ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ

- japannn - ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ
- Untitled design - ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ

ໃນໂອກາດຂຶ້ນມີຄໍາເຫັນກ່າວເປີດກອງປະຊຸມສໍາມະນາເພື່ອສົ່ງເສີມການທ່ອງທ່ຽວລາວທີ່ນະຄອນຫລວງໂຕກຽວປະເທດຍີປຸ່ນໃນວັນທີ 28 ພຶດສະພານີ້, ທ່ານລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ບໍ່ແສງຄໍາ ວົງດາລາ ໄດ້ເຊີນຊວນນັກທຸລະກິດ ແລະ ປະຊາຊົນຊາວຍີປຸ່ນເຂົ້າມາຢ້ຽມຢາມທ່ອງທ່ຽວ ສປປ ລາວ ໃຫ້ຫລາຍຂຶ້ນ, ເພື່ອຊ່ວຍຊຸກຍູ້ສົ່ງເສີມການທ່ອງທ່ຽວຂອງລາວໃຫ້ບັນຍາກາດຟົດຟື້ນ.

ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ:​ ການທ່ອງທ່ຽວຖື​ເປັນ​ຂະ​ແໜງ​ການ​ເສດຖະກິດ​ໜຶ່ງ ​ທີ່​ມີ​ການ​ຂະຫຍາຍຕົວ​ຢ່າງ​ວ່ອງ​ໄວ ​ແລະ ກວ້າງຂວາງ​ຢູ່​ໃນ​ບັນດາ​ປະ​ເທດ​ໃນ​ໂລກ, ​ໃນ​ຊຸມ​ປີຜ່ານມາ,​ ລັດຖະບານລາວ ​ເຫັນ​ໄດ້​ຄວາມ​ສຳຄັນ​ດັ່ງກ່າວ ​ແລະ ຖື​ເປັນ​ວຽກງານບຸລິ​ມະ​ສິດ​​ສຳຄັນ​ໃນ​ການ​ຊຸກຍູ້​ການ​ພັດທະນາ​ເສດຖະກິດ-ສັງຄົມ​ຂອງ​ຊາດ, ປະກອບສ່ວນ​ເຂົ້າ​ໃນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ແກ່​ປະຊາຊົນ​ໃນ​ຂົງ​ເຂດ​ການ​ບໍລິການ​ທີ່​ຕິດ​ພັນ​ກັບ​ການທ່ອງທ່ຽວ. ດ້ວຍ​ເຫດ​ນີ້, ສປປ ລາວ ຈຶ່ງ​ໄດ້​ເອົາ​ໃຈ​ໃສ່​ເປີດ​ກວ້າງ​ການ​ພົວພັນ​ຮ່ວມ​ມື​ກັບ​ພາຍ​ນອກ, ​ໂດຍ​ສະ​ເພາະ​ແມ່ນ​ຮ່ວມ​ກັບ​ບັນດາ​ປະ​ເທດ​ເພື່ອນ​ມິດ​ໃນ​ພາກພື້ນອາຊີ ລວມທັງ​ຍີ່ປຸ່ນ, ​ເພື່ອ​ພັດທະນາ ​ແລະ ສົ່ງ​ເສີມ​ການທ່ອງທ່ຽວ​ຂອງ​ລາວ​ໃຫ້​ນັບ​ມື້​ເຂັ້ມ​ແຂງ ​ແລະ ​ຂະຫຍາຍຕົວ​ດີ​ຂຶ້ນ​ເລື້ອຍໆ.

ທ່ານລັດຖະມົນຕີວ່າ: ສປປ ລາວ ​ແລະ ຍີ່ປຸ່ນ, ມີ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ທີ່​ເປັນ​ມູນ​ເຊື້ອມາ​ແຕ່​ດົນ​ນານ​ຢ່າງ​ສະໜິດ​ແໜ້ນ. ​ໃນ​​ປີ 2015 ລັດຖະບານ​ລາວ ​ແລະ ​ຍີ່ປຸ່ນ, ​ໄດ້​ພ້ອມ​ກັນ​ສະ​ເຫລີ​ມສະຫລອງ​ການ​ສ້າງຕັ້ງສາຍ​ພົວພັນ​ທາງ​ການ​ທູດລາວ-ຍີ່ປຸ່ນ ຄົບຮອບ 60 ປີ (5 ມີນາ 1955-5 ມີນາ 2015) ​ແລະ ຕະຫລອດ 63 ປີຜ່ານມາ ​ໄດ້​ມີ​ການ​ໄປມາຫາສູ່​ຂອງ​ປະຊາຊົນ​ທັງ 2 ປະ​ເທດ ​ແລະ ມີ​ການ​ແລກປ່ຽນ​ການ​ຢ້ຽມຢາມ​ຂອງ​ການ​ນຳ​ຂັ້ນສູງຂອງສອງຝ່າຍຢ່າງ​ເປັນ​ປົກກະຕິ. ພ້ອມ​ນີ້, ລັດຖະບານລາວ ຍັງ​ໄດ້​ເຫັນ​ດີ​ຍົກ​ເວັ້ນວີ​ຊາ​ເຂົ້າ ສປປ ລາວ ​ໃຫ້​ແກ່​ປະຊາຊົນ​ຍີ່ປຸ່ນເພື່ອ​ເປັນ​ການ​ຊຸກຍູ້​ສົ່ງ​ເສີມ​ການທ່ອງທ່ຽວ ​ແລະ ​ເພື່ອ​ອຳນວຍ​ຄວາມ​ສະດວກໃນການ​ເຂົ້າມາ​ທ່ອງທ່ຽວ ແລະ ມາ​ດຳ​ເນີນ​ທຸລະ​ກິດ​ໃນ​ລາວ​ໃຫ້​ນັບ​ມື້​ຫລາຍ​ຂຶ້ນ, ອີງຕາມ​ຕົວ​ເລກ​ສະຖິຕິ​ນັກ​ທ່ອງ​ທ່ຽວ​ຍີ່ປຸ່ນ​ມາ​ທ່ຽວ​ລາວມີ 42 ພັນ​ກວ່າ​ຄົນ​ໃນ​ປີ 2012 ​ແລະ ເກືອບຮອດ 50 ພັນຄົນໃນປີ 2016, ​ແຕ່ໃນປີ 2017 ​ເຫັນ​ວ່າຕົວເລກດັ່ງກ່າວ​ຫລຸດ​ລົງຢູ່ທີ່ 32 ພັນ​ກວ່າ​ຄົນ, ດ້ວຍ​ເຫດຜົນນີ້,​​ໃນ​ໄລຍະ​ຜ່ານ​ມາ, ສປປ ລາວ ພວກ​ເຮົາ​ໄດ້​ເຂົ້າຮ່ວມ​ງານ​ວາງສະ​ແດງ​ການທ່ອງທ່ຽວ​ສາກົນ​ຢ່າງ​ສະໝໍ່າສະ​ເໝີ ລວມທັງ​ງານ​ວາງສະ​ແດງ​ການທ່ອງທ່ຽວ JATA ​ແລະ ບຸນ​ລາວ​ທີ່​ນະຄອນຫລວງ​ໂຕ​ກຽວ, ທີ່ໄດ້​ເລີ່ມຈັດມາແຕ່​ປີ 2007 ​ແລະ ປີ​ນີ້​ກໍ​ເປັນຄັ້ງທີ 8 ​ແລ້ວ ​ເພື່ອ​ໂຄສະນາ​ການທ່ອງທ່ຽວ​ລາວ​ໃຫ້​ປະຊາຊົນ​ຍີ່ປຸ່ນ​ໄດ້​ຮັບ​ຮູ້​​ຫລາຍ​ຂຶ້ນ. ພິ​ເສດ​ປີ​ນີ້, ສປປ ລາວ ​ໄດ້​ເປີດ​ປີ​ທ່ອງ​ທ່ຽວ​ລາວ 2018 ​ເພື່ອ​ຊ່ວຍ​ຊຸກຍູ້ ​ແລະ ສົ່ງ​ເສີມ​ວຽກ​ງານ​ການທ່ອງທ່ຽວ​ຂອງ​ລາວ​ໃຫ້​ມີ​ຄວາມພົ້ນ​ເດັ່ນ​ຂຶ້ນ, ​ໂດຍ​ຈັດ​ໃຫ້​ມີ​ຫລາກ​ຫລາຍ​ຮູບ​ແບບ​ກິດຈະກຳ​ໃນ​ທົ່ວ​ປະ​ເທດ ​ແລະ ຢູ່​ຕ່າງປະ​ເທດ​ຈຳນວນ​ໜຶ່ງ, ​ເພື່ອ​ຮອງ​ຮັບ ​ແລະ ດຶງ​ດູດ​ນັກ​ທ່ອງ​ທ່ຽວ​ຈາກ​ພາຍ​ໃນ ​ແລະ ຕ່າງປະ​ເທດ ລວມທັງ​ນັກ​ທ່ອງ​ທ່ຽວ​ຍີ່ປຸ່ນ​ໃຫ້​ມາ​ທ່ຽວ​ລາວ​ໃຫ້​ຫລາຍ​ຂຶ້ນ.

- Wave100S AD to Website 2020 0 - ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ

ທ່ານລັດຖະມົນຕີ ໄດ້ຍົກໃຫ້ເຫັນວ່າ: ປະ​ເທດ​ລາວ​ມີ​ຮີດຄອງ​ປະ​ເພນີ ​ແລະ ຂະ​ນົບ​ທຳນຽມ​ຂອງ​ປະຊາຊົນ​ບັນດາ​ເຜົ່າ​ທີ່​ຫລາກ​ຫລາຍ, ມີ​ທຳ​ມະ​ຊາດ​ທີ່​ສວຍ​​ງາມ ​ແລະ ອຸດົມສົມບູນ, ມີ​ປູ​ສະ​ນີຍະສະ​ຖານ ​ແລະ ​ແຫ​ລ່ງທ່ອງ​ທ່ຽວ​ທີ່​ໜ້າ​ສົນ​ໃຈ​ຫລາຍ​ແຫ່ງ ​ເຊັ່ນ: ​ເມືອງ​ມໍລະດົກ​ໂລກ​ຫລວງ​ພະ​ບາງ, ມໍລະດົກ​ໂລກ​ວັດ​ພູ​ຈຳປາ​ສັກ ​ທີ່​ມີ​ຄວາມ​ບູຮານ​ເກົ່າ​ແກ່, ທົ່ງ​ໄຫ​ຫີນແຂວງ​ຊຽງ​ຂວາງ ​ແລະ ​ເຂດ​ປ່າ​ສະຫງວນ​ພູ​ຫີນ​ໜາມ​ໜໍ່​ແຂວງ​ຄຳ​ມ່ວນ ທີ່​ພວມ​ຢູ່​ໃນ​ຂັ້ນຕອນ​ຄົ້ນຄວ້າ​ພິຈາລະນາ​ຂອງອົງການ​ອຸຍ​ເນສ​ໂກ​ໃຫ້​ເປັນ​ມໍລະດົກ​​ໂລກ​ຕື່ມ​ອີກ ແລະ ​ເມື່ອ​ບໍ່​ດົນ​ມາ​ນີ້, ສປປ ລາວ ພວກເຮົາມີ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງ​ທີ່​ໄດ້​ພ້ອມ​ກັນສະ​ເຫລີ​ມສະຫລອງ “ສຽງ​ແຄນ​ເຊື້ອຊາດ​ລາວ​ເປັນ​ມໍລະດົກ​ທາງ​ດ້ານ​ວັດທະນະທຳ​ນາມ​ມະ​ທຳ​ຂອງ​ມວນ​ມະນຸດ​ໂລກ” ​ໂດຍ​ອົງການ​ອຸຍ​ເນສ​ໂກ, ອັນ​ໄດ້​ປະກອບສ່ວນ​ສ້າງ​ຄວາມ​ສົນ​ໃຈ​ໃຫ້​ແກ່​ຫລາຍ​ຄົນ​ໃນ​ທົ່ວ​ໂລກ​ຮັບ​ຮູ້​ກ່ຽວ​ກັບ​ ສປປ ລາວ ​ຫລາຍ​ຂຶ້ນຕື່ມ​ອີກ ແລະ ​ໃນ​ສະພາບ​ລວມທີ່​ກ່າວ​ມາ​ນັ້ນ, ຂ້າພະ​ເຈົ້າ​ເຊື່ອ​ໝັ້ນວ່າ: ກອງ​ປະຊຸມ​ສຳ​ມະ​ນາຄັ້ງນີ້​, ຈະ​ເປັນ​ໂອກາດ ​ແລະ ນິມິດ​ໝາຍ​ອັນ​ສຳຄັນ ພ້ອມ​ທັງ​ເປັນ​ຂໍ້​ລິ​ເລີ່​ມ​ໃໝ່​ອັນ​ໜຶ່ງ ​ເພື່ອ​ປະກອບສ່ວນ​ເຂົ້າ​ໃນ​ການ​ເພີ່ມ​ທະວີ​ການ​ເສີມ​ສ້າງສາ​ຍພົວພັນ​ມິດຕະພາບ ​ແລະ ການ​ຮ່ວມ​ມື​ລະຫວ່າງ 2 ປະ​ເທດ​ທີ່​ເປັນ​ມູນ​ເຊື້ອທີ່​ດີ​ມາ​ແຕ່​ດົນ​ນານ​ໃຫ້​ນັບ​ມື້​ຈະ​ເລີ​ນງອກ​ງາມ​ຍິ່ງໆ​ຂຶ້ນ ​ເພື່ອ​ສົ່ງ​ເສີມ​ການ​ຮ່ວມ​ມື​ດ້ານ​ການທ່ອງທ່ຽວ​ລະຫວ່າງ 2 ປະ​ເທດລາວ-ຍີ່ປຸ່ນ​ ​ໃຫ້​ນັບ​ມື້​ເຂັ້ມ​ແຂງ ​ແລະ ກວ້າງຂວາງ​, ທັງ​ເປັນ​ເວທີ​ສົນທະນາ​ແລກປ່ຽນ​ບົດຮຽນ, ປະສົບ​ການ ​ແລະ ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ​ເພື່ອ​ສ້າງ​ຄວາມ​ເຂົ້າ​ໃຈ​ລະຫວ່າງ​ພາກ​ລັດ ​ແລະ ເອກະ​ຊົນ​ຂອງ​ 2 ປະ​ເທດ​​ເຮົາ ​ເພື່ອ​ພ້ອມ​ກັນ​ຄົ້ນຄວ້າ​​ເບິ່ງ​ສະພາບ​ຄວາມ​ຕ້ອງການ​ຕົວ​ຈິງ, ຊອກ​ຫາ​ວິທີ​ການ​ແກ້​ໄຂ​ສິ່ງ​ອຸດ​ຕັນ ​ເພື່ອ​ເຮັດ​ໃຫ້ການ​ທ່ອງ​ທ່ຽວລາວ-ຍີ່ປຸ່ນນັບ​ມື້​ຂະຫຍາຍຕົວ​ຍິ່ງໆ​ຂຶ້ນ.

- WhatsApp Image 2020 05 27 at 5 - ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ
- WhatsApp Image 2020 05 27 at 5 - ລັດຖະມົນຕີ ຖວທ ເຊີນຊວນຊາວຍີ່ປຸ່ນທ່ອງທ່ຽວຢ້ຽມຢາມລາວໃຫ້ຫລາຍຂຶ້ນ
error: Alert: ເນື້ອຫາຂ່າວມີລິຂະສິດ !!