ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ

- Untitled design - ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ

ອາ​ເມ​ລິ​ກາ​ກຽມ​ອອກ​ມາດ​ຕະການ​ຂວ້ຳບາດ​ເພີ່ມ​ອີກ ​ແລະ ​ໃຊ້ການ​ທູດ​ກົດ​ດັນ​ໃຫ້ ສປປ ​ເກົາຫລີ ຢຸດ​ໂຄງການ​ພັດທະນາ​ນິວ​ເຄຼຍ ​ແລະ ລູກ​ສອນ​ໄຟ.

ກົນລະຍຸດ​ຂອງ​ປະທານາທິບໍດີ ​ໂດ​ນັນ ທຣຳ ຖືກ​ປະກາດ​ພາຍຫລັງ​ການ​ບັນ​ລະ​ຍາຍ​ສະຫລຸບ​ຕໍ່ສະມາຊິກ​ວຸດ​ທິສະພາ​ອາ​ເມ​ລິ​ກາ 100 ຄົນ.

ກ່ອນ​ໜ້າ​ນີ້, ຜູ້​ບັນຊາ​ການ​ກອງທັບ​ອາ​ເມ​ລິ​ກາ​ໃນ​ພາກພື້ນປາຊີຟິກ ​ໄດ້​ກ່າວ​ປົກ​ປ້ອງ​ການ​ສົ່ງ​ລະບົບ​ປ້ອງ​ກັນ​ລູກ​ສອນ​ໄຟ​ໄປ​ຕິດຕັ້ງຢູ່ ສ.​ເກົາຫລີ ​ໂດຍ​ຄວາມ​ເຄັ່ງ​ຕຶງ​ພວມ​ເພີ່ມ​ຂຶ້ນ ທ່າມກາງ​ຄວາມ​ກັງວົນ​ວ່າ: ສປປ ​ເກົາຫລີ ພວມ​ວາງ​ແຜນ​ຈະ​ທົດ​ລອງ​ອາວຸດ​ເທື່ອ​ໃໝ່.

ຖະ​ແຫລ​ງການ​ຮ່ວມ​ຂອງ​ທ່ານ ​ເຣັກ ທິວ​ເລີ​ສັນ ລັດຖະມົນຕີ​ຕ່າງປະ​ເທດ​ອາ​ເມ​ລິ​ກາ, ທ່ານ ຈິ​ມ ​ແມດ​ທິສ ລັດຖະມົນຕີ​ປ້ອງ​ກັນ​ປະ​ເທດ ​ແລະ ທ່ານ ​ແດນ ​ໂຄສ ຜູ້ອຳນວຍການ​ສຳນັກງານ​ຂ່າວ​ແຫ່ງ​ຊາດ​ອາ​ເມ​ລິ​ກາ ລະບຸ​ວ່າ: ອາ​ເມ​ລິ​ກາ​ຕ້ອງການ​ໃຫ້​ເກີດ​ສະຖຽນ​ລະ​ພາບ ​ແລະ ການ​ປົດ​ອາວຸດ​ນິວ​ເຄຼຍຢ່າງສັນຕິ​ຢູ່​ແຫລມ​ເກົາຫລີ.

ຖະ​ແຫລ​ງການ​ຂອງ​ອາ​ເມ​ລິ​ກາ ລະບຸ​ວ່າ: ພວກ​ເຮົາ​ຍັງ​ເປີດ​ຮັບ​ການ​ເຈລະຈາ ​ເພື່ອ​ໃຫ້​ບັນລຸ​ເປົ້າໝາຍ​ນັ້ນ, ​ແຕ່​ພວກ​ເຮົາ​ກໍ​ກຽມພ້ອມ ​ເພື່ອ​ປ້ອງ​ກັນ​ຕົນ​ເອງ ​ແລະ ພັນທະ​ມິດ. ​ເປົ້າໝາຍ​ຂອງ​ປະທານາທິບໍດີ ຄື​ການ​ກົດ​ດັນ ສປປ ​ເກົາຫລີ ​ໃຫ້​ຍົກ​ເລີກ​ໂຄງການ​ນິວ​ເຄຼຍ, ລູກ​ສອນ​ໄຟ ​ແລະ ຢຸດ​ການ​ແຜ່​ກະຈາຍ​ອາວຸດ ​ໂດຍ​ໃຊ້​ວິທີ​ຂວ້ຳບາດ​ທາງ​ເສດຖະກິດ​ເພີ່ມ​ອີກ ​ແລະ ​ໃຊ້​ມາດ​ຕະການ​ທາງ​ການ​ທູດ​ຮ່ວມ​ກັບປະ​ເທດ​ພັນທະ​ມິດ ​ແລະ ຫຸ້ນ​ສ່ວນ​ຂອງ​ພວກ​ເຮົາ.
- 95804208 59a1b048 326c 4feb 9f82 19e735a30c62 - ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ

ທ່ານ ບາຣບາຣາ ​ເພ​ລັດ ອາ​ເຊີ ນັກ​ຂ່າວ BBC ປະຈຳ​ນະຄອນຫລວງ​ວໍ​ຊິງ​ຕັນ ຂອງ​ອາ​ເມ​ລິ​ກາ ພວມ​ກັງວົນ​ຕໍ່​ຄວາມ​ກ້າວໜ້າ​ໃນ​ເຕັກ​ໂນ​ໂລ​ຊີ​ດ້ານ​ປ້ອງ​ກັນ​ປະ​ເທດ​ຂອງ ສປປ ​ເກົາຫລີ ​ເຊິ່ງອາດ​ຈະ​ມີ​ຂີດ​ຄວາມ​ສາມາດ​ໂຈມ​ຕີ​ອາ​ເມ​ລິ​ກາ ດ້ວຍ​ຫົວ​ຮົບ​ນິວ​ເຄຼຍ​ໄດ້​ກ່ອນ​ວາລະ​ການ​ດຳລົງ​ຕຳ​ແໜ່​ງຂອງ​ປະທານາທິບໍດີ ທຣຳ ຈະ​ໝົດ​ລົງ.

ຖ້າ​ອາ​ເມ​ລິ​ກາ​ຈະ​ແຊກ​ແຊງ​ດ້ວຍ​ການ​ທະຫານ ​ເພື່ອຢັບຢັ້ງຄວາມ​ສ່ຽງ​ນັ້ນ ຈະ​ຕ້ອງ​ຖືກ​ຕໍ່ຕ້ານ​ທ່າມກາງ​ອັນຕະລາຍ, ​ແຕ່​ປະທານາທິບໍດີ ທຣຳ ​ໄດ້​ພະຍາຍາມ​ໃຊ້​ວິທີການ​ເວົ້າ​ເພື່ອ​ສື່ສານ​ວ່າ: ນີ້​ເປັນຄວາມ​ສ່ຽງ​ທີ່​ເຊື່ອ​ຖື​​ໄດ້.

- Wave100S AD to Website 2020 0 - ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ

ກຸນ​ແຈ​ສຳຄັນ​ຂອງ​ແຜນ​ນີ້ ຄື​ການ​ກົດ​ດັນ​ໃຫ້​ຈີນ​ໃຊ້​ອິດ​ທິພົນ​ໄປ​ກົດ​ດັນ​ໃຫ້ ສປປ ​ເກົາຫລີ ຍົກ​ເລີກ​ໂຄງການ​ອາວຸດ​ນິວ​ເຄຼຍ ​ເຖິງ​ວ່າ​ຖະ​ແຫລ​ງການ​ຂອງ​ອາ​ເມ​ລິ​ກາ​ຈະ​ລະບຸ​ວ່າ: ​ເປີດ​ຮັບ​ການ​ເຈລະຈາ, ​ແຕ່​ຫລາຍ​ຝ່າຍ ກະທັ້ງຜູ້​ຊ່ຽວຊານ​ຢູ່​ນະຄອນຫລວງ​ວໍ​ຊິງ​ຕັນ​ເອງ ​ເບິ່ງ​ວ່າ​ລັດຖະບານ ສປປ ​ເກົາຫລີ ຍັງ​ບໍ່​ມີ​ທາງ​ຍອມຮັບ​ເງື່ອນ​ໄຂ​ດັ່ງກ່າວ.

ທ່ານ ຄຣິສ​ໂຕ​ເຟີ ຄູນ​ສ໌ ສະມາຊິກ​ວຸດ​ທິສະພາ​ຈາກ​ພັກ​ເດ​ໂມ​ແຄຣດ ກ່າວ​ຕໍ່​ນັກ​ຂ່າວ​ວ່າ: ມີ​ການ​​ເວົ້າ​ເຖິງ​ທາງ​ເລືອກ​ດ້ານ​ການ​ທະຫານ​ລະຫວ່າງ​ການບັນ​ລະ​ຍາຍ​ສະຫລຸບ​ຂອງ​ປະທານາທິບໍດີ ​ໂດຍ​ທ່ານ​ຮູ້ສຶກ​ວ່າ: ​ເປັນ​ການ​ບັນ​ລະ​ຍາຍ​ສະຫລຸບ​ທີ່​ສຸຂຸມ ​ເຊິ່ງມີ​ຄວາມ​ຈະ​ແຈ້ງວ່າ: ລັດຖະບານ​ອາ​ເມ​ລິ​ກາ​ຄິດ ​ແລະ ວາງ​ແຜນ​ເພື່ອ​ກໍລະນີ​ຈຳ​ເປັນ​ຈະ​ຕ້ອງ​ໃຊ້​ທາງ​ເລືອກ​ດ້ານ​ການ​ທະຫານ ​ແລະ ກົນລະຍຸດ​ທາງ​ການ​ທູດ​ກໍ​ເໝາະ​ສົມ​ຕໍ່​ຄວາ​ມສ່ຽງ​ແລ້ວ.

​ເຖິງ​ຢ່າງ​ໃດ​ກໍ​ຕາມ, ປັດຈຸບັນ​ນີ້ ສປປ ​ເກົາຫລີ ພວມ​ຖືກ​ສະຫະ​ປະຊາ​ດ​ໃຊ້​ມາດ​ຕະການ​ຂວ້ຳບາດ​ທີ່​ເຂັ້ມງວດ​ຕໍ່​ໂຄງການ​ອາວຸດ​ຢູ່​ແລ້ວ.

ກ່ອນ​ໜ້າ​ນີ້, ພົນ​ເຮືອ​ເອກ​ແຮຣີ ​ແຮ​ຣິສ ຜູ້​ບັນຊາ​ການ​ກອງທັບ​ອາ​ເມ​ລິ​ກາ​ພາກພື້ນປາຊີ​ຟິກ ກ່າວ​ວ່າ: ອາ​ເມ​ລິ​ກາ​ກຽມພ້ອມ​ດ້ວຍ​ເຕັກ​ໂນ​ໂລ​ຊີ​ດີ​ທີ່​ສຸດ ​ເພື່ອ​ກຳຈັດ​ຄວາມ​ສ່ຽງ​ໃດໆ​ກໍ​ຕາມ​ຈາກ​ລູກ​ສອນ​ໄຟ ​ແລະ ອ້າງ​ວ່າການ​ຕິດຕັ້ງລະບົບ​ປ້ອງ​ກັນ​ລູກ​ສອນ​ໄຟ THAAD ຢູ່ ສ.​ເກົາຫລີ ມີ​ຈຸດປະສົງ​ເພື່ອ​ໃຫ້​ທ່ານ ກິມຈຸ​ງອິນ ຜູ້ນຳ ສປປ ​ເກົາຫລີ ຄົ້ນຄິດ​ຄືນ​ໃໝ່. ພົນ​ເຮືອ​ເອກ​ ​ແຮຣິສ ​ເຊື່ອ​ວ່າ: ສປປ ​ເກົາຫລີ ຈະ​ພະຍາຍາມ​ໂຈມ​ຕີ​ອາ​ເມ​ລິ​ກາ​ທັນທີ​ທີ່​ມີ​ຂີດ​ຄວາມ​ສາມາດ​ທາງ​ດ້ານ​ການ​ທະຫານ.

ສ່ວນ​ຈີນ​ເບິ່ງວ່າ: ການ​ຕິດຕັ້ງລະບົບ​ປ້ອງ​ກັນ​ລູກ​ສອນ​ໄຟ THAAD ຈະ​ສົ່ງ​ຜົນ​ກະທົບ​ຕໍ່​ສະຖຽນ​ລະ​ພາບ ​ແລະ ຢູ່ ສ.​ເກົາຫລີ ​ເອງ​ກໍ​ມີ​ຜູ້​ອອກ​ມາ​ປະ​ທ້ວງ ​ເຊິ່ງ​ເຮັດ​ໃຫ້​ມີ​ຜູ້​ໄດ້​ຮັບ​ບາດ​ເຈັບ 3 ຄົນ ລະຫວ່າງ​ປະ​ທະ​ກັບ​ຕຳຫລວດ. ຂະນະ​ທີ່​ຂະ​ບວນລົດ​ບັນທຸກ​ລະບົບ​ປ້ອງ​ກັນ​ລູກ​ສອນ​ໄຟ​ເຄື່ອນ​ທີ່​ເຂົ້າ​ໄປ​ສະໜາມກ໊ອຟ​ເກົ່າ ​ໃນ​ວັນ​ທີ 26 ​ເມສາ.

- WhatsApp Image 2020 05 27 at 5 - ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ
- WhatsApp Image 2020 05 27 at 5 - ທຣຳ ເຜີຍກົນລະຍຸດເພີ່ມເພື່ອຂວ້ຳບາດ ສປປ ເກົາຫລີ
error: Alert: ເນື້ອຫາຂ່າວມີລິຂະສິດ !!