ຝາກໃຈໄວ້ກັບຜູ້ແທນປະຊາຊົນ

- AGL banner - ຝາກໃຈໄວ້ກັບຜູ້ແທນປະຊາຊົນ

ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນຢ່າງເປັນທາງການທີ່ນະຄອນຫຼວງວຽງຈັນ​ໃນວັນທີ 5 ມິຖຸນາ 2018 ນີ້ ​ແລະ ຈະ​ດຳ​ເນີນ​ໄປ​ຮອດວັນ​ທີ 28 ແລະກ່ອນຈະກ້າວເຖິງກອງປະຊຸມໃນດັ່ງກ່າວ​ຜ່ານ​ມາ, ພວກເຮົາພາກັນຫຼຽວຫຼັງເບິ່ງກອງປະຊຸມເທື່ອກ່ອນທີ່ດຳ​ເນີນໃນທ້າຍປີ 2017 ເຊິ່ງມີການພິຈາລະນາ, ຮັບຮອງເອົາແຜນພັດທະນາເສດຖະກິດ-ສັງຄົມ, ແຜນເງິນຕາ ແລະແຜນງົບ ປະມານແຫ່ງລັດ ປີ 2018, ໂດຍມີການຈັດແບ່ງງົບປະມານລະຫວ່າງຂັ້ນສູນກາງ-ທ້ອງຖິ່ນ ເພື່ອແນໃສ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ກ່ຽວກັບການແບ່ງຂັ້ນຄຸ້ມຄອງທາງດ້ານງົບປະມານລະຫວ່າງຂັ້ນສູນກາງ-ທ້ອງຖິ່ນໃຫ້ເປັນຮູບປະທໍາ ແລະກໍານົດຄວາມຮັບຜິດຊອບໃນການຄຸ້ມຄອງ, ການຈັດເກັບລາຍຮັບ ແລະຄຸ້ມຄອງລາຍຈ່າຍໃນແຕ່ລະຂັ້ນໃຫ້ຈະແຈ້ງ;​ ກອງປະຊຸມ ຍັງໄດ້ຍ້ອງຍໍ ຊົມເຊີຍ ອົງການກວດສອບແຫ່ງລັດ ທີ່ປະຕິບັດພາລະບົດບາດໜ້າທີ່ໃນການສະໜອງຂໍ້ມູນທີ່ສໍາຄັນໃຫ້ແກ່ສະພາແຫ່ງຊາດ ເພື່ອເປັນບ່ອນອີງໃນການພິຈາລະນາ ຕົກລົງບັນຫາສໍາຄັນພື້ນຖານຂອງຊາດ, ພ້ອມທັງຈໍາກັດການລະເມີດກົດໝາຍ, ວິ​ໄນແຜນການ-ການເງິນລົງເທື່ອລະກ້າວ; ກອງປະຊຸມຍັງຮັບຮອງເອົາການສ້າງ ແລະປັບປຸງກົດໝາຍຈໍານວນ 16 ສະບັບໃນນີ້ມີກົດໝາຍສ້າງໃໝ່ 8 ສະ ບັບ, ກົດໝາຍປັບປຸງ 7 ສະບັບ ແລະ  ທາບທາມ   ຮ່າງກົດໝາຍ ວ່າດ້ວຍການຄຸ້ມຄອງໜີ້ສາທາລະນະ ແລະວຽກງານສໍາຄັນອື່ນໆຂອງຊາດຈໍານວນໜຶ່ງ.

ກໍ​ດັ່ງ​ທຸກໆ​ກອງ​ປະຊຸມ​ສະ​ໄຫມ​ສາມັນ ຂອງສະພາແຫ່ງຊາດ ກໍຈະໄດ້ຮັບຟັງການລາຍງານຂອງນາຍົກລັດຖະມົນຕີ ກ່ຽວກັບການປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 6 ເດືອນຕົ້ນປີ 2018 ແລະທິດທາງວຽກງານຈຸດສຸມປະຈໍາ 6 ເດືອນທ້າຍປີ 2018 ແລະ​ ກອງ​ປະຊຸມ​ເທື່ອ​ນີ້​ກໍ​ຈະ​ໄດ້​ສຸມ​ໃສ່​ບັນດາ​ວຽກ​ດັ່ງກ່າວ ​ໂດຍ​ສະ​ເພາະມາດຕະການຊຸກຍູ້ການຂະຫຍາຍຕົວຂອງເສດຖະກິດ, ການສົ່ງເສີມທຸລະກິດຂະໜາດນ້ອຍ-ຂະໜາດກາງ, ການສົ່ງເສີມການລົງທຶນພາຍໃນ ແລະຕ່າງປະເທດ, ການແກ້ໄຂບັນຫາໜີ້ສິນ, ການຈັດຕັ້ງປະຕິບັດມະຕິກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII, ຂໍ້ສະດວກ, ຂໍ້ຫຍຸ້ງຍາກ ແລະມາດຕະການແກ້ໄຂ ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2018 ບັນລຸ​ຜົນສຳ​ເລັດ​ຈົບງາມ.

ພ້ອມນັ້ນ ກໍ​ຈະ​ໄດ້ທັງພິຈາລະນາ ແລະ ຮັບຮອງເອົາບົດລາຍງານຂອງລັດຖະບານກັບແຜນແມ່ບົດຈັດສັນທີ່ດິນແຫ່ງຊາດ; ຮັບຟັງການຊີ້ແຈງສັງລວມບັນຫາພົ້ນເດັ່ນຂອງລັດຖະບານ ຕໍ່ຄໍາຊັກຖາມຂອງຄະນະປະຈໍາສະພາແຫ່ງຊາດ ແລະ ສສຊ ກ່ຽວກັບການຄຸ້ມຄອງບໍລິຫານລັດຂອງລັດຖະບານ; ການປະຕິບັດນະໂຍບາຍຊົດເຊີຍແກ່ປະຊາຊົນທີ່ຖືກຜົນກະທົບຈາກໂຄງການລົງທຶນຂອງລັດ ເປັນຕົ້ນ ຜົນກະທົບຈາກການກໍ່ສ້າງເສັ້ນທາງລົດໄຟ, ການກໍ່ສ້າງທາງດ່ວນ; ລາຄານໍ້າມັນ ພ້ອມທັງສາເຫດເພີ່ມຂຶ້ນຂອງລາຄານໍ້າມັນທີ່ສົ່ງຜົນກະທົບຕໍ່ການຜະລິດ, ຊີວິດການເປັນຢູ່ຂອງປະຊາຊົນ; ບັນຫາປະກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ, ບັນຫາອຸປະ ຕິເຫດ ແລະສະພາບການຈັດຕັ້ງປະຕິບັດວຽກງານ 3 ສ້າງ ຕິດພັນກັບການພັດທະນາຊົນນະບົດ ແລະລຶບລ້າງຄວາມທຸກຍາກ; ພ້ອມນັ້ນ ຍັງຈະມີການພິຈາລະນາ ແລະຮັບຮອງເອົາຮ່າງກົດໝາຍສ້າງໃໝ່ ແລະຮ່າງກົດໝາຍປັບປຸງ ລວມທັງໝົດ 13 ສະບັບ ໃນນີ້ກົດໝາຍສ້າງໃໝ່ ຈໍານວນ 5 ສະ  ບັບ ແລະກົດໝາຍປັບປຸງ 8 ສະບັບ ແລະພ້ອມນັ້ນ ຍັງຈະມີການປະກອບຄໍາເຫັນ, ມີການຄົ້ນຄ້ວາ, ພິຈາລະນາ ແລະຮັບຮອງເອົາບັນຫາສໍາຄັນ ອື່ນໆຂອງຊາດຈໍານວນໜຶ່ງ.

ພວກເຮົາເຊື່ອໝັ້ນວ່າ: ກອງປະຊຸມເທື່ອນີ້ ຈະໄດ້ຮັບຜົນດີຫຼາຍກ່ວາເກົ່າ ເພາະໄດ້ດໍາເນີນໄປໃນທ່າມກາງເງື່ອນໄຂໃໝ່ ເຊິ່ງໄດ້ເລັ່ງທວງໃຫ້ບັນດາຜູ້ແທນປະຊາຊົນ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ໃຫ້ເປັນຮູບປະທໍາ ແລະ ມີຜົນສໍາເລັດໃນລະດັບສູງ, ພ້ອມນັ້ນ ກໍເສີມຂະຫຍາຍມູນເຊື້ອອັນພົ້ນເດັ່ນຂອງສະພາແຫ່ງຊາດ ເຂົ້າໃນວຽກງານຕົວຈິງ ໂດຍເອົາທ້ອງຖິ່ນຮາກຖານ, ບ່ອນທໍາການຜະລິດຂອງປະຊາຊົນ ເປັນຫ້ອງປະຈໍາການຄືກັບພະນັກງານ 3 ສ້າງ, ມີຄວາມໃກ້ຊິດ ຕິດແໜ້ນ ກິ້ງເກືອກລືເລືອ, ຮ່ວມສຸກຮ່ວມທຸກ, ຖືປະຊາຊົນເປັນກົກ, ຫງ່ຽງຫູຟັງ ແລະເກັບກໍາຫາງສຽງຂອງສັງຄົມ ສໍາຄັນກໍ່ບັນຫາປາກທ້ອງຂອງປະຊາຊົນ ແລ້ວນໍາສະເໜີຕໍ່ອົງການກ່ຽວຂ້ອງພິຈາລະນ າແກ້ໄຂຕາມຄວາມຖືກຕ້ອງ, ທ່ວງທັນສະພາບການ ເພື່ອພັດທະນາຊີວິດ, ສຸຂະພາບຂອງປະຊາຊົນໃຫ້ດີຂຶ້ນ ເໝືອນດັ່ງເຄີຍສັນຍາຫາສຽງໄວ້ກັບຊາວບ້ານ ແລະໃຫ້ສົມກັບເປັນຜູ້ແທນຂອງປະຊາຊົນ; ພ້ອມດຽວກັນກໍ່ຂໍໃຫ້ທົບທວນຄືນຄໍາສະເໜີ, ຄໍາຄິດຄໍາເຫັນຂອງປະຊາຊົນ, ຂອງສັງຄົມ ເປັນຕົ້ນບັນຫາທີ່ດິນ, ຄວາມບໍ່ໂປ່ງໃສໃນພາກລັດ-ພາກທຸລະກິດ, ການສໍ້ລາດບັງຫຼວງ, ບັນຫາສະພາບຄົນເຫຼືອບໍ່ພໍ, ອຸປະຕິເຫດໃນທ້ອງຖະໜົນ, ຢາເສບຕິດ, ການຄ້າມະນຸດ, ວັດທະນະທໍາທີ່ເຊື່ອມຖອຍ, ລາຄາສິນຄ້າເໜັງຕີງແຮງ, ການອັດຮູຮົ່ວຂອງງົບປະມານ, ໄພພິບັດ, ການຈັດຕັ້ງປະຕິບັດແຈ້ງການ-ຄໍາສັ່ງຕ່າງໆ ເປັນຕົ້ນ ຄໍາສັ່ງ ເລກທີ 15/ນຍ, ການປະຈັດຕັ້ງປະຕິບັດນະໂຍບາຍ 3 ເປີດຂອງນາຍົກລັດຖະມົນຕີ ແລະບັນຫາອື່ນໆນັ້ນ ອັນໃດແດ່ເຮັດໄດ້ ແລະອັນບໍ່ໄດ້ແມ່ນຍ້ອນຫຍັງ ຊິແກ້ມັນແນວໃດ ແລະມື້ໃດຈະໃຫ້ສໍາເລັດ, ຄວນມີຈຸດໝາຍ ແລະຄາດໝາຍສູ້ຊົນຄັກແນ່, ບໍ່ແມ່ນຊິນໍາເອົາອັນເກົ່າມາເວົ້າກັນຕື່ມອີກ ຈະເຮັດໃຫ້ສັງຄົມຂາດຄວາມເຊື່ອໝັ້ນຕໍ່ສະຖາບັນການເມືອງສູງສຸດຂອງປະຊາຊົນ.

- Wave100S AD to Website 2020 0 - ຝາກໃຈໄວ້ກັບຜູ້ແທນປະຊາຊົນ

ໃນນາມພົນລະເມືອງລາວຄົນໜຶ່ງ ຫວັງໃຈວ່າບັນດາທ່ານ ສສຊ ຄົງຈະເຮັດວຽກບ້ານໄວ້ເປັນທີ່ຮຽບຮ້ອຍແລ້ວ, ພວກເຮົາຈະຕິດຕາມການປະຕິບັດໜ້າທີ່ຂອງພວກທ່ານຢ່າງໃຈຈົດຈໍ່ ແລະຂໍໃຫ້ສືບຕໍ່ຕິດຕາມກວດກາ ແລະກວດສອບອົງກອນ, ກຸ່ມຄົນ ແລະບຸກຄົນທີ່ຝ່າຝືນລະບຽບກົດໝາຍບ້ານເມືອງ ໂດຍສະເພາະບັນຫາພະຍາດອາຍາສິດ, ໃຊ້ສິດອໍານາດບາດໃຫຍ່, ສໍ້ລາດບັງຫຼວງ, ຟອກເງິນ, ການໄດ້ມາອໍານາດທີ່ບໍ່ຖືກຕ້ອງ, ການສວຍໃຊ້ອໍານາດສະແຫວງຫາຜົນປະໂຫຍດ…ການປະຢັດ-ຕ້ານການຟຸມເຟືອຍ; ຂໍໃຫ້ ສສຊ ພ້ອມກັບພາກສ່ວນກ່ຽວຂ້ອງ ລວມທັງອົງການ ບໍລິຫານ-ອົງການປົກປ້ອງກົດໝາຍ ເດັດດ່ຽວຊອກຫາຂໍ້ບົກພ່ອງນໍາມາແກ້ໄຂ ແລະນໍາຕົວຜູ້ກະທໍາຜິດເຂົ້າສູ່ຂະບວນການຍຸຕິທໍາເໝືອນດັ່ງທີ່ພວກທ່ານໄດ້ແກ້ໄຂຫຼາຍບັນຫາທີ່ຕິດພັນກັບພະນັກງານ, ທະຫານ, ຕໍາຫຼວດ ແລະປະຊາຊົນທີ່ລະເມີດກົດໝາຍບ້ານເມືອງ; ຫວັງວ່າ: ສສຊ ຈະເຮັດໄດ້ດີກ່ວາເກົ່່າ ແນໃສ່ຈໍາກັດ-ກໍາຈັດປັດກວາດ, ສະກັດກັ້ນ-ຕ້ານແລະປາບປາມພວກຄົນບໍ່ດີ ແມ່ນແຕ່ປວກຫຼືແມງວັນທີ່ເປັນສ້ຽນໜາມຂອງສັງຄົມໃຫ້ ຫຼຸດໜ້ອຍຖອຍລົງ ແລະໝົດໄປຈາກສັງຄົມລາວ ສ້າງໃຫ້ບ້ານເມືອງມີຄວາມໂປ່ງໃສ, ສະອາດ, ສວຍງາມ ແລະ ສອດຄ່ອງກັບມະຕິ X ຂອງພັກ.

# ຂຽນໂດຍ: ຣັດສະໝີ ດວງສັດຈະ

-    AD conten website - ຝາກໃຈໄວ້ກັບຜູ້ແທນປະຊາຊົນ
- lattana banner - ຝາກໃຈໄວ້ກັບຜູ້ແທນປະຊາຊົນ
- lattana banner 1 - ຝາກໃຈໄວ້ກັບຜູ້ແທນປະຊາຊົນ
error: Alert: ເນື້ອຫາຂ່າວມີລິຂະສິດ !!