ປະເທດໃດ ມີນິວເຄຼຍຫລາຍສຸດໃນໂລກ ?

- Untitled 1 copy 9 - ປະເທດໃດ ມີນິວເຄຼຍຫລາຍສຸດໃນໂລກ ?
- Untitled design - ປະເທດໃດ ມີນິວເຄຼຍຫລາຍສຸດໃນໂລກ ?

​ເຄີຍ​ສົງ​ໄສ ຫລື ບໍ່​ວ່າ ອາ​ເມ​ລິ​ກາທີ່ຄວບ​ຄຸມ​ບໍ່​ໃຫ້​ປະ​ເທດ​ຕ່າງໆ​ສ້າ​ງນິວ​ເຄຼຍ ຕອນ​ນີ້​ມີ​ນິວ​ເຄຼຍຄອບ​ຄອງ​ໄວ້​ທັງ​ໝົດ​ຈັກ​ລູກ ​ແລ້ວ​ປະ​ເທດ​ໃດ​ມີ​ນິວ​ເຄຼຍຫລາຍ​ທີ່​ສຸດ​ໃນ​ໂລກ.

ມື​ນີ້​ເຮົາ​ລອງ​ມາ​ເບິ່ງ​ນຳ​ກັນ

ກ່ອນ​ຈະ​ໄປ​ເບິ່ງ​ກັນ​ວ່າ​ປະ​ເທດ​ໃດ​ມີ​ນິວ​ເຄຼຍຄອບ​ຄອງ​ຫລາຍ ​ເຮົາ​ມາ​ເບິ່ງ​ຕົ້ນກຳ​ເນີ​ດຂອງ​ນິວ​ເຄຼຍກ່ອນ, ຫລາຍໆ​ຄົນ​ອາດ​ຈະ​ເຂົ້າ​ໃຈ​ຜິດ​ວ່າ ອັລ​ເບິຣ໌ຕ ​ໄອ​ນ໌ສ​ໄຕ​ນ໌ ​ເປັນ​ຄົນ​ສ້າງ​ລະ​ເບີດ​ນິວ​ເຄຼຍຄົນ​ທຳ​ອິດ, ຄວາມ​ຈິງ​ແລ້ວ ລາວ​ບໍ່​ໄດ້​ເປັນ​ຄົນ​ສ້າງ ພຽງ​ແຕ່​ລິດ E = mc2 ຂອງ​ລາວ​ເປັນ​ຈຸດ​ເລີ່​ມຕົ້ນຂອງ​ການ​ສ້າງ​ເທົ່າ​ນັ້ນ. ຜູ້​ສ້າງ​ລະ​ເບີດ​ນິວ​ເຄຼຍຄື ​ເຈ. ​ໂຣ​ເບິຣ໌ຕ ອອບ​ເພນ​ໄຮ​ເມີ ນັກ​ຟີ​ຊິກ​ສັນຊາດ​ອາ​ເມ​ລິ​ກາ ພ້ອມ​ກັບ​ນັກ​ເຄມີ ​ແລະ ວິສະວະກຳ​ລະດັບ​ສຸດ​ຍອດ​ອີກ 6.000 ຄົນ ພາຍ​ໃຕ້​ໂຄງການ​ແມນ​ຮັດ​ຕັນ (Manhattan).

​ໂຄງການ Manhattan ນີ້​ເກີດ​ຂຶ້ນ​ໃນ​ສະ​ໄໝ​ສົງຄາມ​ໂລກ​ຄັ້ງທີ 2 ​ເພາະວ່າ​ອາ​ເມ​ລິ​ກາ​ສືບ​ພົບ​ວ່າ ​ເຢຍລະ​ມັນ​ກຳລັງ​ຈະ​ພັດທະນາ​ອາວຸດ​ນິວ​ເຄຼຍ​ເຊັ່ນ​ກັນ, ​ແຕ່​ເຢຍລະ​ມັນ​ເກີດ​ບັນຫາພາຍ​ໃນ​ຂັດ​ແຍ່ງ​ກັນ​ເອງ ​ແລະ ສຸດ​ທ້າຍ​ປະ​ເທດ​ເຢຍລະ​ມັນ​ກໍ​ຖືກ​ຝ່າຍ​ຂ້າ​​ເສິກ​ປິດ​ລ້ອມ​ຈົນ​ເສຍ​ໄຊ​ສົງຄາມ ​ເຮັດ​ໃຫ້​ອາ​ເມ​ລິ​ກາສາ​ມາດ​ພັດທະນາ​ອາວຸດ​ນິວ​ເຄຼຍ​ໄດ້​ສຳ​ເລັດ​ເປັນ​ປະ​ເທດ​ທຳ​ອິດ.

ຫລັງ​ຈົບ​ສົງຄາມ​ໂລກ​ຄັ້ງທີ 2 ພຽງ​ແຕ່ 2 ປີ ຣັດ​ເຊຍ​ກໍ​ສາມາດ​ສ້າງ​ນິວ​ເຄຼຍ​ໄດ້​ສຳ​ເລັດ​ເຊັ່ນ​ກັນ. ອາ​ເມ​ລິ​ກາ ​ແລະ ຣັດ​ເຊຍ ຈຶ່ງ​ເປັນ 2 ປະ​ເທດ​ທຳ​ອິດ​ໃນ​ໂລກ​ທີ່​ມີ​ອາວຸດ​ນິວ​ເຄຼຍຄອບ​ຄອງ ​ແລະ ປັດຈຸບັນ ມີ​ປະ​ເທດ​ໃດ​ແດ່​ທີ່​ມີ​ອາວຸດ​ນິວ​ເຄຼຍຢູ່ ? ຕອນ​ນີ້​ມີ​ທັງ​ໝົດ 9 ປະ​ເທດ​ທີ່​ມີ​ອາວຸດ​ນິວ​ເຄຼຍຄອບ​ຄອງ​ຢູ່ (ຂໍ້​ມູນ​ຈາກ CNBC) ​ເມື່ອ​ເຮົາ​ຮູ້​ຊື່​ປະ​ເທດ​ແລ້ວ ​ເຮົາ​ອາດ​ຈະ​ຕົກ​ໃຈ:

ສປປ ​ເກົາຫລີ 20 ລູກ

ອິດສະ​ລາ​ແອນ 80 ລູກ

ອິນ​ເດຍ 130 ລູກ

ປາ​ກິດ​ສະຖານ 140 ລູກ

ສະຫະຣາຊະ​ອານາຈັກ 215 ລູກ

ຈີນ 270 ລູກ

ຝຣັ່ງ 300 ລູກ

- Wave100S AD to Website 2020 0 - ປະເທດໃດ ມີນິວເຄຼຍຫລາຍສຸດໃນໂລກ ?

ສະຫະລັດ​ອາ​ເມ​ລິ​ກາ 6.550 ລູກ

ຣັດ​ເຊຍ 6.800 ລູກ

ສັງ​ເກດ​ໄດ້​ວ່າ​ປະ​ເທດ​ທີ່​ເສຍ​ໄຊ​ສົງຄາມ​ຄື ຍີ່ປຸ່ນ ​ແລະ ​ເຢຍລະ​ມັນ ​ເຖິງ​ວ່າ​ປະ​ເທດ​ເຫລົ່ານັ້ນອາດ​ຈະ​ມີ​ເຕັກ​ໂນ​ໂລ​ຊີ​ທີ່​ຈະ​ຜະລິດ​ອາວຸດ​ນິວ​ເຄຼຍ​ໄດ້ ​ແຕ່​​ເລືອກ​ທີ່​ຈະ​ບໍ່​ມີ​ນິວ​ເຄຼຍ, ສ່ວນ​ປະ​ເທດ​ທີ່​ຄອບ​ຄອງ​ອາວຸດ​ນິວ​ເຄຼຍຫລາຍ​ທີ່​ສຸດ​ໃນ​ໂລກ​ຄື ຣັດ​ເຊຍ. ນີ້​ອາດ​ຈະ​ເປັນສາ​ເຫດ​ໜຶ່ງ​ທີ່​ວ່າ ​ເປັນ​ຫຍັງ 2 ປະ​ເທດ​ນີ້​ຈຶ່ງ​ມີ​ອິດ​ທິພົນ​ຫລາຍ​ກວ່າ​ປະ​ເທດ​ອື່ນໆ​ທົ່ວ​ໂລກ ​ແລະ ທັງ 9 ປະ​ເທດ​ທີ່​ຄອບ​ຄອງ​ອາວຸດ​ນິວ​ເຄຼຍ​ເຫລົ່າ​ນີ້​ມີ​ເງື່ອນ​ໄຂ​ຫຍັງ ຫລື ບໍ່. ທັງ​ໝົດ​ນີ້​ຈະ​ແບ່ງ​ເປັນ 3 ກຸ່ມ​ຄື:

ກຸ່ມ​ທຳ​ອິດ: ປະ​ເທດ​ມະຫາ​ອຳນາດ​ນິວ​ເຄຼຍທີ່​ຍອມຮັບ ​ແລະ ຢູ່​ພາຍ​ໃຕ້​ສົນທິສັນຍາ​ຫ້າມ​ທົດ​ລອງ​ລະ​ເບີດ​ນິວ​ເຄຼຍບາງ​ສ່ວນ ມີ​ທັງ​ໝົດ 5 ປະ​ເທດ​ຄື: ຣັດ​ເຊຍ, ສະຫະລັດ​ອາ​ເມ​ລິ​ກາ, ຈີນ, ອັງກິດ ​ແລະ ຝຣັ່ງ.

ກຸ່ມ​ທີ​ສອງ: ຄືປະ​ເທດ​ທີ່​ຍອມຮັບ​ວ່າ​ມີ​ອາວຸດ​ນິວ​ເຄຼຍ​ໃນ​ຄອບ​ຄົງ ​ແຕ່​ບໍ່​​ເຊັນ​ສົນທິສັນຍາ​ໃດ ຄື​ອິນ​ເດຍ, ປາ​ກິດ​ສະຖານ ​ແລະ ສປປ ​ເກົາຫລີ.

ກຸ່ມ​ທີ​ສາມ: ຄື​ປະ​ເທດທີ່​ມີ ​ແຕ່​ບໍ່​ຍອມຮັບ​ວ່າ​ມີ ຄື ອິດສະ​ລາ​ແອນ.

​ເຖິງ​ວ່າຈະ​ແບ່ງ​ເປັນ 3 ກຸ່ມ​ໃຫຍ່ ​ແຕ່​ທຸກ​ປະ​ເທດ​ກໍ​ໃຫ້​ເຫດຜົນ​ດຽວ​ກັນ​ໃນ​ການ​ຄອບ​ຄອງ​ຄື ມີ​ເອົາ​ໄວ້​ເພື່ອ​ປ້ອງ​ກັນ​ຕົນ​ເອງ​ຈາກ​ຜູ້​ຮຸກ​ຮານ. ສະ​ແດ​ງ​ໃຫ້​ເຫັນ​ວ່າ: ປະ​ເທດ​ຕ່າງໆ​ອາດ​ຈະ​ມີ​ນິວ​ເຄຼຍ​ໄດ້ ຖ້າ​ບໍ່​ໄດ້​ສົນ​ໃຈ​ເລື່ອງ​ການ​ພົວພັນ​ລະຫວ່າງ​ປະ​ເທດ ຫລື ງົບປະມານ​ທີ່​ຈະ​ນຳ​ມາສ້າງ​ນິວ​ເຄຼຍ. ຖ້າ​ເກີດ​ສົງຄາມ​ໂລກ​ຂຶ້ນມາ​ອີກ ຈາກ​ຈຳນວນ​ນິວ​ເຄຼຍທີ່​ມີ​ຢູ່​ທົ່ວ​ໂລກ​ຕອນ​ນີ້ ອາດ​ເຮັ​ດ​ໃຫ້​ໂລກ​ຖອຍຫລັງ​ໄປ​ຈັກ​ປີ.

ນິວ​ເຄຼຍ 1 ລູກ ຮຸນ​ແຮງ​ຂະໜາດ​ໃດ ?

ນິວ​ເຄຼຍ​ແຕ່​ລະ​ລູກຈະ​ມີ​ຄວາມ​ຮຸນ​ແຮງ​ບໍ່​ເທົ່າ​ກັນ ​ໂດຍ​ຈະ​ວັດ​ແທກ​ຈາກ​ການ​ປົດ​ປ່ອຍ​ພະລັງງານ​ທີ່​ນິວ​ເຄຼຍ​ເຮັດ​ໄດ້. ລະ​ເບີດ​ນິວ​ເຄຼຍທີ່​ຮິ​ໂຣຊິ​ມາ​ມີ​ການ​ປົດ​ປ່ອຍ​ພະລັງງານ 15 ກິ​ໂລ​ໂຕນ ສາມາດ​ເຮັ​ດ​ໃຫ້​ເມືອງ​ທັງ​ເມືອງ​ຫາຍ​ໄປ ​ແລະ ມີ​ຄົນ​ເສຍ​ຊີວິດ​ນັບ​ແສນ​ຈາກ​ເຫດການ​ນີ້. ຕອນ​ນີ້​ນິວ​ເຄຼຍທີ່​ມີ​ຄວາມ​ຮຸນ​ແຮງ​ທີ່​ສຸດ​ໃນ​ໂລກ​ເປັນ​ຂອງຣັດ​ເຊຍ ສາມາດ​ປົດ​ປ່ອຍ​ພະລັງງານ​ໄດ້​ເຖິງ 50​ ​ເມ​ກາ​ໂຕນ ​ເມື່ອ​ທຽບ​ໃສ່​ຮິ​ໂຣຊິ​ມາ​ແລ້ວ ມີ​ຄວາມ​ຮຸນ​ແຮງ​ຫລາຍ​ກວ່າ​ເຖິງ 3.800 ​ເທົ່າ ​ແລະ ​ໃນ​ໂລກ​ນີ້​ມີ​ລະ​ເບີດ​ນິວ​ເຄຼຍລວມກັນ​ທັງ​ໝົດ​ກວ່າ​ໝື່ນ​ລູກ ຖ້າ​ເກີດ​ສົງຄາມ​ນິວ​ເຄຼຍລະ​ຫວ່າງ​ກັນ​ອາດ​ຈະ​ເຮັດ​ໃຫ້ອາຍະ​ທຳ​ທັງ​ໝົດ​ຂອງ​ມະນຸດ​ຫາຍ​ໄປ​ໄດ້​​ໃນພິບ​ຕາ.

- WhatsApp Image 2020 05 27 at 5 - ປະເທດໃດ ມີນິວເຄຼຍຫລາຍສຸດໃນໂລກ ?
- WhatsApp Image 2020 05 27 at 5 - ປະເທດໃດ ມີນິວເຄຼຍຫລາຍສຸດໃນໂລກ ?
error: Alert: ເນື້ອຫາຂ່າວມີລິຂະສິດ !!