ອັດຕະປື ຄືເມັດຄຳທຳມະຊາດ

- 33103048 627222804295810 3588136827220918272 n - ອັດຕະປື ຄືເມັດຄຳທຳມະຊາດ
- Untitled design - ອັດຕະປື ຄືເມັດຄຳທຳມະຊາດ

ຊັບສົມບັດທາງທຳມະຊາດ ອັນຮັ່ງມີຂອງອັດຕະປືນັ້ນ ໄດ້ເຮັດໃຫ້ນາຍທຶນນໍ້າລາຍຍ້ອຍ ແຕ່ຈະເຮັດແນວໃດໃຫ້ ຊັບໃນດິນສິນໃນນໍ້າຂອງແຂວງນີ້ມີຄ່າຕໍ່ການປັບປຸງຊີວິດການເປັນຢູ່ຂອງປະຊາຊົນທ້ອງຖິ່ນໃຫ້ດີຂຶ້ນ?

ຜ່ານມາພວກເຮົາໄດ້ຍິນການລົງທຶນຂອງຕ່າງປະເທດຢູ່ແຂວງນີ້ ໃນຂະແໜງຊັບພະຍາກອນທຳມະຊາດຢ່າງຫຼວງຫຼາຍ, ບໍ່ວ່າຈະເປັນການປູກຢາງພາລາ, ການຂຸດຄົ້ນບໍ່ແຮ່ ນອກນັ້ນ ຍັງໄດ້ຍິນການລັກລອບຕັດໄມ້, ສົ່ງໄມ້ທ່ອນອອກຕ່າງປະເທດທີ່ຜິດຂໍ້ຫ້າມຂອງລັດຖະບານເຮົາ ຢ່າງເນື່ອງນິດລຽນຕິດ ເຊິ່ງທັງໝົດເຫຼົ່ານັ້ນກາຍເປັນບົດຮຽນທີ່ມີຄ່າ ຢ່າໃຫ້ເຮົາຫຼົງທາງອີກ.

ອັດຕະປື ຍັງມີທ່າແຮງຢ່າງຫຼວງຫຼາຍ! ເມື່ອບໍ່ດົນຜ່ານມາ ຜູ້ຂຽນ ຮ່ວມກັບພະແນກກະສິກຳ ແລະປ່າໄມ້ ແຂວງ ແລະຂະແໜງການທີ່ກ່ຽວຂ້ອງຂອງເມືອງສະໜາມໄຊ ໄດ້ລົງເຮັດວຽກຢູ່ບາງບ້ານຂອງເມືອງ ເຊັ່ນ ບ້ານຈັນຕໍ, ບ້ານພອນມະນີ ເຊິ່ງສັງເກດເຫັນວ່າ ຕາມເສັ້ນທາງ ແຕ່ເມືອງ ສາມັກຄີໄຊ ຫາສະໜາມໄຊນັ້ນທຳມະຊາດ ປ່າໄມ້, ດິນຕອນຫຍ້າອັນຂຽວງາມ, ຫ້ວຍນໍ້າທີ່ໄຫຼເຢັນດີ ມີຄວາມພິດສະຫວາດຢ່າງຍິ່ງ!

ປ່າໄມ້ອັນຂຽວງາມຂອງອັດຕະປື ໂດຍສະເພາະເຂດສະໜາມໄຊນັ້ນມີຄຸນຄ່າຫຼາຍຢ່າງ, ນາຍບ້ານ ບ້ານ ພອນມະນີ ເວົ້າສູ່ຟັງວ່າ “ເຂົາເຈົ້າມີລາຍໄດ້ນຳ ການເກັບໝາກຈອງໄປຂາຍ ແລະ ເຄື່ອງປ່າຂອງດົງອື່ນໆ ເຊິ່ງເປັນບ່ອນຫາຢູ່ຫາກິນຂອງປະຊາຊົນແຕ່ໃດໆມາ”.

ນອກນັ້ນ ຕາມເສັ້ນທາງດັ່ງກ່າວ ຍັງມີຫ້ວຍນໍ້າທີ່ໄສ ສະອາດດີ ມີຄົນມັກພາກັນລອຍນໍ້າຫຼິ້ນ, ຫາປູຫາກິນເປັນປະຈຳ ເບິ່ງແລ້ວໜ້າອອນຊອນແທ້ໆ.

- Wave100S AD to Website 2020 0 - ອັດຕະປື ຄືເມັດຄຳທຳມະຊາດ

ຢູ່ເຂດນີ້ ດິນກໍດຳ ນໍ້າກໍຊຸ່ມ, ຊາວບ້ານປູກໝາກຖົ່ວລຽນ ທີ່ມີລົດຊາດດີເລີດ, ມີໝາກເງາະທີ່ຫວານແຊບຊ້ອຍ ແລະໝາກໄມ້ອື່ນໆທີ່ສາມາດປູກໄດ້ຢ່າງຂຽວງາມ ໃຫ້ໝາກດົກໜາ, ສະນັ້ນນາຍບ້ານ ຈຶ່ງເວົ້າສູ່ຟັງວ່າ “ເວົ້າລວມແລ້ວ ຖ້າໃຜໝັ່ນແມ່ນບໍ່ທຸກແລ້ວແລຢູ່ບ້ານເຮົາ, ປູກຫຍັງກໍງາມ ຫາອັນໃດກໍໄດ້ ແຕ່ສິ່ງດັ່ງກ່າວແມ່ນຍ້ອນຄວາມໂຊກດີແນວນຶ່ງກໍວ່າແມ່ນ ເພາະສາມສີ່ປີກ່ອນ ມີນາຍທຶນມາຂໍສຳປະທານເນື້ອທີ່ດິນຈຳນວນຫຼາຍຂອງບ້ານ ເພື່ອປູກຢາງພາລາ, ແລ້ວທາງເຈົ້າໜ້າທີ່ພາກລັດ ເພິ່ນກໍມາຖາມປະຊາຊົນ ວ່າ “ຮັບເອົາບໍ່” ໂດຍໃຫ້ຮູ້ວ່າ ປະຊາຊົນຈະມີວຽກເຮັດງານທຳ, ຈະໄດ້ຮັບເຄື່ອງຂອງລ້າໆ ທຳອິດໃຜກໍສະອອນ ແຕ່ນາຍບ້ານໄດ້ປະຕິເສດຢ່າງເດັດຂາດ ເຊິ່ງເຮັດໃຫ້ຊາວບ້ານມີບ່ອນທຳມາຫາກິນຄືທຸກມື້ນີ້”.

ທ່າແຮງທີ່ເຫັນຈະແຈ້ງຂອງເຂດນີ້ ກໍຄືການທ່ອງທ່ຽວທຳມະຊາດ ທີ່ໃຫ້ປະຊາຊົນເປັນເຈົ້າຂອງເອງນັ້ນແມ່ນຄັກທີ່ສຸດ, ຜູ້ຂຽນເຫັນຢູ່ ບ້ານນ້ອຍແຫ່ງນຶ່ງ ຂອງປະເທດ ຄອສຕາ ຣິການັ້ນ ຈາກພູຫົວໂລ້ນ ຮັກສາມາເປັນປ່າກໍຍັງສ້າງເປັນແຫຼ່ງທ່ອງທ່ຽວທຳມະຊາດ ດ້ວຍການຊ່ວຍເຫຼືອຈາກ ລັດຖະບານ ແລະຄູ່ຮ່ວມພັດທະນາ ເລີຍເຮັດໃຫ້ປະຊາຊົນ ເຊົາຈາກການເຮັດໄຮ່ມາ ໃຫ້ບໍລິການນັກທ່ອງທ່ຽວ, ເຮືອນໃຜຢູ່ໃນບ້ານກໍຫາກມີຢູ່ມີກິນ, ອັນນີ້ ກະເສີນວ່າ ບ້ານພອນມະນີ ກໍຄືບ້ານອື່ນໆ ຢູ່ເມືອງສະໜາມໄຊ ປ່າໄມ້ກໍໜາ, ດິນດອນຕອນຫຍ້າກໍອຸດົມສົມບູນ, ຫ້ວຍນໍ້າລຳທານແສນສວຍງາມ ກໍຍິ່ງຈະກາຍເປັນແຫຼ່ງທ່ອງທ່ຽວໜ້າຈັບໃຈ ໃຜເຫັນແລ້ວບໍ່ຢາກກັບແທ້ລະ.

ທຳມະຊາດທີ່ສ້າງມາດ້ວຍຄວາມງົດງາມອ່ອນຊ້ອຍແບບນີ້ ສົມທີ່ເປັນສົມບັດທີ່ຊົງຄຸນຄ່າແກ່ການອຳນວຍ ຊ່ວຍສ້າງຄວາມມັ່ງມີແກ່ຊາວບ້ານຢ່າງແທ້ຈິງ ແທນທີ່ຈະມອບໃຫ້ໃຜຄົນນຶ່ງຄອບຄອງ, ດ້ວຍມຸມມອງການເຫັນກວ້າງເບິ່ງໄກຂອງການນໍານັ້ນ ເຊື່ອແນ່ວ່າ ປະຊາຊົນຄົນອັດຕະປືແຫ່ງນີ້ຈະມີຊີວິດທີ່ດີ ຈາກເມັດຄຳຂອງທຳມະຊາດແຫ່ງນີ້ໃນອະນາຄົດອັນໃກ້.

- WhatsApp Image 2020 05 27 at 5 - ອັດຕະປື ຄືເມັດຄຳທຳມະຊາດ
- WhatsApp Image 2020 05 27 at 5 - ອັດຕະປື ຄືເມັດຄຳທຳມະຊາດ
error: Alert: ເນື້ອຫາຂ່າວມີລິຂະສິດ !!