ບັນຍາກາດສະຫລອງສົງການມີອັນໄດ້, ມີອັນເສຍ

- Untitled design - ບັນຍາກາດສະຫລອງສົງການມີອັນໄດ້, ມີອັນເສຍ

- Untitled 1 4 - ບັນຍາກາດສະຫລອງສົງການມີອັນໄດ້, ມີອັນເສຍໂດຍ: ທິດ​ກໍ່າ

ຖືວ່າ​ບັນຍາກາດ​ຂອງ​ການສະເຫລີມສະຫລອງສົ່ງ​ທ້າຍ​ປີ​ເກົ່າ​ ພສ 2559 ​ແລະ ຕ້ອນຮັບ​ປີ​ໃໝ່ 2560 ໄດ້​ສິ້ນສຸດ​ລົງ​ດ້ວຍຄວາມ​ຄຶກຄື້ນມ່ວນ​ຊື່ນ ​​ແລະ ​ມີ​ຄວາມ​ສະຫງົບ​ຈົບງາມ, ​ທັງ​ມີ​ອັນ​ໄດ້ ​ແລະ​ ມີ​ອັນ​ເສຍ. ​ເປັນຫຍັງ​ຈຶ່ງ​ວ່າ​ແນວ​ນັ້ນ ? ​ໂຕ​ທີ່​ເຮົາ​ໄດ້​ນັ້ນອັນ​ທີໜຶ່ງ​​ແມ່ນ​ໄດ້​ພັກ​ຍາວ​ຫລາຍມື້​ ຍ້ອນ​ວ່າ​ສົງການ​ປີ​ນີ້ມັນ​ກົງເປະ​ໃສ່​ວັນສຸກ, ວັນ​ເສົາ ​ແລະ ​ວັນ​ອາທິດ​.ສ່ວນວ່າ​ວັນ​ພະຫັດ​ກັບ​ວັນ​ຈັນ​ນັ້ນ​ເປັນ​ວັນ​ພັກ​ຊົດ​​ເຊີຍ​ກໍເລີຍຈັດ​ມື້ພັກ​ 5 ວັນ​ເຕັມ. ​ເມື່ອ​ມີ​ການ​ພັກຫລາຍ​ວັນ​ຄື​ແນວ​ນັ້ນ, ຜູ້​ທີ່ຢູ່​ທ້ອງຖິ່ນ​​ໄດ້​ມາ​ສຶກສາ​ຮໍ່າຮຽນ, ມາ​ເຮັດ​ວຽກ​ເຮັດ​ງານ ຫລື ​ເປັນພະນັກງານ-​ລັດຖະກອນ​ຢູ່​ຕົວເມືອງ ຫລື ​ເຂດແຂວງ​ອື່ນໆ ກໍ​ມີ​ໂອກາດ​ໄດ້ກັບ​​ໄປ​ຢາມ​ບ້ານ, ຢາມທ້ອງ​ຖິ່ນຂອງ​ຕົນ​ຕາມ​ຄວາມມຸ້ງ​ຫວັງ. ອັນທີ​ສອງ​ສົງການ​ປີ​ນີ້​ທຸກ​ຄົນ, ທຸກ​ທ້ອງ​ຖິ່ນ​ສ່ວນຫລາຍ​ໃຜ​ກໍ​ໄດ້​ມ່ວນ​ໄດ້​ຊື່ນ​ຕາມ​ໃຈ​ມັກ. ​ເທົ່າ​ທີ່ທິດ​ກໍ່າ​ໄດ້​ຕິດຕາ​ມ​ໃນ​ສື່ ແລະ ທັງ​ມີ​ໂອກາດໄປ​ເລາະ​ແຖວ​ອ້ອມ​ແອ້ມ​ຕົວເມືອງໃນນະຄອນຫລວງ​ວຽງ​ຈັນ ກໍ​ເຫັນວ່າ​ມີບັນຍາກາດ​​ມ່ວນຊື່ນ​ຊຸ່ມ​ເຢັນ. ສ່ວນວ່າ​ໄດ້​ອັນ​ທີ​ສາມນັ້ນ​ເຮົາ​ເຫັນ​ວ່າບາງ​ຄົນ, ບາງ​ຄອບຄົວ,ບາງ​ທ້ອງ​ຖິ່ນໃຜຢູ່​ໃສ ນັບ​ແຕ່ການຈັດຕັ້ງ, ສໍານັກງານ​ອົງການ, ກົມ​ກອງລວມໝູ່​ ຕະຫລອດ​ຮອດ​ປະຊາຊົນ​ບັນດາ​ເຜົ່າ​ໃຜໆກໍມີ​ການຈັດ​ຕັ້ງພິທີ​ສະເຫລີມສະຫລອງ​ຢ່າງ​ເປັນ​ທາງ​ການ​ຄັກ​ແນ່, ມີ​ລັກສະນະ​ປະຢັດ, ທັງ​ໄດ້​ຮີດ​ໄດ້​ຄອງ ເປັນ​ຕົ້ນບາງ​ກົມ​ກອງກໍ​ມີ​ການ​ສະຫລຸບ​ຜົນງານ​ໃນ​ໜຶ່ງ​ປີຜ່ານມາ, ມີ​ການ​ສະ​ແດງ​ສິລະ​ປະ​ວັນນະຄະດີ, ມີ​ພິທີ​ບາສີສູ່​ຂວັນ, ຫົດ​ສົງກັນ​ດ້ວຍ​ນ້ຳອົບ​ນ້ຳ​ຫອມ ແລະ​ ມີ​ການ​ສົມມາ​ຄາລະວະ​ຕາມ​ປະ​ເພນີ​ວັດທະນະ​ທໍາ​ທີ່​ບັນພະ​ບູລຸດ​ເຮົາ​ໄດ້​ນໍາພາຈັດ​ຕັ້ງ​ປະຕິບັດ​ໄດ້​ເປັນ​ຢ່າງ​ດີ.

ອັນ​ທີ່​ພິ​ເສດ​ສຸດໃນ​ໂອກາດ​ບຸນປີ​ໃໝ່​ລາວ​ນີ້, ທ່າ​ນປະທານປະ​ເທດ ບຸນ​ຍັງ ​ວໍລະ​ຈິດ ກໍ​ໄດ້​ມີ​ສານ​ອວຍພອນ​​ເຖິງ​ພີ່ນ້ອງ​ຊາວ​ລາວ​ທີ່ຢູ່​ທັງ​ພາຍ​ໃນ ​ແລະ ​ຕ່າງປະ​ເທດ, ຊາວ​ຕ່າງປະ​ເທດ​ທີ່​ດໍາລົງ​ຊີ​ວິດ ​ແລະ ​ປະຕິ​ບັດ​ໜ້າ​ທີ່​ຂອງ​ຕົນ​ຢູ່ລາວ ຂໍ​ໃຫ້​​ມີ​ແຕ່​ຄວາມສຸກ, ມີ​ຄວາມ​ເບີກບານ​ມ່ວນ​ຊື່ນ ​ແລະ ​ໄດ້​ຮັບ​ຜົນ​ສໍາ​ເລັດ​ໃໝ່​ໃຫຍ່​ຫລວງກວ່າປີ​ທີ່​ຜ່ານ​ມາ. ນອກ​ນັ້ນ​ເພິ່ນ​ກໍ​ໄດ້​ຮຽກຮ້ອງ​ມາ​ຍັງ​ພີ່ນ້ອງ​ຮ່ວມ​ຊາດ​ຈົ່ງ​ພ້ອມ​ກັນ​ເພີ່ມທະວີ​ຮັກສາ​ມູນ​ເຊື້ອ​ຄວາມ​ສາ​ມັກ​ຄີ​ເປັນ​ປຶກ​ແຜ່ນ​ແໜ້ນໜາ​ຢູ່​ພາຍ​​ໃຕ້​ການ​ນໍາພາ​ຂອງ​ພັກ, ​ຜ່ານຜ່າ​ທຸກ​ຄວາມ​ຫຍຸ້ງຍາກ ​ແລະ ​ສິ່ງ​ທ້າ​ທາຍ​ທົດ​ສອບ, ສືບ​ຕໍ່​ເສີມ​ຂະຫຍາຍ​ຜົນ​ສໍາ​ເລັດ​ອັນ​ດີງາມ​ ແລະ ​ຕັ້ງໜ້າ​ແກ້​ໄຂ​ຈຸດ​ອ່ອນ​ຂໍ້ຄົງຄ້າງ​ໃນ​ປີ​ທີ່​ຜ່ານ​ມາ ເພື່ອ​ເຮັດ​ໃຫ້​ປະ​ເທດ​ຊາດ​ທີ່​ແສນ​ຮັກ​ຂອງ​ພວກ​ເຮົາ​ມັ່ງ​ຄັ່ງ​ເຂັ້ມ​ແຂງປະຊາຊົນ​ຮັ່ງມີ​ຜາ​ສຸກ, ສັງຄົມ​ມີ​ຄວາມ​ສາມັກຄີ​ປອງ​ດອງ, ມີ​ປະຊາທິປະ​ໄຕ, ຍຸຕິ​ທໍາ ​ແລະ​ສີວິ​ໄລ​ຍິ່ງໆ​ຂຶ້ນ​ໄປ.

- Wave100S AD to Website 2020 0 - ບັນຍາກາດສະຫລອງສົງການມີອັນໄດ້, ມີອັນເສຍ

ສິ່ງ​ຕ່າງໆ​ທີ່​ທິດ​ກໍ່າ​ໄດ້​ຍົກ​ຂຶ້ນ​ມາ​ເວົ້ານີ້​ລ້ວນ​ແຕ່ແມ່ນ​ສິ່ງທີ່​ດີໆ ​ແລະ ​ມີ​​ແຕ່ອັນ​ໄດ້ທັງ​ນັ້ນ, ສ່ວນ​ທີ່​ມີ​ອັນເສຍ​ໄປ​ນັ້ນ, ຕາມ​ທິດ​ກໍ່າ​ໄດ້​ຕິດຕາມ​ແຫລ່ງ​ຂໍ້​ມູນ​ຈາກພາ​ກສ່ວນ​ກ່ຽວຂ້ອງ​ວ່າ​ສົງການ​ປີ​ນີ້ໄດ້​ມີ​​ອຸປະຕິ​ເຫດເກີດຫລາຍຮ້ອຍ​ກໍລະນີ, ມີ​ຄົນ​ຕາຍ 39 ຄົນ. ຫລາຍ​ກວ່າ​ໝູ່ແມ່ນ​ຢູ່​ນະຄອນຫລວງ​ວຽງ​ຈັນ. ຈາກ​ນັ້ນ​ກໍ​ແມ່ນ​ບັນດາ​ແຂວງ​ໃຫຍ່ໆເຊັ່ນ: ​ສະຫວັນ​ນະ​ເຂດ, ຈໍາປາ​ສັກ, ຄໍາມ່ວນ. ສໍາລັບ​ແຂວງທີ່​ມີອຸປະຕິ​ເຫດເກີດ​ໜ້ອຍ​ສຸດ​ແມ່ນ​ແຖວ​ພາກເໜືອເຊັ່ນ: ​ຜົ້ງ​ສາລີ, ຫລວງ​ນໍ້າ​ທາ, ຫົວພັນ, ​ໄຊ​ຍະ​ບູລີ, ບໍ່​ແກ້ວ. ສ່ວນວ່າ​ເສຍ​ອັນ​ທີ​ສອງ​ນີ້​ແມ່ນ​ປະ​ເພດ​ການຫລິ້ນ​ກິນ ​ແລະ ​ການ​ມ່ວນ​ຊື່ນ​ລື່ນ​ເລີງ​ຕ່າງໆ, ​ເທົ່າ​ທີ່​ທິດ​ກໍ່າ​ເຫັນ​ບາງບ່ອນ​ຕັ້ງ​ເຕົາ​ແຕ່​ເຊົ້າ​ຈົນ​ຮອດ​ເກົ້າ​ໂມງ​ສິບ​ໂມງ​ກາງຄືນ​ຈຶ່ງ​ພາກັນ​ເລີກ, ຜູ້ຍິງ​ບາງ​ຄົນ​ໃສ່ເສື້ອ​ບາງໆ​, ນຸ້ງ​ໂສ້ງຂາກິ້ນໆ​ເຂົ້າ​ຫົດສົງ​ພະ, ຍັງ​ມີການ​​ແກ່ວ​ງຖົງ​ນ້ຳ​ສີ​ໃສ່​ກັນ, ຍັງ​ມີ​ການ​ກິນ​ດື່ມ​ມືນ​ເມົາ​ຈົນ​ເລືອ​ເປັດ, ເປີດມະ​ໂຫລີດົນຕຣີ​ເພງ​​ເພື່ອນ​ບ້ານ​ເປັນສ່ວນຫລາຍ. ທິດ​ກໍ່າ​ໄປ​ເລາະ​ຫລາຍ​ໝ້ອງ ເຫັນຫລາຍ​ບ່ອນ​ພາກັນ​ເປີດ​ເພງ​ດັງຟ້ອນຊັກ​​ງໍ “ອ້າຍ​ຕິ​ຮິ ນ້ອງ​ບໍ່? ອ້າຍຊິ​ຕິ​ຮິ ນ້ອງ​ບໍ່? ວ່າ​ຊັ້ນ ! ທິດ​ກໍ່າ​ໄດ້​ແຕ່​ຕອບ​ຢູ່​ໃນ​ໃຈ​ວ່າ: “ມື້ນີ້ ອ້າຍ​ເຮັດຫຍັງ​ບໍ່​ໄດ້ ຍ້ອນວ່າ​ເມົາ​ແລ້ວ”.

- WhatsApp Image 2020 05 27 at 5 - ບັນຍາກາດສະຫລອງສົງການມີອັນໄດ້, ມີອັນເສຍ
- WhatsApp Image 2020 05 27 at 5 - ບັນຍາກາດສະຫລອງສົງການມີອັນໄດ້, ມີອັນເສຍ
error: Alert: ເນື້ອຫາຂ່າວມີລິຂະສິດ !!