ ນັບທັງການກະກຽມ ແລະ ຈັດຕັ້ງປະຕິບັດນະໂຍບາຍການປັບຄ່າແຮງງານຂັ້ນຕ່ຳໃຫ້ແກ່ຜູ້ອອກແຮງງານໃນ ສປປ ລາວ ໃຫ້ທ່ວງທັນຕາມກຳນົດເວລາ ເພື່ອເປັນຂອງຂວັນໃນໂອກາດວັນກຳມະກອນສາກົນ 1 ພຶດສະພາທີ່ຈະມາເຖິງນີ້. ພ້ອມນີ້, ກໍໃຫ້ບັນດາຂະແໜງການນັບທັງສູນກາງ ແລະ ທ້ອງຖິ່ນ ໃຫ້ຮີບຮ້ອນສະຫລຸບຂາດຕົວງົບປະມານປີ 2017 ໃຫ້ສໍາເລັດໄວ, ເພາະປັດຈຸບັນກໍກ້າວເຂົ້າງວດ 2 ຂອງສົກປີ 2018 ແລ້ວ.

- WhatsApp Image 2020 05 27 at 5 - ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ
- WhatsApp Image 2020 05 27 at 5 - ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ
- Wave100S AD to Website 2020 0 - ນາຍົກແນະນໍາສະມາຊິກລັດຖະບານເອົາໃຈໃສ່ວຽກຈຸດສຸມເດືອນພຶດສະພາໃຫ້ສໍາເລັດຜົນ
error: Alert: ເນື້ອຫາຂ່າວມີລິຂະສິດ !!