ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ

- Gov solv many work - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ
- AGL banner - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ

ກອງປະຊຸມລັດຖະບານປະຈໍາເດືອນພຶດສະພາ 2018 ໄດ້ຈັດຂຶ້ນໃນວັນທີ 23 ນີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ. ກອງປະຊຸມໄດ້ປຶກສາຫາລື ແລະ ພິຈາລະນາຮັບຫລາຍບັນຫາສໍາຄັນຄື: ບົດລາຍງານສະພາບພົ້ນເດັ່ນຢູ່ພາຍໃນ ແລະ ຕ່າງປະເທດ, ມາດຕະການກະຕຸ້ນການຂະຫຍາຍຕົວຂອງເສດຖະກິດມະຫາພາກ, ຮ່າງກົດໝາຍວ່າດ້ວຍປະກັນສຸຂະພາບ ແລະ ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ).

ໃນໂອກາດນີ້, ທ່ານນາຍົກລັດຖະມົນຕີ ໄດ້ຍົກໃຫ້ເຫັນສະພາບການເຄື່ອນໄຫວວຽກງານໃນຜ່ານມາ, ໂດຍສະເພາະໃນເດືອນພຶດສະພານີ້ີ, ລັດຖະບານສຸມໃສ່ແກ້ໄຂບັນຫາສໍາຄັນ ເຊັ່ນ: ໄດ້ສຶບຕໍ່ແກ້ໄຂປະກົດການຫຍໍ້ທໍ້ຕ່າງໆຂອງສັງຄົມ, ໂດຍສະເພາະບັນຫາອຸປະຕິເຫດ, ຢາເສບຕິດ, ອັກຄີໄພ ແລະ ຄວາມເປັນລະບຽບຮຽບຮ້ອຍຕ່າງໆໃນສັງຄົມ, ພ້ອມຕິດຕາມຢ່າງໃກ້ສິດວຽກງານຮັກສາຄວາມສະຫງົບຕາມຊາຍແດນ ແລະ ຈຸດຫລໍ່ແຫລມຕ່າງໆ, ໄດ້ດໍາເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອປຶກສາຫາລື ແລະ ພິຈາລະນາແຜນເກັບລາຍຮັບງົບປະມານ ແລະ ມາດຕະການເກັບລາຍຮັບ-ຄຸ້ມຄອງລາຍຈ່າຍງວດ 2 ແລະ ງວດ 3 ປີ 2018, ບັນຫາການເບີກຈ່າຍເງິນເດືອນ ແລະ ເງິນອຸດໜູນພະນັກງານຂັ້ນບ້ານ, ມາດຕະການຄຸ້ມຄອງອັດຕາເງິນເຟີ້ ແລະ ສະພາບການເພີ່ມຂຶ້ນຂອງລາຄານໍ້າມັນເຊື້ອໄຟທີ່ສົ່ງຜົນກະທົບຕໍ່ອັດຕາເງິນເຟີ້, ການປັບປຸງບັນດາລະບຽບການ ແລະ ກົນໄກປະສານງານໃນການລົງທຶນ ແລະ ດໍາເນີນທຸລະກິດຢູ່ ສປປ ລາວ, ການຊຸກຍູ້ການຈັດຕັ້ງປະຕິບັດໂຄງ ການຊ່ວຍເຫລືອຈາກລັດຖະບານຫວຽດນາມ ແລະ ສປ ຈີນ, ລວມທັງຄວາມຄືບໜ້າໃນການໂອນໂຄງການລົງທຶນບໍ່ແຮ່ຈາກກອງທຶນພັກມາຂຶ້ນກັບການຄຸ້ມຄອງຂອງລັດຖະບານ, ການປັບປຸງລັດວິສາຫະກິດໄຟຟ້າລາວ, ການບິນລາວ ແລະ ພິຈາລະນາໂຄງການລົງທຶນຈໍານວນໜື່ງ. ນອກນີ້, ນາຍົກລັດຖະມົນຕີ, ຮອງນາຍົກລັດຖະມົນຕີ ແລະ ສະມາຊິກລັດຖະບານ ກໍໄດ້ລົງຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການເກັບລາຍຮັບຢູ່ທ້ອງຖິ່ນຕ່າງໆ ແລະ ໃນເດືອນມິຖຸນານີ້, ນາຍົກລັດຖະມົນຕີ ໄດ້ເນັ້ນໃຫ້ສະມາຊິກລັດຖະບານສືບຕໍ່ເພີ່ມທະວີຄວາມເອົາໃຈໃສ່ວຽກງານຮັກສາຄວາມສະຫງົບ ແລະ ເປັນລະບຽບຮຽບຮ້ອຍຂອງສັງຄົມ, ສືບຕໍ່ຕິດຕາມຢ່າງໃກ້ຊິດສະພາບການພາກພື້ນ ແລະ ສາກົນທີ່ມີການຫັນປ່ຽນຢ່າງສະລັບຊັບຊ້ອນ, ໃຫ້ບັນດາຂະແໜງການ ແລະ ພາກສ່ວນກ່ຽວຂ້ອງເອົາໃຈໃສ່ເຊື່ອມຊືມ, ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກເທື່ອທີ 6 ສະໄໝທີ X, ສືບຕໍ່ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ໄປຕາມແຜນການວາງໄວ້, ໃຫ້ບັນດາຂະແໜງການ ແລະ ພາກສ່ວນກ່ຽວຂ້ອງຕ່າງໆເອົາໃຈໃສ່ກະກຽມລາຍງານ ແລະ ຊີ້ແຈງອະທິບາຍ ຫລື ຕອບຄໍາຊັກຖາມຂອງກອງປະຊຸມສະພາແຫ່ງຊາດສະໄໝສາມັນເທື່ອທີ 5 ເຊິ່ງຈະຈັດຂຶ້ນ ໃນເດືອນມິຖຸນາທີ່ຈະເຖິງນີ້ໃຫ້ລະອຽດຊັດເຈນ, ໃຫ້ຂະແໜງການ ແລະ ທ້ອງຖິ່ນໃນທົ່ວປະເທດເອົາໃຈໃສ່ກະກຽມຮອບດ້ານໃຫ້ແກ່ການຜະລິດລະດູຝົນເພື່ອໃຫ້ທັນກັບລະດູການ, ໂດຍປະສານສົມທົບໃຫ້ຄຳແນະນຳ, ຊຸກຍູ້ຊ່ວຍເຫລືອປະຊາຊົນ ແລະ ຜູ້ປະກອບການໃນການກະກຽມລະດູການຜະລິດ, ພ້ອມທັງເຝົ້າລະວັງພະຍາດລະບາດສັດ-ລະບາດພືດຕ່າງໆທີ່ອາດເກີດຂຶ້ນໃນລະດູຝົນນີ້, ນັບທັງການແຜ່ລະບາດຂອງຕັກກະແຕນຢູ່ບັນດາແຂວງພາກເໜືອ ແລະ ໃຫ້ຂໍ້ມູນຂ່າວສານ, ພ້ອມທັງຄຳແນະນຳ ແລະ ການເຊື່ອມຕໍ່ການຜະລິດກັບຕະຫລາດພາຍໃນ ແລະ ຕ່າງປະເທດ. ໃຫ້ຂະແໜງການກ່ຽວຂ້ອງເປັນເຈົ້າການສ້າງຂະບວນການໃຫ້ມີບັນຍາກາດຟົດຟື້ນ, ໂດຍໃຫ້ທຸກພາກສ່ວນ ແລະ ທົ່ວປວງຊົນລາວໄດ້ມີສ່ວນຮ່ວມໃນກິດຈະກໍາຕ່າງໆ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ເພື່ອເປັນການສ້າງຈິດສໍານຶກທີ່ດີໃຫ້ແກ່ເດັກນ້ອຍໃຫ້ຮູ້ຄຸ່ນຄ່າ, ຮັກຫອມ ແລະ ປົກປັກຮັກສາທໍາມະຊາດ ແລະ ປ່າໄມ້ຂອງປະເທດເຮົາ. ນອກນີ້, ກໍໃຫ້ເອົາໃຈໃສ່ສ້າງເງື່ອນໄຂ, ສະພາບແວດລ້ອມ ແລະ ກິດຈະກຳດີໆ ໃນໄລຍະພັກຮຽນ ເພື່ອພັດທະນານັກຮຽນໃຫ້ເປັນຄົນດີ ແລະ ເຕີບໃຫຍ່ເປັນພົນລະເມືອງດີ ຂອງປະເທດຊາດ.

- Wave100S AD to Website 2020 0 - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ
- lattana banner 1 - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ
- lattana banner - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ
-    AD conten website - ເດືອນພຶດສະພານີ້ລັດຖະບານໄດ້ສຸມໃສ່ແກ້ໄຂຫລາຍວຽກສໍາຄັນ
error: Alert: ເນື້ອຫາຂ່າວມີລິຂະສິດ !!