ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ

- sonexay - ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ
- Untitled design - ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ

ໃນ​ວັນ​ທີ 17-18 ພຶດ​ສະ​ພານີ້, ທ່ານ ສອນ​ໄຊ ສີ​ພັນ​ດອນ ຮອງ​ນາ​ຍົກ​ລັດ​ຖະ​ມົນ​ຕີ ພ້ອມ​ດ້ວຍ​ຄະ​ນະ, ໄດ້​​ໄປ​ເຄື່ອນ​ໄຫວ​ຢ້ຽມ​ຢາມກຸ່ມບ້ານ​ເມືອງ​ແວ່ນ, ເມືອງ​ຊຳ​ເໜືອແຂວງ​ຫົວ​ພັນ, ເຊິ່ງ​ມີທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ແລະ ອຳ​ນາດ​ການ​ປົກ​ຄອງ​ທ້ອງ​ຖິ່ນໃຫ້​ການ​ຕ້ອນ​ຮັບດ້ວຍຄວາມອົບອຸ່ນ.

ໃນໂອກາດດັ່ງກ່າວ, ທ່ານ​ຮອງ​ນາ​ຍົກ​ລັດ​ຖະ​ມົນ​ຕີ ແລະ ຄະ​ນະ ໄດ້ຢ້ຽມຢາມ​ປະ​ຊາ​ຊົນກຸ່ມ​ບ້ານ​ເມືອງ​ແວ່ນເມືອງ​ຊຳ​ເໜືອ ເຊິ່ງຕັ້ງ​ຢູ່​ຫ່າງ​ຈາກ​ເທດ​ສະ​ບານ​ເມືອງ​ປະ​ມານ 50 ກິ​ໂລ​ແມັດ, ປະ​ກອບ​ມີ 15 ບ້ານ, ມີ​ພົນ​ລະ​ເມືອງ 5.303 ຄົນ, ຍິງ 2.399 ຄົນ, ປະ​ຊາ​ຊົນມີ​ອາ​ຊີບ​ປູກ​ຝັງ-ລ້ຽງ​ສັດເປັນ​ຕົ້ນ​ຕໍຄື: ​ກຸ່ມ​ລ້ຽງ​ໝູ, ແບ້, ເປັດ ແລະ ໄກ່ໄດ້ຫລາຍ​ກຸ່ມ, ພ້ອມຍັງມີ​ກຸ່ມ​ຫັດ​ຖະ​ກຳ​ຕ່ຳ​ຫູກ ທີ່ສາມາດສ້າງ​ລາຍ​ຮັບ​ຕົ້ນ​ຕໍໃຫ້​ປະ​ຊາ​ຊົນ​ເຂດນີ້.

ໃນ​ໂອກາດ​ນີ້, ທ່ານ ສອນ​ໄຊ ສີ​ພັນ​ດອນ ກໍ່ໄດ້​ສະ​ແດງ​ຄວາມ​ຊົມ​ເຊີຍຕໍ່ຄວາມ​ບຸກບືນ​ພະຍາຍາມຂອງອຳນາດ​ການ​ປົກຄອງ​ທ້ອງ​ຖິ່ນ ​ແລະ ​ປະຊາຊົນ​ໃນ​ເຂດ​ກຸ່ມ​ບ້ານ​ເມືອງ​ແວ່ນ ທີ່​ໄດ້​ພ້ອມ​ກັນ​ຮັກສາ​ມູນ​ເຊື້ອປະຕິວັດ, ຄວາມ​ດຸໝັ່ນຂະຫຍັນ​ພຽນ ​ແລະ ການ​ສ້າງສາ​ພັດທະນາດີຂຶ້ນ​ເປັນ​ກ້າວໆ. ພ້ອມ​​ໄດ້​ເນັ້ນ​ບາງ​ບັນຫາ​ທີ່​ຕ້ອງ​ໄດ້​ເອົາ​ໃຈ​ໃສ່, ​ໂດຍ​ສະ​ເພາະວຽກງານ​ສຶກສາ​ອົບຮົມ​ການ​ເມືອງ​ແນວ​ຄິດຕິດ​ພັນ​ກັບ​ວຽກງານ​ກໍ່ສ້າງ​ຮາກ​ຖານ​ການ​ເມືອງ ​ແລະ ​ແກ້​ໄຂ​ຄວາມທຸກ​ຍາກ, ​ເອົາ​ໃຈ​ໃສ່​ສ້າງ​ຕົວ​ເມືອງ​ໃໝ່​ໃນ​ຊົນນະບົດ, ​ເຮັດ​ໃຫ້​ຮາກ​ຖານ​ມີ​ຄວາມ​ເຂັ້ມ​ແຂງ, ເສີມ​ຂະຫຍາຍໝາກຜົນ​ຂອງ​ການຈັດຕັ້ງປະຕິບັດ​ວຽກງານ 3 ສ້າງ ຕາມ​ເນື້ອ​ໃນ​ຈິດ​ໃຈ ທີ່​ພັກ ​ແລະ ລັດຖະບານວາງ​ອອກ​ໃນ​ໄລຍະ​ໃໝ່ ​ເພື່ອ​ວາງ​ຄາດໝາຍ ​ແລະ ກຳນົດ​ຈຸດ​ສຸມ​ຂອງ​ການ​ພັດທະນາ​ໃນຕໍ່ໜ້າ, ​ເສີມ​ຂະຫຍາຍ​ທ່າ​ແຮງ​ໃນ​ທ້ອງ​ຖິ່ນ ​ເພື່ອ​ການ​ຜະລິດ​ເປັນ​ສິນຄ້າ ​ເປັນຕົ້ນ: ການ​ປູກ-​ການ​ລ້ຽງ ​ແລະ ຫັດຖະກຳ​ຕ່ຳ​ແຜ່ນ ທີ່​ເປັນ​ມູນ​ເຊື້ອ ​ເພື່ອສ້າງ​ລາຍ​ຮັບ ​ແລະ ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນດີ​ຂຶ້ນ​ເທື່ອ​ລະ​ກ້າວ, ປຸກລະດົມ​ປະຊາຊົນ​ເຂົ້າຮ່ວມ​ການ​ພັດທະນາ​ພື້ນຖານ​ໂຄງ​ລ່າງຢ່າງ​ເປັນ​ຂະ​ບວນ, ​ເອົາ​ໃຈ​ໃສ່​ວຽກງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບທີ່​ເປັນ​ມູນ​ເຊື້ອ ​ເພື່ອ​ເຮັດ​ໃຫ້​ກຸ່ມ​ບ້ານ​ເມືອງ​ແວ່ນມີ​ຄວາມ​ເປັນ​ລະບຽບຮຽບຮ້ອຍ ​ແລະ ຕີ​ຖອຍ​ປະກົດ​ການ​ຫຍໍ້​ທໍ້​ໃນ​ສັງຄົມ, ​ເສີມ​ຂະຫຍາຍ​ທ່າ​ແຮງ​ບົ່ມ​ຊ້ອນ ​ໂດຍ​ສະ​ເພາະບໍລິການດ້ານ​ການທ່ອງທ່ຽວໃຫ້​ມີຫລາຍສີສັນ ​ແລະ ​ເຊື່ອມ​ໂຍງ​ເຂົ້າກັບ​ບັນດາ​ກິດຈະກຳ​ອື່ນໆຂອງ​ແຂວງ, ອັນ​ເປັນ​ການ​ສ້າງ​ລາຍ​ໄດ້​ອີກ​ທາງໜຶ່ງ​ໃຫ້​ແກ່​ປະຊາຊົນ​ໃນ​ທ້ອງ​ຖິ່ນ.

- Wave100S AD to Website 2020 0 - ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ

ນອກຈາກ​ນີ້, ທ່ານ​ຮອງ​ນາຍົກລັດຖະມົນຕີ ​ແລະ ຄະນະ ຍັງ​ໄດ້​ໄປ​ຢ້ຽມ​ຊົມ​ຜາ​ຖີ່, ເຊິ່ງ​ເປັນ​ສະ​ຖານ​ທີ່​ສຳ​ຄັນທາງ​ດ້ານ​ປະ​ຫວັດ​ສາດ​ໃນ​ການ​ຕໍ່​ສູ້​ກູ້​ຊາດໃນ​ສະ​ໄໝ​ກ່ອນ ກໍຄືເຫດ​ການ “ບັ້ນ​ຮົບ​ປົດ​ປ່ອຍ​ຜາ​ຖີ່” ໃນ​ວັນ​ທີ 11 ມີ​ນາ 1968 ຊຶ່ງ​ຕັ້ງຢູ່​ຫ່າງ​ຈາກ​​ເທ​ສະບາ​ນເມືອງຊໍາເໜືອໄປປະ​ມານ 70 ກິ​ໂລ​ແມັດ. ປັດ​ຈຸ​ບັນ, ໄດ້​ມີ​ການ​ບູ​ລະ​ນະ​ຊ້ອມ​ແປງ​ທາງ​ຂຶ້ນ-ລົງ​ຄືນ​ໃໝ່ ມີ​ຂັ້ນ​ໄດຍາວ​ກວ່າ 1.000 ຂັ້ນ ແລະ ​ໄດ້ກາຍ​ເປັນ​ສະ​ຖານ​ທີ່​ທ່ອງ​ທ່ຽວ ທີ່​ມີ​ຊື່​ສຽງ​ອີກ​ແຫ່ງ​ໃໝ່​ຂອງ​ແຂວງ​ຫົວ​ພັນ. ຫຼັງ​ຈາກນັ້ນ, ກໍ່​ໄດ້​ເດີນ​ທາງ​ໄປ​ຢ້ຽມ​ຢາມ ແລະ ຊຸກ​ຍູ້​ໂຄງ​ການກໍ່​ສ້າງ​ສູນ​ສາ​ທິດກະ​ສິ​ກຳ​ບ້ານ​ອົ່ງ, ເມືອງ​ຊຳ​ເໜືອ ເຊິ່ງ​ເປັນ​ໂຄງ​ການ​ຊ່ວຍ​ເຫຼືອຈາກ​ລັດ​ຖະ​ບານ​ຫວຽດ​ນາມ ແລະ ທຶນ​ສົມ​ທົບ​ຈາກ​ລັດ​ຖະ​ບານ​ລາວ ລວມ​ມູນ​ຄ່າ 44 ຕື້​ດົງ. ໃນ​ນັ້ນ, ເປັນ​ທຶນ​ຊ່ວຍ​ເຫຼືອ​ຂອງ ສ​ສ ຫວຽດ​ນາມ 39,8 ຕື້​ດົງ, ​ມີ 3 ກິດ​ຈະ​ກຳ​ຕົ້ນຕໍ ຄື: ກິດ​ຈະ​ກຳ​ການ​ລ້ຽງ​ງົວຕິດ​ພັນ​ກັບ​ການ​ປູກ​ຫຍ້າ, ກິດ​ຈະ​ກຳ​ລ້ຽງ​ໄກ່​ພັນ​ໄຂ່ ແລະ ພັນ​ຊີ້ນ ແລະ ກິດ​ຈະ​ກຳ​ການ​ປູກ​ໄມ້​ໃຫ້​ໝາກ ເປັນ​ຕົ້ນ: ໝາກ​ຜຸກ ແລະ ໝາກ​ສີ​ດາ. ພ້ອມນີ້, ​ຍັງຈະ​ໄດ້​ຊຸກ​ຍູ້​ທາງ​ດ້ານ​ຍຸດ​ທະ​ສາດກະ​ສິ​ກຳ​ທີ່​ເປັນ​ທ່າ​ແຮງ ເຊັ່ນ: ການ​ລ້ຽງ​ປາ​ໃນ​ນາ​ເຂົ້າ, ການ​ປູກ​ເຂົ້າ ແລະ ພືດ​ຜັກ​ອິນ​ຊີ, ນຳ​ພາ​ປະ​ຊາ​ຊົນ​ຜະ​ລິດ​ແນວ​ພັນ​ເຂົ້າ​ລຸ້ນ 3 ເປັນ​ຕົ້ນ ແມ່ນ​ແນວ​ພັນ​ເຂົ້າ​ໄກ່​ນ້ອຍ. ​ໂອ​ກາດນີ້, ທ່ານ ສອນ​ໄຊ ສີ​ພັນ​ດອນ ກໍ່​ໄດ້​ເນັ້ນ​ໃຫ້​ຄະ​ນະ​ຮັບ​ຜິດ​ຊອບ​ສູນ​ດັ່ງ​ກ່າວ ເອົາ​ໃຈ​ໃສ່​ສ້າງ​ໃຫ້​ສູນ​ແຫ່ງນີ້ ມີ​ຄວາມ​ຍືນ​ຍົງ ແລະ ກ້າວ​ໄປ​ສູ່​ການ​ກຸ້ມ​ຕົນ​ເອງ, ສາ​ມາດ​ສ້າງ​ລາຍ​ຮັບ​ໃຫ້​ແກ່​ສູນ ນັບ​ມື້​​ສູງ​ຂຶ້ນ, ພ້ອມ​ກັນ​ເບິ່ງ​ຄືນ​ຕື່ມ ການ​ຜະ​ລິດ​ເປັນ​ສິນ​ຄ້າເພື່ອ​ການ​ສົ່ງ​ອອກ ທີ່​ມີ​ຄວາມ​ຕ້ອງ​ການ​ຂອງ​ຕະ​ຫຼາດ ເປັນ​ຕົ້ນ ການ​ປູກ​ໄມ້​ໃຫ້​ໝາກ, ພະ​ຍາ​ຍາມ​ເກັບ​ກ່ຽວ​ເອົາ​ຄວາມ​ຮູ້ ນຳ​ຊ່ຽວ​ຊານ​ຫວຽດ​ນາມ ໃຫ້ຫຼາຍ​ທີ່​ສຸດ ເພື່ອ​ນຳມາ​ໝູນ​ໃຊ້ ແລະ ຍົກ​ລະ​ດັບ​ພື້ນ​ຖານ​ການ​ຜະ​ລິດ​ພາຍ​ໃນ​ແຂວງ ກໍ່​ຄື​ບັນ​ດາ​ແຂວງ​ອ້ອມ​ຂ້າງ ໃຫ້​ນັບ​ມື້​​ສູງ​ຂຶ້ນ.

ທ່ານ ສອນ​ໄຊ ສີ​ພັນ​ດອນ ພ້ອມ​ດ້ວຍ​ຄະນະ ຍັງ​ໄດ້​ເດີນທາງ​ໄປ​ຕິດຕາມ​ຊຸກຍູ້ ​ໂຄງການ​ຂຸ​ດຄົ້ນ-ປຸງ​ແຕ່ງ​ຖ່ານ​ຫີນ ​ເພື່ອ​ສະໜອງ​ໃຫ້​ແກ່​ໂຮງ​ໄຟຟ້າ​ພະລັງງານ​ຄວາມ​ຮ້ອນຈາກ​ຖ່ານ​ຫີນ ຊຶ່ງ​ຕັ້ງຢູ່​ໃນ​ເຂດ​ສຳ​ປະທານ 4 ບ້ານ​ຂອງ​ເມືອງ​ຊຳ​ເໜືອ, ຫ່າງ​ຈາກ​ເທ​ສະບາ​ນ​ເມືອງ 24 ກິ​ໂລ​ແມັດ, ມີກຳລັງ​ຕິດຕັ້ງ 600 ​ເມກາ​ວັດ(MW) ​ເປັນ​ການ​ລົງທຶນ​ຮູບ​ແບບ​ວິ​ສາ​ຫະກິດ​ປະສົມ ລາວ-​ຈີນ ​ໂດຍ​ແມ່ນ​ລັດຖະບານ​ລາວ​ຖື​ຮຸ້ນ 10%, ບໍລິສັດ ທີ່​ປຶກສາ​ດ້ານ​ການ​ລົງທຶນ ​ແລະ ກໍ່ສ້າງ​ເຂື່ອນ​ໄຟຟ້າ ຈຳກັດ​ຜູ້ດຽວ 15% ​ແລະ ບໍລິສັດ china international water & electric Corporatione ຖື​ຮຸ້ນ 75% ລວມມູນ​ຄ່າ​ການ​ລົງທຶນ 1 ຕື້​ໂດ​ລາ​ສະຫະລັດ. ປະຈຸ​ບັນ, ​ແມ່ນ​ຢູ່​ໃນ​ຂັ້ນຕອນ​ການ​ຊອກ​ຄົ້ນ-ສຳຫຼວດ ​ແລະ ດ້ານ​ເອກະສານ​ນິຕິ​ກຳ ຊຶ່ງ​ມີ​ຄວາມ​ຄືບໜ້າ​ໄປ​ແລ້ວ​ກວ່າ 30%.

- WhatsApp Image 2020 05 27 at 5 - ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ
- WhatsApp Image 2020 05 27 at 5 - ທ່ານຮອງນາຍົກລັດຖະມົນຕີ ສອນ​ໄຊ ສີ​ພັນ​ດອນ ​ຢ້ຽມ​ຢາມພື້ນ​ຖານ​ໂຄງ​ລ່າງຂອງແຂວງ​ຫົວ​ພັນ
error: Alert: ເນື້ອຫາຂ່າວມີລິຂະສິດ !!