ງານສະແດງເບ້ຍໄມ້ ຖືກໃຈປະຊາຊົນ

- 34455153 633903096961114 7229554690843738112 n - ງານສະແດງເບ້ຍໄມ້ ຖືກໃຈປະຊາຊົນ
- Untitled design - ງານສະແດງເບ້ຍໄມ້ ຖືກໃຈປະຊາຊົນ

“ງານວາງສະແດງເບ້ຍໄມ້ນີ້ເປັນສິ່ງທີ່ດີຫຼາຍ ເພາະໄດ້ເປີດໂອກາດໃຫ້ຊາວກະສິກອນຄືພວກເຮົາໄດ້ຮູ້ຈັກຫຼາຍຂຶ້ນ” ນັ້ນເປັນຄຳເວົ້າຂອງ ທ່ານ ນາງ ສຸພາລັກ ນຶ່ງໃນຜູ້ເຂົ້າຮ່ວມວາງສະແດງເບ້ຍໄມ້.

ການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ ທີ່ນະຄອນຫຼວງວຽງຈັນປີນີ້ ຖືວ່າພິເສດຫຼາຍ ເພາະທາງກະຊວງກະສິກຳ ແລະປ່າໄມ້ ໄດ້ຮ່ວມກັບ ນະຄອນຫຼວງວຽງຈັນ ເປີດງານວາງສະແດງ, ເບ້ຍໄມ້ ແລະໄມ້ປະດັບ ຂຶ້ນໃນລະວາງວັນທີ 25 ພຶດສະພາ ເຖິງ 6 ມິຖຸນາ ເຊິ່ງນັບວ່າ ເກືອບ 2​ ອາທິດພໍດີ.

ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳແລະ ປ່າໄມ້ ໄດ້ກ່າວໃນມື້ເປີດພິທີວ່າ “ເພື່ອສ້າງຂະບວນການຂໍ່ານັບຮັບຕ້ອນວັນປູກຕົ້ນໄມ້ແຫ່ງຊາດ ຄົບຮອບ 38 ປີ ( 1980 – 2018 ) ຕິດພັນກັບການສະເຫຼີມສະຫຼອງວັນເດັກນ້ອຍສາກົນ 1 ມິຖຸນາ ກະຊວງກະສິກຳ ແລະ ປ່າໄມ້ ໄດ້ສົມທົບກັບນະຄອນຫຼວງວຽງຈັນ ໄດ້ພ້ອມກັນຈັດງານວາງສະແດງຕົ້ນໄມ້, ເບ້ຍໄມ້ ແລະ ໄມ້ປະດັບ ເພື່ອແນໃສ່ຊຸກຍູ້ທຸລະກິດການກ້າເບ້ຍໄມ້ໃຫ້ຂະຫຍາຍຕົວຢ່າງກວ້າງຂວາງ, ຮັບປະກັນການສະໜອງເບ້ຍໄມ້ ແລະ ຕົ້ນໄມ້ທຸກຊະນິດໃຫ້ແກ່ການປູກໄມ້ ເພື່ອປະກອບສ່ວນເຂົ້າໃນການຈັດຕັ້ງປະຕິບັດຍຸດທະສາດປ່າໄມ້ ປີ 2020 ຂອງລັດຖະບານ ຄື: ເພີ່ມການປົກຫຸ້ມຂອງປ່າໄມ້ໃຫ້ໄດ້ 70% ແລະ ປູກໄມ້ໃຫ້ໄດ້ 5 ແສນເຮັກຕາ ໃນປີ 2020”.

ຜູ້ຂຽນໄດ້ມີໂອກາດໄດ້ໄປເລາະ 3 ເທື່ອ ພ້ອມທັງແນະນໍາໝູ່ເພື່ອນຫຼາຍຄົນໄປເລາະນຳ ແລະຊື້ເບ້ຍໄມ້ໄປປູກຫຼາກຫຼາຍຊະນິດ,  ທ່ານ ນາງ ສຸພາລັກ ເຈົ້າຂອງສວນໄຜ່ນາຄຳ ກ່າວອີກວ່າ “ການສ້າງເວທີນີ້ຂຶ້ນມາກໍຖືວ່າເປັນການເປີດໂອກາດໃຫ້ ຊາວກະສິກອນ, ຜູ້ປະກອບການ ການກ້າເບ້ຍໄມ້ຂາຍຢູ່ບ້ານເຮົາ ມີຄວາມກະຕືລືລົ້ນຫຼາຍຂຶ້ນ, ສັງເກດເຫັນວ່າ ໄດ້ຮັບຄວາມສົນໃຈຈາກມວນຊົນຫຼາຍທີ່ສຸດ”. ທ່ານ ນາງ ສຸພາລັກ ໄດ້ສ້າງຄວາມສົນໃຈໃຫ້ແກ່ຜູ້ເຂົ້າມາທ່ຽວຊົມ ຍ້ອນໝາກມ່ວງໃຫຍ່ຂອງລາວ ເຊິ່ງເປັນຈຸດຂາຍຂອງເບ້ຍໝາກມ່ວງ ທີ່ຂາຍໄດ້ຈຳນວນ 600 ກວ່າເບ້ຍນັບແຕ່ມື້ເປີດມາຮອດວັນທີ 5 ມິຖຸນາ, ນັບເປັນມູນຄ່າກວ່າ 20 ລ້ານກວ່າກີບ.

ສ່ວນ ທ່ານ ສີບຸນເຮືອງ ຊາວບ້ານດອນໜູນ ທີ່ໄດ້ມາເລາະຊື້ເບ້ຍໄມ້ ກໍເວົ້າວ່າ “ຂ້າພະເຈົ້າມີຄວາມອອນຊອນຫຼາຍທີ່ເຫັນເບ້ຍໄມ້ຫຼາກຫຼາຍຊະນິດ, ບໍ່ສະເພາະແຕ່ຕົ້ນໄມ້ກິນໝາກ ແຕ່ຍັງມີໄມ້ປະດັບ, ໄມ້ເນື້ອແຂງຕ່າງໆ ເຊິ່ງໄດ້ຊື້ຫຼາຍສິບເບ້ຍໄປປູກ ແລະຢາກໃຫ້ມີງານແບບນີ້ທຸກໆປີ” ແລະ ທ່ານ ນາງ ພອນທິບ ຊາວບ້ານ ໜອງດ້ວງໃຕ້ ກໍໃຫ້ຄຳເຫັນວ່າ “ຂ້ອຍໄດ້ຊື້ເບ້ຍໄມ້ປະດັບຈຳນວນນຶ່ງໄປປູກ ເຊິ່ງເຫັນວ່າງານນີ້ມີປະໂຫຍດຫຼາຍສຳລັບຜູ້ປະກອບການຂາຍເບ້ຍໄມ້ ແລະສ້າງຄວາມສົນໃຈແກ່ປະຊາຊົນ ຢ່າງກວ້າງຂວາງ”.

- Wave100S AD to Website 2020 0 - ງານສະແດງເບ້ຍໄມ້ ຖືກໃຈປະຊາຊົນ

ນອກນັ້ນ, ຜູ້ຂຽນຍັງສັງເກດເຫັນວ່າ ຜູ້ມາເລາະຫຼາຍກຸ່ມກໍມາເປັນຄອບຄົວ, ທັງພໍ່ຕູ້ ແມ່ຕູ້, ພໍ່ແມ່ ແລະລູກຫຼານ ພາກັນມາເລືອກເບ້ຍໄມ້ໄປປູກ ໂດຍທີ່ ຜູ້ອາວຸໂສ ໄດ້ອະທິບາຍໃຫ້ລູກຫຼານຟັງເຖິງຊື່ ແລະ ຈຸດພິເສດຂອງ ໄມ້ຊະນິດຕ່າງໆຢ່າງມ່ວນຊື່ນ ເບິ່ງແລ້ວເປັນຕາໜ້າສະອອນໃຈນຳ.

ກະຊວງກະສິກຳ ແລະປ່າໄມ້ລາຍງານວ່າ ໃນງານວາງສະແດງດັ່ງກ່າວ ມີທັງພາກລັດ ແລະ ເອກະຊົນ ຈຳນວນ 90 ພາກສ່ວນ, ຈຳນວນ 100 ເຕັ້ນ ແລະ ມີເບ້ຍໄມ້ຈຳນວນ 1​ ແສນກວ່າເບ້ຍມາວາງສະແດງ.

ງານວາງສະແດງດີໆແບບນີ້ ພວກເຮົາຄວນສົ່ງເສີມ ແລະໃຫ້ມີທຸກໆປີ, ເສີມຂະຫຍາຍ ຈາກນະຄອນຫຼວງວຽງຈັນ ໄປສູ່ແຂວງອື່ນໆ, ບໍ່ສະເພາະແຕ່ຊຸກຍູ້ສົ່ງເສີມຜູ້ປະກອບການ ແຕ່ຍັງເປັນການສ້າງຈິດສຳນຶກອີກແບບນຶ່ງແກ່ປະຊາຊົນລາວ ໃຫ້ຮັກຫອມຕົ້ນໄມ້, ພືດພັນ ຂອງລາວ ປະກອບສ່ວນສ້າງປ່າໄມ້ໃຫ້ຄົງຢູ່ຄູ່ກັບຄົນລາວຕະຫຼອດໄປ.

- WhatsApp Image 2020 05 27 at 5 - ງານສະແດງເບ້ຍໄມ້ ຖືກໃຈປະຊາຊົນ
- WhatsApp Image 2020 05 27 at 5 - ງານສະແດງເບ້ຍໄມ້ ຖືກໃຈປະຊາຊົນ
error: Alert: ເນື້ອຫາຂ່າວມີລິຂະສິດ !!