ຕະຫຼາດນັດແຮງງານ ແລະ ການສຶກສາຄັ້ງທີ 7
ໃນວັນທີ 11 ພຶດສະພາ ນີ້, ຄະນະວິສະວະກໍາສາດ (ຄວສ) ມະຫາວິທະຍາໄລແຫ່ງຊາດ ຮ່ວມກັບ ສະພາການຄ້າ ແລະ ອຸດສາຫະກໍາແຫ່ງຊາດ, ສະພາການຄ້າ ແລະ ອຸດສາຫະກໍາເອີຣົບ ປະຈໍາລາວ ໂດຍການສະໜັບສະໜູນຈາກໂຄງການ GIZ, ໄດ້ຈັດງານຕະຫຼາດນັດແຮງງານ ແລະ ການສຶກສາ ຄັ້ງທີ 7 ຂຶ້ນທີ່ມະຫາວິທະຍາໄລດັ່ງກ່າວ, ໂດຍການເຂົ້າຮ່ວມຂອງທ່ານ ຫົວໜ້າກົມກິດຈະການນັກສຶກສາ ກະຊວງສຶກສາທິການ ແລະ ກິລາ, ມີຄະນະບໍດີຄະນະວິສະວະກຳສາດ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ແລະ ເລຂາທິການສະພາການຄ້າ ແລະ ອຸດສາຫະກຳເອີຣົບ ປະຈຳລາວ, ມີພະນັກງານຄູ-ອາຈານ, ນັກສຶກສາຄະນະວິສະວະກຳສາດ ແລະ ບໍລິສັດຕ່າງໆເຂົ້າຮ່ວມເປັນຈໍານວນຫຼາຍ.
ຄະນະບໍດີຄະນະວິສະວະກໍາສາດ, ໃຫ້ຮູ້ວ່າ: ການຈັດງານດັ່ງກ່າວ ເພື່ອແນໃສ່ຊ່ວຍເຫຼືອບັນດາຫົວໜ່ວຍທຸລະກິດຕ່າງມີເງື່ອນໄຂຊອກຫາຜູ້ຮ່ວມງານ ໄດ້ຖືກຕ້ອງຕາມຄວາມຕ້ອງການໃນວຽກງານຂອງຕົນ, ທັງເປັນການສ້າງໂອກາດໃຫ້ນັກຮຽນ-ນັກສຶກສາໄດ້ພົບປະກັບຫົວໜ່ວຍທຸລະກິດຕ່າງໆ ເພື່ອແລກປ່ຽນບົດຮຽນດ້ານການພັດທະນາແຮງງານ, ພ້ອມທັງເອື້ອອຳນວຍຄວາມສະດວກໃນການຊອກວຽກເຮັດງານທຳທີ່ຫຼາກຫຼາຍ ແລະ ສົ່ງເສີມວຽກເຮັດງານທຳເພື່ອການພັດທະນາເສດຖະກິດຂອງປະເທດໃຫ້ດີຂຶ້ນ.
ຕະຫຼາດນັດແຮງງານໃນຄັ້ງນີ້, ໄດ້ມີບູດວາງສະແດງ ຂອງນັກສຶກສາວິສະວະກໍາ ແລະ ບູດຂອງບັນດາບໍລິສັດຕ່າງໆ ຫຼາຍກວ່າ 30 ບໍລິສັດ. ນອກນີ້, ຍັງມີຫຼາຍຂະແໜງການ ເຊັ່ນ: ຂະແໜງບໍແຮ່, ໄອທີ, ປະກັນໄພ, ທະນາຄານ, ໂຮງແຮມ, ວັດສະດຸກໍ່ສ້າງ ແລະ ຂະແໜງການອື່ນໆອີກ ທີ່ມີຄວາມຕ້ອງການດ້ານແຮງງານ.
