ປະກາດເມືອງປາກເຊເປັນນະຄອນຢ່າງເປັນທາງການ

- Champasak capital - ປະກາດເມືອງປາກເຊເປັນນະຄອນຢ່າງເປັນທາງການ
- Untitled design - ປະກາດເມືອງປາກເຊເປັນນະຄອນຢ່າງເປັນທາງການ

ພິທີປະກາດເມືອງປາກເຊແຂວງຈໍາປາສັກຂຶ້ນເປັນນະຄອນ, ໄດ້ມີຂຶ້ນໃນຕອນແລງວັນທີ 31 ພຶດສະພາຜ່ານມານີ້, ທີ່ສະໜາມກິລາແຂວງດັ່ງກ່າວ, ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີທ່ານ ບຸນຖອງ ດີວິໄຊ ເຈົ້າແຂວງຈໍາປາສັກ, ມີບັນດາລັດຖະມົນຕີ-ຮອງລັດຖະມົນຕີແລະ ບັນດາເຈົ້າແຂວງອ້ອມຂ້າງ, ພ້ອມດ້ວຍມວນຊົນເຂົ້າຮ່ວມຢ່າງຫລວງຫລາຍ.

ໃນພິທີໄດ້ເລີ່ມຕົ້ນດວ້ຍການເດີນສວນສະໜາມຂອງກອ້ນກໍາລັງພະນັກງານ, ທະຫານ, ຕໍາຫລວດ, ນັກຮຽນ-ນັກສຶກສາ ແລະ ມວນຊົນຊາວແຂວງຈໍາປາສັກ ຈໍານວນ 23 ກ້ອນກໍາລັງ ມີຈໍານວນພົນ 4.400 ຄົນ, ຂະບວນລົດຕົບແຕ່ງທີ່ເປັນເອກະລັກຂອງແຕ່ລະພະແນກ, ຫົວໜວ່ຍທຸລະກິດ ແລະ ແຫ່ປ້າຍມູນເຊື້ອຂອງແຂວງຈໍາປາສັກຈໍານວນ 35 ຄັນ. ພ້ອມ​ນັ້ນ, ​ໄດ້ຊົມການສະແດງສິລະປະວັນນະຄະດີໃນລາຍການຕ່າງໆ ເປັນຕົ້ນ ຊົມເຊີຍແຄນລາວເປັນມໍລະດົກໂລກ, ຟອ້ນຂໍ່ານັບຊົມເຊີຍນະຄອນປາກເຊ, ລໍາສີພັນດອນກຽ່ວກັບປະຫວັດເມືອງປາກເຊ ແລະ ການສ້າງຕັ້ງນະຄອນປາກເຊ, ພ້ອມດ້ວຍລາຍການອື່ນໆທີ່ສະແດງໃຫ້ເຫັນມູນເຊື້ອຂອງແຂວງຈໍາປາສັກ.

ພາຍຫລັງສໍາເລັດການສະແດງສິລະປະວັນນະຄະດີແລ້ວ, ທ່ານ ສົມສະນິດ ບຸດຕິວົງ ຮອງເຈົ້າແຂວງຈໍາປາສັກ, ປະທານຄະນະກໍາມະການກະກຽມປະກາດການສ້າງຕັ້ງນະຄອນປາກເຊ ໄດ້ມີຄໍາປາໄສວ່າ: ປາກເຊ ເປັນເມືອງເທສະບານໄດ້ຮັບການສ້າງຕັ້ງຂຶ້ນມາແຕ່ປີ 1904 ຈົນເຖິງປັດຈຸບັນ, ເປັນບ່ອນທີ່ຕັ້ງຂອງສໍານັກງານອົງການຕ່າງໆຂອງແຂວງ, ເປັນສູນກາງທາງດ້ານເສດຖະກິດ ​ແລະ ວັດທະນະທໍາ-ສັງຄົມ, ເປັນເມືອງບໍລິການ-ການຄ້າ, ການທອ່ງທຽ່ວ, ເປັນເມືອງທາງຜ່ານໄປສູ່ບັນດາແຂວງພາກກາງ-ໃຕ້ ແລະ ປະເທດໃກ້ຄຽງໃນອານຸພາກພື້ນ.

ນະຄອນ​ປາກ​ເຊ, ມີເນື້ອທີ່ທັງໜົດ 12 ພັນກວ່າເຮັກຕາ ມີ 42 ບ້ານ, ປະກອບມີ 5 ກຸ່ມກວມເອົາ 26 ບ້ານ, ມີ 13 ພັນກວ່າຄອບຄົວ ແລະ ມີປະຊາກອນທັງໝົດ 81 ພັນກວ່າຄົນ, ພົນລະເມືອງສ່ວນໃຫ່ຍປະກອບອາຊີບດ້ານທຸລະກິດ-ຄ້າ ຂາຍ ແລະ ການບໍລິການກວມ 60%, ພະນັກງານລັດຖະກອນ 28% ແລະ ຊາວກະສິກອນ 12%, ຄວາມໜາແໜ້ນຂອງພົນລະເມືອງສະເລ່ຍ 652 ຄົນ/ຕໍ່ກິໂລຕາແມັດ.

ໃນປີ 2017 ການພັດທະນເສດຖະກິດ-ສັງຄົມມະຫາພາກສາມາດບັນລຸໄດ້1.346 ກວ່າຕື້ກິບ, ໃນນີ້ຂົງເຂດກະສິກໍາ ແລະ ປ່າໄມ້ກວມ 10,5%, ອຸດສະຫະກໍາກວມ 36,3% ແລະ ການບໍລິການກວມ 53,2%, ໂດຍສະເລ່ຍລາຍຮັບຂອງພົ້ນລະເມືອງບັນລຸໄດ້ 16,5 ລ້ານກີບ ຫລືປະມານ 2.065 ໂດລາສະຫະລັດຕໍ່ຄົນຕໍ່ປີ.

- Wave100S AD to Website 2020 0 - ປະກາດເມືອງປາກເຊເປັນນະຄອນຢ່າງເປັນທາງການ

ທ່ານຮອງເຈົ້າແຂວງກ່າວວ່າ: ພາຍຫລັງໄດ້ປະກາດສ້າງຕັ້ງເປັນນະຄອນປາກເຊແລ້ວ ຈະໄດ້ເອົາໃຈໃສ່ພັດທະນາໄປຕາມວິ​ໄສທັດ, ໂດຍສະເພາະແມ່ນການພັດທະນາຊັບພະຍາກອນມະນຸດໃຫ້ມີຄວາມຮູ້-ຄວາມສາມາດນໍາໃຊ້ວິທະຍາສາດເຕັກໂນໂລຊີເຂົ້າໃນການພັດທະນາເປັນສູນກາງການຄ້າຂາຍ-ບໍລິການ ແລະ ທອ່ງທຽ່ວ ມີຄວາມສະອາດ ແລະ ສະພາບແວດລອ້ມທີ່ດີ, ສັງຄົມມີຄວາມເປັນລະບຽບຮຽບຮອ້ຍ, ໂດຍຈະຕອ້ງສຸມໃສ່ຫລາຍບັນຫາ​ ໃຫ້ນະຄອນປາກເຊມີທ່າແຮງທາງດ້ານເສດຖະກິດທີ່ເຂັ້ມແຂງ, ໂດຍສະເພາະແມ່ນດ້ານລາຍຮັບ, ປັບປຸງທາງດ້ານການປົກຄອງດ້ານເສດຖະກິດ, ວັດທະນະທໍາ-ສັງຄົມ, ພື້ນຖານໂຄງລ່າງໃຫ້ເຂົ້າສູ່ລະບົບໃນລະດັບສູງ ເຮັດໃຫ້ປະຊາຊົນເຂົ້າເຖິງການບໍລິການສາທາລະນະສຸກຂອງພາກລັດໄດ້ຢ່າງເຕັມສວ່ນ ແລະ ສົມບູນແບບ, ໂດຍສະເພາະແມ່ນໄດ້ຮັບສີ່ງອໍານວຍຄວາມສະດວກໃນການດໍາລົງຊີວິດ. ສ້າງໃຫ້ນະຄອນປາກເຊກາຍເປັນຕົວເມືອງທີ່ມີທ່າແຮງຮອບດ້ານ, ມີຄວາມສີວິໄລກາຍເປັນໃຈກາງທາງດ້ານການບໍລິການ-ຄ້າຂາຍເປັນທາງຜ່ານໃນການຕິດຕໍ່ພົວພັນເສດຖະກິດ-ການຄ້າ, ວັດທະນະທໍາ-ສັງຄົມ ແລະ ການທອ່ງທຽ່ວ, ເຊິ່ງຈະສາມາດດຶງດູດເອົາການລົງທຶນ ພາຍໃນ ແລະ ຕ່າງປະເທດ ໄດ້ຈໍານວນຫລາຍສ້າງລາຍຮັບໃຫ້ແກ່ນະຄອນປາກເຊ ແລະ ດ້ານອື່ນໆອີກ.

ພາຍຫລັງໄດ້ຮັບຟັງການລາຍງານແລ້ວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍໄດ້ໃຫ້ກຽດລັ່ນຄ້ອງ 9 ບາດ, ປ່ອຍນົກສັນຕິພາບ 9 ໂຕ, ປອ່ຍປຸ້ມເປົ້າ 99 ໜວ່ຍ, ພ້ອມ​ທັງເປີດປ້າຍ ແລະ ຈູດດອກໄມ້ໄຟເພື່ອເປັນສິລິມຸງຄຸນ ແລະ ສະເຫລີມສະຫລອງນະຄອນປາກເຊໃຫ້ມີຄວາມໝາຍສໍາຄັນຍິ່ງຂຶ້ນ.

 

- WhatsApp Image 2020 05 27 at 5 - ປະກາດເມືອງປາກເຊເປັນນະຄອນຢ່າງເປັນທາງການ
- WhatsApp Image 2020 05 27 at 5 - ປະກາດເມືອງປາກເຊເປັນນະຄອນຢ່າງເປັນທາງການ
error: Alert: ເນື້ອຫາຂ່າວມີລິຂະສິດ !!