ຫົວພັນສະຫລອງ 10 ປີ​ ໜ່ວຍແກ້ວຫລັກ​ເມືອງ

- Huaphan celebration - ຫົວພັນສະຫລອງ 10 ປີ​ ໜ່ວຍແກ້ວຫລັກ​ເມືອງ
- AGL banner - ຫົວພັນສະຫລອງ 10 ປີ​ ໜ່ວຍແກ້ວຫລັກ​ເມືອງ

​  ພິທີ​ສະເຫລີມສະຫລອງ​ໜ່ວຍແກ້ວຫລັກ​ເມືອງຄົບ​ຮອບ 10 ປີ ແລະ ເປີດປີ​ທ່ອງ​ທ່ຽວລາວ 2018 ຂອງ​ແຂວງຫົວພັນໄດ້ຈັດຂຶ້ນຢ່າງຟົດຟື້ນໃນວັນທີ 18 ພຶດສະພານີ້, ໂດຍ​ໃຫ້ກຽດ​ເຂົ້າຮ່ວມ​ ​ແລະ ລັ່ນຄ້ອງ 9 ບາດຂອງທ່ານ ສອນ​ໄຊ​ ສີ​ພັນ​ດອນ ຮອງ​ນາຍົກລັດຖະມົນຕີ, ທັງເປັນປະທານຊີ້ນໍາລະດັບຊາດຂອງປີທ່ອງທ່ຽວລາວ 2018, ​ເຊິ່ງມີທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ, ພ້ອມດ້ວຍແຂກຖືກເຊີນຈາກ​ແຂວງ​ແຮກ​ສ່ຽວ ສ​ສ ຫວຽດ​ນາມ ​ແລະ ມວນຊົນ​ເຂົ້າຮ່ວມ​ເປັນຈໍານວນຫລາຍ.

​ໃນ​ພິທີ, ທ່ານຮອງຫົວ​ໜ້າ​ພະ​ແນກ​ຖະແຫລງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ​ແຂວງ​ຫົວ​ພັນ, ​ໄດ້ລາຍ​ງານ​ໃຫ້​ຊາບວ່າ: ໜ່ວຍ​ແກ້ວຫລັກ​ເມືອງ, ​​ໄດ້​ຮັບ​ການ​ສ້າງ​ຂຶ້ນໃນ​ປີ 2005 ແລະ ສຳ​ເລັດ​ໃນ​ປີ 2008 ແລະ ທຸກໆປີຜ່ານມາກໍໄດ້​ມີ​ການ​ສະເຫລີມ​ສະຫລອງ​ຄົບ​ງັນຢ່າງເປັນຂະບວນຟົດຟື້ນ, ອັນ​ໄດ້​ກາຍ​ເປັນສະ​ຖາ​ປັດ​ຕະ​ຍະ​ກຳ​ແຫ່ງ​ຍຸກ​ສະ​ໄໝ ຕິດ​ພັນ​ກັບ​ມູນ​ເຊື້ອ​ປະ​ຫວັດ​ສາດ ແລະ ວັດ​ທະ​ນະ​ທຳ​ອັນ​ດີ​ງາມຂອງ​ແຂວງ​ຫົວ​ພັນ, ເປັນ​ສັນ​ຍາ​ລັກ ແລະ ສິ່ງ​ສັກ​ສິດ​ສຳ​ຄັນ​ໜຶ່ງທີ່​ສະ​ແດງ​ເຖິງ​ຄວາມ​ຮູ້​ບຸນ​ຄຸນຕໍ່​ວີ​ລະ​ກຳ​ອັນ​ລ້ຳເລີດຂອງ​ບັນ​ພະ​ບູ​ລຸດ, ພະ​ນັກ​ງານ​ນັກ​ຮົບ ແລະ ປະ​ຊາ​ຊົນ​ບັນ​ດາ​ເຜົ່າ ທີ່​ໄດ້​ເສຍ​ສະຫລະ​ຊີ​ວິດເພື່ອ​ຊາດ​, ເພື່ອ​ແຜ່ນ​ດິນຂອງ​ແຂວງ​ຫົວ​ພັນ. ທັງ​ຍັງ​ເປັນ​ການຢັ້ງ​ຢືນ​ເຖິງຄວາມ​ສາ​ມັກ​ຄີ​ຂອງ​ປະ​ຊາ​ຊົນ​ບັນ​ດາ​ເຜົ່າ, ມີ​ຄວາມ​ຮັກ​ຫອມ​ຕ້ອມ​ຕູ້ມ​ທີ່​ເປັນ​ປຶກ​ແຜ່ນ​ແໜ້ນ​ໜາ, ມີ​ວັດ​ທະ​ນະ​ທຳ, ຮີດຄອງ​ປະ​ເພ​ນີ, ຂະ​ໜົບ​ທຳ​ນຽມ​ອັນ​ດີ​ງາມ ແລະ ມີນ້ຳ​ໃຈ​ເດັດ​ດ່ຽວ​ອົງ​ອາດ​ກ້າ​ຫານຕໍ່​ສູ້ບໍ່​ຍອມ​ຈຳ​ນົນ​ມາ​ແຕ່​ດຶກ​ດຳ​ບັນ, ດັ່ງ​ຄຳ​ຂວັນ ທີ່​ບັນ​ທຶກ​ໄວ້​ໃນ​ເສົາ​ໜ່ວຍ​ແກ້ວຫຼັກ​ເມືອງວ່າ “ຢູ່​ຮ່ວມ​ກັນ​ຢ່າງ​ສັນ​ຕິ​ສຸກ, ບຸກ​ບືນສ້າງ​ສາ​ຄວາມ​ຈະ​ເລີນ, ປົກ​ຄອງ​ບ້ານ​ເມືອງ​ດ້ວຍ​ຄວາມ​ຍຸ​ຕິ​ທຳ, ນຳ​ພາ​ປະ​ຊາ​ຊົນ​ຢູ່​ເຢັນ​ເປັນ​ສຸກ”.

ການຈັດ​ງານ​ໃນ​ຄັ້ງ​ນີ້, ມີຫລາຍ​ກິດ​ຈະ​ກຳ ເປັນ​ຕົ້ນ ການ​ຕັ້ງ​ກອງ​ບຸນ​ຂອງ​ການ​ນຳ​ແຂວງ, ພະ​ແນກ​ການ ແລະ ເມືອງ​ຕ່າງໆ, ຕົ້ນ​ກາ​ລະ​ພຶກ​ຈາກ​ບ້ານ​ອ້ອມ​ຂ້າງ, ການຈັດງານຕະຫຼາດ​ນັດ​ວາງ​ສະ​ແດງ ແລະ ຈຳ​ໜ່າຍ​ສິນ​ຄ້າ, ຜະ​ລິດ​ຕະ​ພັນ​ການ​ທ່ອງ​ທ່ຽວ, ເທດ​ສະ​ການ​ອາ​ຫານ​ພື້ນ​ເມືອງ, ການ​ສະ​ແດງ​ສີ​ລະ​ປະ​ວັນ​ນະ​ຄະ​ດີ, ການ​ແຂ່ງ​ຂັນ​ກີ​ລາ​ມວນ​ຊົນ, ຍ່າງ​ເພື່ອ​ສຸ​ຂະ​ພາບ ແລະ ຂະ​ບວນ​ຄາ​ລາ​ວານ​ທ່ອງ​ທ່ຽວ​ຜາ​ຖີ່.

- Wave100S AD to Website 2020 0 - ຫົວພັນສະຫລອງ 10 ປີ​ ໜ່ວຍແກ້ວຫລັກ​ເມືອງ

​ໃນ​ພິທີ​ເປີດ, ທ່ານ ວັນ​ໄຊ ແພງ​ຊຸມ​ມາ ​ກໍ່​ໄດ້​​ກ່າວ​ວ່າ: ແຂວງ​ຫົວ​ພັນ ເປັນ​ແຂວງ​ໜຶ່ງ​ທີ່​ອຸ​ດົມ​ສົມ​ບູນ​ໄປ​ດ້ວຍ​ຊັບ​ພະ​ຍາ​ກອນ​ທຳ​ມະ​ຊາດ, ພູ​ຜາ​ປ່າ​ໄມ້, ອາ​ກາດ​ຊຸມ​ເຢັນ, ເປັນ​ແຂວງວິ​ລະ​ຊົນ, ເຄີຍເປັນທີ່​ໝັ້ນ​ຂອງ​ການ​ປະ​ຕິ​ວັດ​ລາວ. ປະ​ຊາ​ຊົນ ມີ​ນ້ຳ​ໃຈ​ສາ​ມັກ​ຄີ, ເອື້ອ​ເຟື້ອ​ເພື່ອ​ແຜ່, ໂອບ​ເອື້ອອາ​ລີ, ມີ​ແຫລ່ງ​ທ່ອງ​ທ່ຽວທີ່ຫລາກຫລາຍ ແລະ ​ໜ້າ​ປະ​ທັບ​ໃຈ. ດັ່ງ​ນັ້ນ, ຈຶ່ງຂໍເຊີນຊວນມາ​ຍັງ​ບັນ​ດາ​ແຂກ​ພາຍ​ໃນ ແລະ ຕ່າງ​ປະ​ເທດເຂົ້າ​ມາ​ທ່ອງ​ທ່ຽວ​ແຂວງ​ຫົວ​ພັນ ດ້ວຍ​ຄວາມ​ເບີກ​ບານ​ມ່ວນ​ຊື່ນ ແລະ ມີ​ຄວາມ​ສຸກ.

- lattana 1 - ຫົວພັນສະຫລອງ 10 ປີ​ ໜ່ວຍແກ້ວຫລັກ​ເມືອງ
error: Alert: Content is protected !!