ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%

- PM - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%
- AGL banner - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%

ຕາມການລາຍງານຂອງທ່ານ ທອງລຸນ ສີສຸລິດ ນາຍົກຍົກລັດຖະມົນຕີ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ 6 ເດືອນທ້າຍປີ 2018 ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII, ໃນວັນທີ 5 ມິຖຸນານີ້ວ່າ: ລັດຖະບານ ໄດ້ເອົາໃຈໃສ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ລະບຽບການຢ່າງເຂັ້ມງວດ ໄປຄຽງຄູ່ກັບການເອົາໃຈໃສ່ການຕິດຕາມກວດກາ ຂອງອົງການອໍານາດລັດ ແລະ ການຈັດຕັ້ງສັງຄົມ, ການສ້າງ ແລະ ປັບປຸງກົດໝາຍ ແລະ ສ້າງນິຕິກໍາລຸ່ມກົດໝາຍ ໃນຂົງເຂດຢ່າງເປັນລະບົບໄດ້ຫຼາຍຂຶ້ນ ໂດຍສະເພາະໃນເຂດເສດຖະກິດ. ອີງຕາມຂໍ້ມູນອັດຕາການເຕີບໂຕເສດຖະກິດໃນ 6 ເດືອນຕົ້ນປີ ຄາດວ່າຈະບັນລຸໃນລະດັບ 6,7%, ໃນນັ້ນ, ຂະແໜງກະສິກຳ ຈະເພີ່ມຂຶ້ນ 2,9%  (ມະຕິສະພາຮັບຮອງ 2,8%) ກວມ 15,9% ຂອງ GDP, ຂະແໜງອຸດສາຫະກຳ  ເພີ່ມຂຶ້ນ 2,7% (ມະຕິສະພາຮັບຮອງ 9,1%) ກວມ 31,2% ຂອງ GDP, ຂະແໜງບໍລິການ ເພີ່ມຂຶ້ນ​ 7,9% (ມະຕິສະພາຮັບຮອງ 6,4%) ກວມ 41,7% ຂອງ GDP, ພາສີຈາກການນຳເຂົ້າ ເພີ່ມຂຶ້ນ 6,8% (ມະຕິສະພາຮັບຮອງ 9%) ກວມ 11,2% ຂອງ GDP, GDP ຄິດໄລ່ເປັນມູນຄ່າໃນປີ ໄດ້ປະມານ 152.436 ຕື້ກີບ, ສະເລ່ຍລາຍຮັບຕໍ່ຫົວຄົນ ຈະບັນລຸໄດ້ 2.609 ໂດລາສະຫະລັດຕໍ່ປີ.

ທ່ານນາຍົກ ໃຫ້ຮູ້ວ່າ: ເຖິງວ່າເສດຖະກິດມະຫາພາກ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ແຕ່ຜ່ານການຈັດຕັ້ງປະຕິບັດຕົວຈິງໃນ 4 ເດືອນ ເຫັນວ່າການເຕີບໂຕທາງເສດຖະກິດ ຍັງບໍ່ທັນໜັກແໜ້ນ, ສ່ວນໃຫຍ່ຍັງອີງໃສ່ການລົງທຶນຈາກການກໍ່ສ້າງພື້ນຖານໂຄງລ່າງ, ການຂຸດຄົ້ນຊັບພະຍາກອນທໍາມະຊາດ ເຊິ່ງບັນດາຂະແໜງການເຫຼົ່ານີ້ ຍັງບໍ່ທັນໄດ້ສ້າງລາຍຮັບ ແລະ ວຽກເຮັດງານທໍາໃຫ້ແກ່ຜູ້ອອກແຮງງານລາວເທົ່າທີ່ຄວນ, ຖ້າສະພາບການຂະຫຍາຍຕົວຍັງມີຄວາມບອບບາງລັກສະນະນີ້, ການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ຄາດຄະເນໝົດປີຈະບັນລຸໄດ້ພຽງ 6,7% ຫຼຸດແຜນການປີທີ່ວາງໄວ້ຄື 7% ແລະ ສຳລັບ​ທິດ​ທາງ​ແຜນການ​ໃນ 6 ​ເດືອນ​ທ້າຍ​ປີ, ລັດຖະບານ​ຈະ​ສືບ​ຕໍ່​ຈັດຕັ້ງປະຕິບັດ​ນະ​ໂຍບາຍ​ສ້າງ​ການ​ເຕີບ​ໃຫຍ່​ທາງ​ເສດຖະກິດ ​ໂດຍ​ອີງ​ໃສ່​ກຳລັງ​ແຮງ​ສັງ​ລວມທົ່ວ​ຂົງ​ເຂດ​ເສດຖະກິດ-ສັງຄົມ ​ເພື່ອ​ໃຫ້​ເສດຖະກິດ​ມະຫາ​ພາກ​ມີ​ສະຖຽນ​ລະ​ພາບ ​ແລະ ​ເຕີບ​ໃຫຍ່​ຢ່າງ​ຕໍ່​ເນື່ອງ, ການ​ພັດທະນາ​ໂດຍ​ລວມ​ໄປ​ຕາມ​ທິດ​ສີຂຽວ ​ແລະ ຍືນ​ຍົງ, ໂດຍ​ຈະ​ສືບ​ຕໍ່​ພະຍາຍາມ​ຫລຸດຜ່ອນ​ການ​ເອື່ອຍ​ອີງ​ໃສ່​ຂະ​ແໜງ​ຊັບພະຍາກອນ​ທຳ​ມະ​ຊາດ​, ຫລຸດຜ່ອນ​ການ​ເພິ່ງ​ພາ ​ແລະ ການ​ດຸ່ນດ່ຽງ​ງົບປະມານ​ຈາກ​ພາຍ​ນອກ, ສືບ​ຕໍ່​ເຂັ້ມງວດ​ໃນ​ດ້ານ​ການ​ປະຕິບັດ​ວິ​ໄນ​ແຜນການ-ການ​ເງິນ ​ແລະ ​ເດັດຂາດ​ບໍ່​ໃຫ້​ມີ​ໂຄງການ​ລົງທຶນ​ນອກ​ແຜນ​ຂອງ​ລັດ. ​ໃນ​ນັ້ນ, ​ຈະ​ເອົາ​ໃຈ​ໃສ່​​ຈັດຕັ້ງປະຕິບັດ​ມາດ​ຕະການ​ກະ​ຕຸ້ນ​ເສດຖະກິດ​ໃຫ້​ມີ​ປະສິດທິ​ຜົນ ຄື: (1) ສືບ​ຕໍ່​ຊຸກຍູ້​ເກັບ​ລາຍ​ຮັບ​ຈາກ​ຖານ​ລາຍ​ຮັບ​ທີ່​ມີ​ແລ້ວ​ໃຫ້​ຄົບ​ຖ້ວນ, ຫັນ​ການ​ເກັບ​ລາຍ​ຮັບ​ໄປ​ສູ່​ລະບົບ​ເອ​ເລັກ​ໂຕຣນິກທີ່​ທັນ​ສະ​ໄໝ​ຢ່າງ​ຈິງ​ຈັງ ເພື່ອປິດ​ຊ່ອງ​ຫວ່າງ​ການ​ຮົ່ວ​ໄຫລ​ຂອງ​ລາຍ​ຮັບ​ງົບປະມານ​ເທື່ອ​ລະ​ກ້າວ, ສົ່ງ​ເສີມ​ໃຫ້​ພາກ​ທຸລະ​ກິດ​ຖື​ບັນຊີ​ເພື່ອ​​ສ້າງ​ສະພາບ​ແວດ​ລ້ອມ​ໃຫ້​ພາກ​ທຸລະ​ກິດສາມາດ​ມອບ​ພັນທະ​ອາກອນ​ໃຫ້​​ລັດຖະບານ ​ແລະ ​ເປັນ​ເງື່ອນ​ໄຂ​ໃຫ້​ພາກ​ທຸລະ​ກິດ​ສາມາດ​ເຂົ້າຫາ​ແຫ​ລ່ງທຶນ​ໄດ້​ງ່າຍ​ຂຶ້ນ. ພ້ອມ​ນີ້ ກໍ​ຈະ​ສືບ​ຕໍ່​ຂະຫຍາຍ ​ແລະ ສົ່ງ​ເສີມ​ໃຫ້​ຫົວໜ່ວຍ​ທຸລະ​ກິດ ​ແລະ ປະຊາຊົນ​ຫັນ​ມາ​ໃຊ້​ວິທີ​ການ​ມອບ​ພັນທະ​ຕ່າງໆ ດ້ວຍ​ລະບົບ​ໂອນ​ເງິນ​ຜ່ານ​ທາງ​ເອ​ເລັກ​ໂຕຣນິກທີ່​ເຫັນ​ວ່າ​ໄດ້​ຮັບ​ໝາກຜົນ​ດີ​ໃຫ້​ນັບ​ມື້ຫລາຍ​ຂຶ້ນ. (2) ສືບ​ຕໍ່​ຊຸກຍູ້​ຢ່າງ​ແຂງ​ແຮງ​ໃຫ້​ຂະ​ແໜງ​ການ ​ແລະ ທ້ອງ​ຖິ່ນ​ສູ້​ຊົນຮັບຜິດຊອບ​ຫລາຍ​ກວ່າ​ເກົ່າ​ໃນ​ການ​ປະຕິບັດ​ແຜນ​ຜະລິດຕາມ​ລະດູ​ການ ​ເພື່ອ​ໃຫ້​​ບັນລຸ​ຕາມ​ຄາດໝາຍ​​ວາງ​ໄວ້​ໃນ​ປີ 2018 ​ໂດຍ​ລົງ​ຕິດຕາມ ​ແລະ ນຳ​ພາ​ເຮັດ​ຕົວ​ຈິງ​ຢ່າງ​ແທດ​ເຖິງ, ກວດຄືນ ​ແລະ ​ແກ້​ໄຂ​ຂໍ້​ຄົງ​ຄ້າງ​ທີ່​ກີດຂວາງ​ຕໍ່​ປະສິດທິພາບ ​ແລະ ປະສິດທິ​ຜົນ​ຂອງ​ການ​ຜະລິດ​ໃຫ້​ທັນ​ການ, ຮີບ​ຮ້ອນ​ຈັດ​ສັນ​ຄຸ້ມ​ຄອງ​ການ​ນຳ​ໃຊ້ ​ແລະ ພັດທະນາ​ທີ່​ດິນ​ກະສິກຳ, ຂະ​ຫຍາ​ຍການ​ຜະລິດ​ເປັນ​ກຸ່ມ​ເປັນ​ສະຫະກອນ ຫລື ຮູບ​ການ​ຮ່ວມ​ມື​ຂອງ​ປະຊາຊົນ​ແບບ​ອື່ນໆ, ຍົກ​ປະສິດທິພາບ, ຄຸນ​ນະພາ​ບຂອງ​ການ​ຜະລິດ; ກວດ​ເບິ່ງ​ຄືນ​ກົນ​ໄກ​ການຈັດຕັ້ງປະຕິບັດ​ການ​ຜະລິດ​ກະສິກຳ​ຕາມ​ສັນຍາ​ທີ່​ຫຍຸ້ງຍາກລະຫວ່າງ​ຊາວ​ກະສິກອນ ​ແລະ ຜູ້​ປະກອບ​ການ, ກະກຽມ​ແຫ​ລ່ງສິນ​ເຊື່ອ​ຈາກ​ທະນາຄານ​ນະ​ໂຍບາຍ, ທະນາຄານ​ສົ່ງ​ເສີມ​ກະສິກຳ​ໃຫ້​ຄອບຄົວ​ຊາວ​ກະສິກອນ ຫລື ຜູ້​ປະກອບ​ການ​ທີ່​ມີ​ຄຸນ​ນະພາ​ບ, ສືບ​ຕໍ່​ຊຸກຍູ້​ສົ່ງ​ເສີມ​ການ​ລົງທຶນ ​ແລະ ການ​ຜະລິດ​ເປັນ​ສິນຄ້າ​ໃນ​ຂະ​ແໜງ​ກະສິກຳ ​ເພື່ອ​ໃຫ້​ປະຊາຊົນ ​ແລະ ​ແຮງ​ງານ​ສ່ວນ​ໃຫຍ່​ຢູ່​ຂະ​ແໜງ​ກະສິກຳ​ໄດ້​ມີ​ການ​ເຄື່ອນ​ໄຫວ, ມີ​ວຽກ​ເຮັດ​ງານ​ທຳ ​ແລະ ມີ​ລາຍ​ຮັບ​ເພີ່ມ​ຂຶ້ນ, ສືບ​ຕໍ່​ສົ່ງ​ເສີມ​ການ​ພັດທະນາ​ອຸດສາຫະກຳ​ປຸງ​ແຕ່ງ​ກະສິກຳ, ​ໂດຍ​ສະ​ເພາະ​ອຸດສາຫະກຳ​ອາຫານ​ທີ່​ມີ​ຄຸນ​ນະພາ​ບ ​ເພື່ອ​ຫລຸດຜ່ອນ​ການ​ນຳ​ເຂົ້າ ​ແລະ ສົ່ງ​ເສີມ​ການ​ສົ່ງ​ອອກ​ຕ່າງປະ​ເທດ​ໃຫ້​ຫລາຍ​ຂຶ້ນ. ພ້ອມ​ນີ້ ກໍ​ສົ່ງ​ເສີມ ​ແລະ ​ເຜີຍ​ແຜ່​ການຄົ້ນຄວ້າ​ວິ​ໄຈ​ກ່ຽວ​ກັບ​ການ​ປູກ-ການ​ລ້ຽງ ​ເພື່ອ​ຍົກ​ຜະລິດ​ຕະພາບ ​ແລະ ສ້າງ​ຄວາມ​ອາດ​ສາມາດ​ແຂ່ງຂັນ​ໃຫ້​ແກ່​ການ​ຜະລິດ​ພາຍ​ໃນ. (3) ຍົກ​ປະສິດທິພາບ ​ແລະ ປະສິດທິ​ຜົນ​ຂອງ​ກົນ​ໄກ​ຄຸ້ມ​ຄອງ ​ແລະ ບໍລິການ​ປະຕູ​ດຽວ ທັງ​ຢູ່​ສູນ​ກາງ ​ແລະ ທ້ອງ​ຖິ່ນ ຕາມ​ທິດ​ຊີ້​ນຳ​ຂອງ​ຄຳ​ສັ່ງ​ເລກທີ 02/ນຍ 2018, ​ໂດຍ​ສະ​ເພາະ​ແມ່ນ​ການ​ຫລຸດ​ຂອດຂັ້ນ​ໃນ​ການ​ອະນຸມັດ​ລົງທຶນ, ການ​ເພີ່ມ​ຄວາມ​ວ່ອງ​ໄວ ​ແລະ ​ໂປ່​ງ​ໃສ​ໃນ​ການ​ອະນຸຍາດ​ດຳ​ເນີນ​ທຸລະ​ກິດ, ຊຸກຍູ້​ກົນ​ໄກ​ການ​ລາຍ​ງານ​ຄວາມ​ຄືບ​ໜ້າ​ໃນ​ການ​ປັບປຸງ​ແຕ່​ລະ​ຕົວ​ຊີ້​ວັດ​ຕໍ່​ກອງ​ປະຊຸມ​ຄະນະ​ສົ່ງ​ເສີມ ​ແລະ ຄຸ້ມ​ຄອງ​ການ​ລົງທຶນ. ພ້ອມ​ກັນ​ລົງ​ເລິກ​ເກັບ​ກຳ​ສະພາບ ​ແລະ ຊ່ວຍ​ຜູ້​ລົງທຶນ​ທີ່​ໄດ້​ລົງທຶນ​ເຂດ​ເສດຖະກິດ​ພິ​ເສດ​ແກ້​ໄຂ​ບັນຫາ​ທີ່​ກີດຂວາງ​ການ​ລົງທຶນ​ທີ່​ມີ​ປະສິດທິ​ຜົນ, ​ໂດຍ​ສະ​ເພາະ​ບັນຫາ​ຕົ້ນທຶນ​ຂອງ​ການ​ຜະລິດ​ທີ່​ຕິດ​ພັນ​ກັບ​ສະຖຽນ​ຂອງ​ການ​ສະໜອງ​ໄຟຟ້າ, ຕົ້ນທຶນ​ຈາກ​ການ​ຮົ່ວ​ໄຫລ​ໄຟຟ້າ, ການ​ສະໜອງ​ນ້ຳປະປາ, ການ​ບຳບັດ​ສິ່ງ​ເສດ​ເຫລືອ, ການ​ຫລຸດຜ່ອນ​ຄ່າ​ຂົນ​ສົ່ງ, ການ​ຫລຸດຜ່ອນ​ຂັ້ນຕອນ​ອະນຸມັດ​ການ​ສົ່ງ​ເສີມ ​ແລະ ອື່ນໆ ​ເພື່ອ​ໃຫ້ການ​ລົງທຶນ​ດັ່ງກ່າວ​ມີ​ປະສິດທິ​ຜົນ ​ແລະ ສາມາດ​ແຂ່ງຂັນ​ກັບ​ສາກົນ​ໄດ້. (4) ສືບ​ຕໍ່​ແກ້​ໄຂ​ໜີ້ສິນ​ພາຍ​ໃນ​ທີ່​ຍັງ​ຄ້າງ​ຊຳລະ​ໃຫ້​ແກ່​ບັນດາ​ຫົວໜ່ວຍ​ທຸລະ​ກິດ​ພາຍ​ໃນ​ທີ່​ຕິດ​ພັນ​ກັບ​ການ​ລົງທຶນ​ຂອງ​ລັດຖະບານ ​ແລະ ​ເປັນ​ໂຄງການ​ໃນ​ແຜນ​ທີ່​ເຮັດ​ສຳ​ເລັດ​ແລ້ວ 100% ​ແລະ ຜ່ານ​ການ​ຢັ້ງຢືນ​ຄວາມ​ຖືກຕ້ອງ​ຂອງ​ຂະ​ແໜງ​ການ, ​ໂດຍ​ຈະ​ສືບ​ຕໍ່​ຈັດ​ສັນ​ເຂົ້າ​ໃນ​ແຜນ​ຊຳລະ​ປະຈຳ​ປີ ​ແລະ ຄົ້ນຄວ້າ​ຊອກ​ຫາ​ແຫ​ລ່ງທຶນ​ຈາກ​ພາຍ​ໃນ ​ແລະ ພາຍ​ນອກ​ ມາສະ​ໜັບສະ​ໜູນ​ຕື່ມ. ພ້ອມ​​ນີ້ ກໍ​ຈະ​ສືບ​ຕໍ່​ສຸມ​ໃສ່​ແກ້​ໄຂ​ການ​ອວ່າຍ​ໜີ້​ສາມ​ແຈ​ໃຫ້​ສຳ​ເລັດ​ໂດຍ​ໄວ ​ແລະ ຄົ້ນຄວ້າ​ມາດ​ຕະການ​ຊ່ວຍ​ພາກ​ເອກະ​ຊົນ ​ເພື່ອ​ປົດ​ລ໋ອກ​ໃຫ້​ພາກ​ທຸລະ​ກິດ​ສາມາດ​ເຄື່ອນ​ໄຫວ​ໄດ້. (5) ສະກັດ​ກັ້ນ​ໄພ​ເງິນ​ເຟີ້, ​ໂດຍ​ສຸມ​ໃສ່​ຕິດຕາມ ​ແລະ ຄຸ້ມ​ຄອງ​ການ​ເໜັງ​ຕີງ​ຂອງ​ອັດຕາ​ແລກປ່ຽນ​ຢ່າງ​ໃກ້ຊິດ, ​ໂດຍ​ສະ​ເພາະ​ອັດຕາ​ແລກປ່ຽນ​ເງິນ​ກີບ​ທຽບ​ເງິນ​ບາດ ​ເພື່ອ​ບໍ່​ໃຫ້​ກະທົບ​ຕໍ່​ເງິນ​ເຟີ້​ຫລາຍ, ກຳນົດ​ເງິນຕາ​ຕ່າງປະ​ເທດ​ສະກຸນ​ຫລັກ​ຢ່າງ​ຈະ​ແຈ້ງ ​ເພື່ອ​ເປັນ​ບ່ອນ​ອີງ​ປະຕິບັດ​ນະ​ໂຍບາຍ ​ແລະ ມາດ​ຕະການ​ຕາມ​ຄວາມ​ເໝາະ​ສົມ​ໃຫ້​ອັດຕາ​ແລກປ່ຽນ​ປ່ຽນ​ແປງ​ຢູ່​ໃນ​ກອບ​ທີ່​ເໝາະ​ສົມ, ປັບປຸງ ​ແລະ ປະຕິບັດນະ​ໂຍບາຍ​ຄຸ້ມ​ຄອງ​ເງິນຕາ​ຕ່າງປະ​ເທດ​ໃຫ້​ເຂົ້າສູ່​ລະບົບ ​ເພື່ອ​ສາມາດ​ກຳ​ໄດ້​ກະ​ແສ​ເງິນ​ເຂົ້າ-ອອກປະ​ເທດ ​ແລະ ​ເປັນ​ຂໍ້​ມູນ​​ໃນ​ການວາງ​ນະ​ໂຍບາຍ​ອັດຕາ​ແລກປ່ຽນ, ຕິດຕາມຄຸ້ມ​ຄອງ​ລາຄາ​ສິນຄ້າ, ​ໂດຍ​ສະ​ເພາະ​ສິນຄ້າ​ທີ່​ມີ​ຜົນ​ກະທົບ​ແຮງ​ຕໍ່ຕົ້ນທຶນ​ການ​ຜະລິດ ​ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ ກໍ​ຄື​ໝວດ​ລາຄາ​ສິນຄ້າ​ຄວບ​ຄຸມ ​ເພື່ອ​ບໍ່​ໃຫ້​ເໜັງ​ຕີງ​ແຮງ, ປັບ​ໂຄງ​ສ້າງ​ລາຄາ​ນ້ຳມັນ​ໃນ​ຂອບ​ເຂດ​ທົ່ວ​ປະ​ເທດ​ໃຫ້​ມີ​ຄວາມ​ເໝາະ​ສົມ, ຮັບປະກັນ​ບໍ່​ໃຫ້​ກະທົບ​ແຮງ​ຕໍ່​ເງິນ​ເຟີ້ ​ແລະ ຕົ້ນທຶນ​ການ​ຜະລິດ​ພາຍ​ໃນ, ​ແຕ່​ກໍ​ຮັບປະກັນ​ການ​ສ້າງ​ລາຍ​ຮັບ​ເຂົ້າງົບປະມານ​ຕາມ​ສະພາບ​ຄວາມ​ເປັນ​ຈິງ​ຂອງ​ລາຄາ​ນ້ຳມັນ​ໃນ​ຕະຫລາດ​ໂລກ. (7) ຄົ້ນຄວ້າ ​ແລະ ຄັດ​ເລືອກ​ກຸ່ມ​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ​ທີ່​ມີ​ທ່າ​ແຮງ ​ເພື່ອ​ຝຶກ​ອົບຮົມ​ໃຫ້​ມີ​ຄຸນ​ນະພາ​ບ ​ແລະ ຈັດ​ບູລິ​ມະ​ສິດ​ເຂົ້າ​ເຖິງ​ສິນ​ເຊື່ອ​ຂອງ​ກອງ​ທຶນ, ສ້າງຕັ້ງກອງ​ທຶນ​ສະໜອງ​ສິນ​ເຊື່ອ​ສຳລັບ​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ, ຄົ້ນຄວ້າ ​ແລະ ກຳນົດ​ບັນດາ​ກິດຈະກຳ​ທີ່​ຈະ​ໄດ້​ຮັບ​ນະ​ໂຍບາຍ​ດ້ານ​ພາສີ-ອາກອນ​ຜ່ອນຜັນ​ໃຫ້​ແກ່​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ​ທີ່​ມີ​ທ່າ​ແຮງ, ສ້າງ​ຖານ​ຂໍ້​ມູນ ​ແລະ ສະໜອງ​ຂ່າວສານ​ໃຫ້​ແກ່​ຜູ້​ປະກອບ​ການ​ວິ​ສາ​ຫະກິດ​ຂະໜາດ​ນ້ອຍ ​ແລະ ກາງ​ໃຫ້​ເຂົ້າສູ່​ລະບົບ​ການ​ຄ້າ​ຜ່ານ​​ເອ​ເລັກ​ໂຕຣນິກ​ໄດ້, ກະກຽມ​ບຳລຸງ​ສ້າງ​ບຸກຄະລາ​ກອນ, ຂະຫຍາຍ​ສູນ​ໃຫ້​ຄຳ​ປຶກສາ​ໄປ​ສູ່​ແຂວງ​ຕ່າງໆ, ຈັດຕັ້ງ​ເປີດ​ເວທີ​ໃຫ້​ນັກທຸລະກິດ​ພາຍ​ໃນ​ໄດ້​ມີ​ການ​ພົບ​ປະ​ແລກປ່ຽນ​ຄວາມ​ຮູ້, ຖ່າຍ​ທອດ​ເຕັກ​ໂນ​ໂລ​ຊີ​ຈາກ​ບັນດາ​ນັກທຸລະກິດ​ສາກົນ​ໃຫ້​ຫລາຍ​ຂຶ້ນ, ສ້າງ​ສູນ​ຄົ້ນຄວ້າ ​ແລະ ການ​ພັດທະນາ. (8) ສືບ​ຕໍ່​ປະຕິບັດ​ຕາມ​ແຜນການ-​ແຜນ​ງານ ​ແລະ ກິດຈະກຳ​ຂອງ​ປີ​ທ່ອງ​ທ່ຽວ​ແຫ່ງ​ຊາດ 2018 ​ໂດຍ​ໂຄສະນາ​ແຫ​ລ່ງທ່ອງ​ທ່ຽວ​ທີ່​ມີ​ທ່າ​ແຮງ​ໃຫ້​ຫລາຍ​ຂຶ້ນ ​ແລະ ​ເຂົ້າເຖິງ​ກຸ່ມ​ເປົ້າໝາຍ, ສືບ​ຕໍ່​ປັບປຸງ​ຄຸນ​ນະພາ​ບການ​ບໍລິການ​ທ່ອງ​ທ່ຽວ ​ແລະ ບໍລິການ​ທີ່​ປິ່ນ​ອ້ອມ​ໃຫ້​ດີ​ຂຶ້ນ​ແທ້, ສົ່ງ​ເສີມ ​ແລະ ຊ່ວຍ​ຜູ້​ປະກອບ​ການ​ດ້ານ​ທ່ອງ​ທ່ຽວ​ຍົກ​ສູງ​ຄວາມ​ອາດ​ສາມາດ​ແຂ່ງຂັນ​ຂອງ​ຕົນ ​ແລະ ​ໂຄສະນາ​ຜະລິດ​ຕະພັນ​ທ່ອງ​ທ່ຽວ​ຂອງ​ຕົນ​ຢ່າງ​ເປັນ​ຂະ​ບວນ, ສ້າງ​ຂະ​ບວນການ ​ແລະ ກິດຈະກຳ​ທີ່​ໜ້າ​ສົນ​ໃຈ ​ແລະ ດຶງ​ດູດ​ນັກ​ທ່ອງ​ທ່ຽວ ​ໂດຍ​ສະ​ເພາະ​ໃນ​ຊ່ວງ​ບຸນ​ເທດສະການ​ຕ່າງໆ, ແຕ່​ນີ້​ຮອດ​ທ້າຍ​ປີ​ເພື່ອ​ສ້າງ​ບັນຍາກາດ​ໃໝ່​ໃຫ້​ແກ່​ການທ່ອງທ່ຽວ, ຈັດຕັ້ງການ​ໃຫ້​ຄຳ​ປຶກສາ ​ແລະ ຝຶກ​ອົບຮົມ​ຜູ້​ປະກອບ​ການ​ດ້ານ​ການທ່ອງທ່ຽວ, ສະໜອງ​ທຶນຮອນ​ຈຳນວນ​ໜຶ່ງ ​ເພື່ອ​ສ້ອມ​ແປງ​ເສັ້ນທາງ ​ແລະ ສິ່ງ​ອຳນວຍ​ຄວາມ​ສະດວກ​ທີ່​ສຳຄັນ​ເຂົ້າ​ເຖິງ​ແຫ​ລ່ງທ່ອງ​ທ່ຽວ​ໃຫ້​ສະດວກ, ​ເພີ່ມ​ທະວີ​ການ​ປະສານ​ງານ​ລະຫວ່າງ​ຂະ​ແໜງ​ການ​ຢູ່​ສູນ​ກາງ ​ແລະ ທ້ອງ​ຖິ່ນ ​ເພື່ອ​ອຳນວຍ​ຄວາມ​ສະດວກ​ໃນ​ການທ່ອງທ່ຽວ​ຄົບ​ວົງ​ຈອນ, ​ເພີ່ມ​ທະວີ​ການ​ຮ່ວມ​ມື ​ແລະ ​ເຊື່ອມ​ໂຍງ​ເຄືອ​ຂ່າຍ​ທ່ອງ​ທ່ຽວ​ໃນ​ພາກພື້ນ ​ເພື່ອ​ເຂົ້າ​ເຖິງ​ນັກ​ທ່ອງ​ທ່ຽວ​ທີ່​ມາ​ທ່ຽວ​ຢູ່​ພາກພື້ນ​ໃຫ້​ຫລາຍ​ຂຶ້ນ, ກວດກາ ​ແລະ ​ແກ້​ໄຂ​ບັນດາປາກົດ​ຫຍໍ້​ທໍ້​ຕ່າງໆ​ຕໍ່​ນັກ​ທ່ອງ​ທ່ຽວ ​ເປັນຕົ້ນບັນຫາ​ການ​ເຂົ້າ-ອອກ​ຂອງ​ນັກ​ທ່ອງ​ທ່ຽວ​ຢູ່​ບັນດາ​ດ່ານ​ສາກົນ​ທີ່​ຍັງ​ຊັກ​ຊ້າ, ການ​ເກັບ​ຄ່າ​ທຳນຽມ​ຢູ່​ແຕ່​ລະ​ດ່ານ ​ແລະ ການ​ເກັບ​ປີ້​ເຂົ້າຊົມ​ສະຖານ​ທີ່​ທ່ອງ​ທ່ຽວ​ຕ່າງໆ​ຍັງ​ບໍ່​ເອກະ​ພາບ, ການ​ເອົາ​ປຽບ​ຄ່າ​ໂດຍສານ​ຕໍ່​ນັກ​ທ່ອງ​ທ່ຽວ​ຕ່າງປະ​ເທດ ​ແລະ ອື່ນໆ​ທີ່​ບໍ່​ສົມ​ເຫດ​ສົມ​ຜົນ ​ເພື່ອ​ເຮັດ​ໃຫ້​ສາມາດ​ຫລຸດ​ຕົ້ນທຶນ ​ແລະ ​ແຂ່ງຂັນ​ໄດ້​ກັບບັນດາປະ​ເທດໃນພາກພື້ນ​.

- Wave100S AD to Website 2020 0 - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%
- lattana banner - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%
- lattana banner 1 - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%
-    AD conten website - ການເຕີບໂຕຂອງເສດຖະກິດໃນ 6 ເດືອນຕົ້ນປີຈະບັນລຸ 6,7%
error: Alert: ເນື້ອຫາຂ່າວມີລິຂະສິດ !!