ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2

- laos brunie - ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2
- Untitled design - ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2

ກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືລະຫວ່າງລາວ-ບຣູໄນ ຄັ້ງທີ 2 ໄດ້ຈັດຂຶ້ນໃນວັນທີ 6 ມິຖຸນານີ້, ທີ່ນະຄອນຫລວງພະບາງ, ໂດຍການເປັນປະທານຮ່ວມຂອງທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ແລະ ທ່ານ ດາໂຕະ ສີຣິ ເອຣິວັນ ປິຮິນ ຢູໂຊບຟ໌ (Dato Erywan Pehin Yusof) ລັດຖະມົນຕີກະຊວງການຕ່າງປະເທດ ແລະ ການຄ້າ ຜູ້ທີ II ແຫ່ງບຣູໄນ ດາຣູຊາລາມ, ພ້ອມດ້ວຍເຈົ້າໜ້າທີ່ກ່ຽວຂ້ອງສອງຝ່າຍເຂົ້າຮ່ວມ, ເພື່ອທົບທວນຄືນການຈັດຕັ້ງປະຕິບັດບົດບັນທຶກກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືລາວ-ບຣູໄນ ຄັ້ງທີ 1 ຕະຫລອດໄລຍະເວລາ 12 ປີຜ່ານມາ ແລະ ໄດ້ປຶກສາຫາລືແລກປ່ຽນຄວາມຄິດເຫັນກ່ຽວກັບທິດທາງ ແລະ ເເຜນການຮ່ວມມືໃນຕໍ່ໜ້າ.

ໃນໂອກາດນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມທີ່ໄດ້ຮັບການພັດທະນາ ແລະ ເສີມຂະຫຍາຍຕະຫລອດໄລຍະ 25 ປີແຫ່ງການສ້າງຕັ້ງສາຍພົວພັນການທູດນຳກັນ, ເຊິ່ງເຫັນໄດ້ຈາກຜົນສຳເລັດຂອງການແລກປ່ຽນການຢ້ຽມຢາມລະຫວ່າງການນໍາຂັ້ນສູງຂອງສອງປະເທດໃນໄລຍະຜ່ານມາ. ສອງຝ່າຍໄດ້ສະແດງຄວາມຊົມເຊີຍຕໍ່ຂໍ້ຕົກລົງການຂະຫຍາຍເວລາພັກເຊົາຂອງພົນລະເມືອງລາວ ແລະ ບຣູໄນ ທີ່ຖືໜັງສືຜ່ານແດນການທູດ, ລັດຖະການ ແລະ ທຳມະດາ (ຍົກເວັ້ນວີຊາ) ຈາກ 14 ວັນເປັນ 30 ວັນ, ຊຶ່ງຈະເປັນການສົ່ງເສີມການໄປມາຫາສູ່ເຊິ່ງກັນ ແລະ ກັນລະຫວ່າງປະຊາຊົນສອງປະເທດ.

ກອງປະຊຸມໄດ້ເຫັນດີຊຸກຍູ້ໃຫ້ຂະແໜງການກ່ຽວຂ້ອງຂອງສອງຝ່າຍ ລວມທັງສະພາການຄ້າ ແລະ ອຸດສາຫະກໍາ ຂອງສອງປະເທດໃນການສົ່ງເສີມການຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ ໃຫ້ຂະຫຍາຍກວ້າງກວ່າເກົ່າ, ໂດຍຜ່ານການພົບປະແລກປ່ຽນການຮ່ວມມືທາງດ້ານເສດຖະກິດ ເພື່ອຊອກຫາວິທີການ ແລະ ໂອກາດການຮ່ວມມືທາງດ້ານການຄ້າ ແລະ ການລົງທຶນລະຫວ່າງສອງປະເທດ, ພ້ອມທັງຊຸກຍູ້ໃຫ້ສອງສະພາການຄ້າມີການເຊັນບົດບັນທຶກວ່າດ້ວຍການຮ່ວມມືຮ່ວມກັນ ແລະ ຈັດກອງປະຊຸມພາກທຸລະກິດຂຶ້ນໃນໂອກາດທີ່ພະນະທ່ານນາຍົກລັດຖະມົນຕີ ທອງລຸນ ສີສຸລິດ ຈະເດີນທາງຢ້ຽມຢາມທາງການ ບຣູໄນ ດາຣູຊາລາມ ໃນອານາຄົດອັນໃກ້ນີ້.

ພິເສດ, ສອງຝ່າຍໄດ້ສະແດງຄວາມຍິນດີຕໍ່ເເຜນການລົງນາມຮ່ວມກັນ ບົດບັນທຶກຄວາມເຂົ້າໃຈລະຫວ່າງສຳນັກງານຂໍ້ມູນຕ້ານການຟອກເງິນ, ຄະນະກຳມະການແຫ່ງຊາດ ເພື່ອຕ້ານການຟອກເງິນ ແລະ ການສະໜອງທືນໃຫ້ແກ່ການກໍ່ການຮ້າຍແຫ່ງ ສປປ ລາວ ແລະ ໜ່ວຍງານຂ່າວກອງທາງດ້ານການເງິນ, ເຈົ້າໜ້າທີ່ທາງດ້ານການເງິນແຫ່ງ ບຣູໄນ ດາຣູຊາລາມ ວ່າດ້ວຍການຮ່ວມມືໃນການແລກປ່ຽນຂໍ້ມູນຂ່າວສານດ້ານການເງິນທີ່ພົວພັນກັບການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍໃນປີນີ້. ນອກນັ້ນ, ສອງຝ່າຍຍັງເຫັນດີສືບຕໍ່ເສີມຂະຫຍາຍການຮ່ວມມືໃນດ້ານຕ່າງໆ, ເຊັ່ນ: ການພັດທະນາຊັບພະຍາກອນມະນຸດ, ການຂົນສົ່ງທາງອາກາດ, ການຮ່ວມມືດ້ານການຄຸ້ມຄອງ ແລະ ຄວບຄຸມຢາເສບຕິດ, ແຮງງານ, ການແລກປ່ຽນວັດທະນະທຳ, ການທ່ອງທ່ຽວ ແລະ ການຮ່ວມມື ເພື່ອການພັດທະນາແມ່ຍິງ ແລະ ອື່ນໆ.

- Wave100S AD to Website 2020 0 - ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2

ໃນໂອກາດນີ້, ທ່ານລັດຖະມົນຕີ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ທ່ານ ດາໂຕະ ສີຣິ ເອຣິວັນ ປິຮິນ ຢູໂຊບຟ໌ ທີ່ໄດ້ຖືກແຕ່ງຕັ້ງໃຫ້ດຳລົງຕໍາແໜ່ງເປັນລັດຖະມົນຕີກະຊວງການຕ່າງປະເທດ ແລະ ການຄ້າ ຜູ້ທີ II ແຫ່ງ ບຣູໄນ ດາຣູຊາລາມ ຄົນໃໝ່. ພ້ອມນັ້ນ, ກໍໄດ້ສະແດງຄວາມຂອບໃຈຕໍ່ລັດຖະບານ ບຣູໄນ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນໄລຍະຜ່ານມາຫລາຍດ້ານ ເຊັ່ນ: ການຊ່ວຍເຫລືອການເປັນປະທານຈັດກອງປະຊຸມສຸດຍອດອາເຊັມໃນປີ 2012 ແລະ ກອງປະຊຸມສຸດຍອດອາຊຽນໃນປີ 2004 ແລະ ປີ 2016 ຂອງ ສປປ ລາວ, ການພັດທະນາຊັບພະຍາກອນມະນຸດ, ການສ້າງສູນປິ່ນປົວ ແລະ ຟື້ນຟູບຳບັດຜູ້ຕິດຢາເສບຕິດ, ການສ້າງສະໜາມກິລາໃນຮົ່ມຄົບວົງຈອນສີເກີດ, ການກໍ່ສ້າງອາຄານສະຫະພັນແມ່ຍິງ, ສູນຟື້ນຟູຄົນພິການ, ໂຮງຮຽນຕ່າງໆ ແລະ ການຊ່ວຍເຫລືອໃນດ້ານອື່ນໆ, ເຊິ່ງເປັນການປະກອບສ່ວນອັນສຳຄັນເຂົ້າໃນ​ການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດລາວ-ບຣູໄນ ກໍຄືການພັດທະນາເສດຖະກິດ-ສັງຄົມຂອງ ສປປ ລາວ.

ໃນໂອກາດດຽວກັນ, ທ່ານລັດຖະມົນຕີ ດາໂຕະ ສີຣິ ເອຣິວັນ ປິຮິນ ຢູໂຊບຟ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງສະແດງຄວາມຂອບໃຈຕໍ່ລັດຖະບານແຫ່ງ ສປປ ລາວ ທີ່ໄດ້ສົ່ງຄະນະຜູ້ແທນຂັ້ນສູງເຂົ້າຮ່ວມພິທີສະເຫຼີມສະຫຼອງ ຄົບຮອບ 50 ປີ ວັນຂຶ້ນຄອງລາດຂອງສົມເດັດ ຊຸນຕານ ແຫ່ງ ບຣູໄນ ດາຣູຊາລາມ ແລະ ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫຼາຍຝ່າຍ. ໃນຕອນທ້າຍ, ທ່ານ ດາໂຕະ  ສີຣິ ເອຣິວັນ ປິຮິນ ຢູໂຊບຟ໌ ໄດ້ເຊື້ອເຊີນ ທ່ານລັດຖະມົນຕີ ສະເຫຼີມໄຊ ກົມມະສິດ ເຂົ້າຮ່ວມກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືລະຫວ່າງລາວ-ບຣູໄນ ຄັ້ງທີ 3 ທີ່ບັນດາ ເສຣີ ເບກາວັນ ໃນໂອກາດຕໍ່ໄປ.

- WhatsApp Image 2020 05 27 at 5 - ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2
- WhatsApp Image 2020 05 27 at 5 - ຜົນກອງປະຊຸມຄະນະກຳມາທິການຮ່ວມມືລາວ-ບຣູໄນຄັ້ງທີ 2
error: Alert: ເນື້ອຫາຂ່າວມີລິຂະສິດ !!