ປີຜ່ານມາເສດຖະກິດຂອງລາວມີທ່າອ່ຽງຂະຫຍາຍຕົວສູງແຕ່ບໍ່ບັນລຸແຜນການວາງໄວ້

ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ໄດ້ລາຍງານການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນປີຜ່ານມາ, ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII, ໃນວັນທີ 25 ເມສານີ້ວ່າ: ໄລຍະຜ່ານມາ, ການເຕີບໂຕຂອງເສດຖະກິດໃນສົກປີ 2015-2016 ໃນອັດຕາສະເລ່ຍ 6,9%, ມາຮອດປັດຈຸບັນ ສະພາແຫ່ງຊາດ ໄດ້ປັບປ່ຽນເວລາສະຫລຸບແຜນການ ແລະ ງົບປະມານເປັນປີປະຕິ ທິນ, ໂດຍກະຊວງແຜນການ ໄດ້ປັບປຸງການຄິດໄລ່ການເຕີບໂຕຂອງລວມຍອດຜະລິດຕະພັນພາຍໃນຄືນໃໝ່ຕາມປະຕິທິນປີ 2016, ຊຶ່ງມີອັດຕາການເພີ່ມຂຶ້ນ 7,02% ທຽບໃສ່ແຜນການໃນມະຕິ 07/ສພຊ ທີ່ສະພາໄດ້ຮັບຮອງ ສາມາດບັນລຸໄດ້ 93,6% (ຕາມແຜນການວາງໄວ້ແມ່ນ 7,5%), ລວມມູນຄ່າ 129.279 ຕື້ກີບ, ສະເລ່ຍ 2.408 ໂດລາສະຫະລັດ/ຄົນ, ໃນນັ້ນ ຂະແໜງກະສິກຳ ເພີ່ມຂຶ້ນ 2,7%; ຂະແໜງອຸດສາຫະກຳ ເພີ່ມຂຶ້ນ 12%; ຂະແໜງບໍລິການ ເພີ່ມຂຶ້ນ 4,6%; ພາສີນຳເຂົ້າ ເພີ່ມຂຶ້ນ 7,8% ຂອງ GDP, ເຖິງວ່າ ຂະແໜງກະສິກຳ, ບໍລິການ ແລະ ພາສີນຳເຂົ້າບໍ່ບັນລຸຕາມແຜນວາງໄວ້ກໍຕາມ, ແຕ່ຂະແໜງອຸດສາຫະກຳດ້ານພະລັງງານໄຟຟ້າແມ່ນປັດໃຈຂັບເຂື່ອນທີ່ຊຸກດັນການເຕີບໂຕຂອງເສດຖະກິດແຫ່ງຊາດ, ໃນລະດັບ 39% ເກີນແຜນການວາງໄວ້ 36,9%, ເນື່ອງຈາກການກໍ່ສ້າງບັນດາໂຮງງານ ແລະ ເຂື່ອນໄຟຟ້າຈຳນວນໜຶ່ງໄດ້ສຳເລັດ ແລະ ມີການຜະລິດແລ້ວ. ນອກນີ້ ຍັງມີການລົງທຶນຂອງຂະແໜງອຸດສາຫະກຳປຸງແຕ່ງຢູ່ເຂດເສດຖະກິດພິເສດມີການເພີ່ມຂຶ້ນ.

ທ່ານລັດຖະມົນຕີ ໃຫ້ຮູ້ຕື່ມວ່າ: ການປະຕິບັດການລົງທຶນ ມີມູນຄ່າທັງໝົດ 42.857 ຕື້ກວ່າກີບ, ເພີ່ມຂຶ້ນ 24,2% (ແຜນການ 34.500 ຕື້ກີບ), ກວມເອົາ 33,1% ຂອງ GDP, ໃນນັ້ນ ການລົງທຶນຂອງລັດ ປະຕິບັດໄດ້ 5.355 ໂຄງການ, ມູນຄ່າ 3.290 ຕື້ກວ່າກີບ, ເທົ່າກັບ 99,62% ຂອງແຜນກປີ (ແຜນດັດແກ້ 3.300 ຕື້ກີບ), ການຊ່ວຍເຫລືອທາງການ ເພື່ອການພັດທະນາ ລວມທັງການຊ່ວຍເຫລືອລ້າ ແລະ ກູ້ຢືມ ປະຕິບັດໄດ້ 621,6 ລ້ານໂດລາສະຫະລັດ ເທົ່າກັບ 5.053 ຕື້ກີບ ເທົ່າກັບ 90,8% ຂອງແຜນການ, ການລົງທຶນເອກະຊົນພາຍໃນ ແລະ ຕ່າງປະເທດ ອະນຸມັດ 1.222 ໂຄງການ, ມູນຄ່າ 3.134 ລ້ານໂດລາສະຫະລັດ ເທົ່າກັບ 25.476 ຕື້ກີບ (ທຶນຈົດທະບຽນ) ສ່ວນທຶນນຳເຂົ້າຕົວຈິງປະຕິບັດໄດ້ 2.908 ລ້ານໂດລາສະຫະລັດ ເທົ່າກັບ 23.639 ຕື້ກີບ ລື່ນແຜນ 28,1% ແລະ ທຶນຈາກລະບົບສິນເຊື່ອທະນາຄານ ເພີ່ມຂຶ້ນ 10.875 ຕື້ກວ່າກີບ, ເກີນແຜນ 62,3% (ແຜນວາງໄວ້ 6.700 ຕື້ກີບ), ການຊຳລະໜີ້ສິນໂຄງການລົງທຶນຂອງລັດ ຕາມແຜນປົກກະຕິ 963 ຕື້ກີບ (ໜີ້ມີ 13.118 ຕື້ກີບ), ໃນ 3 ເດືອນຂ້າມຜ່ານລັດຖະບານໄດ້ສະເໜີສະພາຕົກລົງຊຳລະເພີ່ມ 700 ຕື້ກີບ ລວມເປັນ 1.663 ຕື້ກີບ (ແຕ່ 700 ຕື້ກີບນີ້ມາຈ່າຍຕົ້ນປີ 2017, ມາຮອດປັດຈຸບັນສາມາດຈັດຕັ້ງປະຕິບັດໄດ້ເປັນສ່ວນໃຫຍ່ແລ້ວ ໂດຍສະເພາະ ບ້ວງ 300 ຕື້ກີບ ຊຳລະພັນທະບັດ ແລະ 400 ຕື້ກີບ ຊຳລະໃຫ້ໂຄງການໜີ້ສິນລົງທຶນຂອງລັດ, ຊຶ່ງປັດຈຸບັນເບີກຈ່າຍແລ້ວ 61%).