ເປີດສູນຄົ້ນຄວ້າແມ່ນ້ຳຂອງສາກົນໃນລາວ

- grand opening mekong research center - ເປີດສູນຄົ້ນຄວ້າແມ່ນ້ຳຂອງສາກົນໃນລາວ
- Untitled design - ເປີດສູນຄົ້ນຄວ້າແມ່ນ້ຳຂອງສາກົນໃນລາວ

ພິທີເປີດສູນຄົ້ນຄວ້າແມ່ນ້ຳຂອງສາກົນໃນ ສປປ ລາວ ( Global Center for Mekong Studies of Laos: GCMS-Laos) ໄດ້ມີຂຶ້ນ​ໃນວັນທີ 6 ມິຖຸນານີ້, ຢູ່ສະຖາບັນການຕ່າງປະເທດ, ​ໂດຍ​ການເຂົ້າຮ່ວມຂອງ ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ,ທ່ານ ຫວັງ ເວີນທຽນ (Wang Wentian) ເອກອັກຄະລັດຖະທູດແຫ່ງ ສປ ຈີນ ປະຈຳລາວ, ມີຜູ້ຕາງໜ້າຈາກກອງເລຂາສູນຄົ້ນຄວ້າແມ່ນ້ຳຂອງ ສປ ຈີນ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມ.

​ໂອກາດ​ນີ້, ທ່ານນາງ ພິມພາ ແກ້ວມີໄຊ ຮອງຫົວໜ້າສະຖາບັນການຕ່າງປະເທດ ​ແລະ ທ່ານ Lin Qing ຫົວໜ້າກົມຄົ້ນຄວ້າບັນຫາສາກົນຂອງສະຖາບັນຄົ້ນຄວ້າສາກົນຂອງຈີນ, ຫົວໜ້າກອງເລຂາສູນຄົ້ນຄວ້າແມ່ນ້ຳຂອງສາກົນຂອງຈີນ ໃຫ້ຮູ້ວ່າ: ການຮ່ວມມືໃນຂອບເຂດແມ່ນ້ຳຂອງ-ແມ່ນ້ຳລ້ານຊ້າງ ເປັນກົນໄກການຮ່ວມມືອະນຸພາກພື້ນທີ່ເຊື່ອມຕໍ່ລະຫວ່າງ ສປ ຈີນ ແລະ ບັນດາປະເທດສະມາຊິກອານຸພາກພື້ນແມ່ນ້ຳຂອງ ທີ່ເນັ້ນໃສ່ການຮ່ວມມືດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ວັດທະນະທຳ-ສັງຄົມ, ​ເຊິ່ງລັດຖະບານຈີນ ໃຫ້ຄວາມສຳຄັນໃນການຮ່ວມມືກັບທຸກປະເທດບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ສອດຄ່ອງກັບນະໂຍບາຍ ຂອງຈີນ ທີ່ໃຫ້ຄວາມສຳຄັນໃນການຮ່ວມມືກັບບັນດາປະເທດບ້ານໃກ້ເຮືອນຄຽງ.

ການເປີດສູນດັ່ງກ່າວ, ເປັນໂອກາດອັນດີໃຫ້ແກ່ ສປປ ລາວ ໃຫ້ບັນລຸເປົ້າໝາຍຍຸດທະສາດການຫັນປະເທດຈາກປະເທດທີ່ບໍ່ຊາຍ​ແດນ​ຕິດທະເລ ກາຍເປັນປະເທດທາງຜ່ານຂອງສາກົນ, ອັນເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມຂອງປະເທດ, ເຮັດໃຫ້ປະຊາຊົນລາວຫລຸດພົ້ນອອກຈາກຄວາມທຸກຍາກເທື່ອລະກ້າວ.

ສປປ ລາວ ເປັນປະເທດທີ 2 ທີ່ໄດ້ເປີດສູນຄົ້ນຄວ້າແມ່ນໍ້າຂອງສາກົນ ຖັດຈາກປະເທດກຳປູເຈຍ, ​ສູນດັ່ງກ່າວແມ່ນການລິເລີ່ມຂອງຝ່າຍຈີນ ແລະ ບັນດາປະເທດສະມາຊິກໄດ້ເຫັນດີຕໍ່ການລິເລີ່ມດັ່ງກ່າວ ແລະ ເຫັນພ້ອມຮັບຮອງເອົາໃນກອງປະຊຸມລັດຖະມົນຕີຕ່າງປະເທດໃນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄັ້ງທີ 2 (The 2th Lancang-Mekong Cooperation: LMC) ໃນເດືອນພະຈິກ 2016 ທີ່ພະນົມເປັນປະເທດກຳປູເຈຍ, ​ເຊິ່ງເປັນເຄືອຂ່າຍຄັງປັນຍາ (Think Thank) ໃນຂອບການຮ່ວມມືດັ່ງກ່າວ ເພື່ອສົ່ງເສີມການຮ່ວມມື, ການແລກປ່ຽນທາງດ້ານວິຊາການ ແລະ ຍົກສູງການມີສ່ວນຮ່ວມຂອງບັນດາສະຖາບັນຄົ້ນຄ້ວາໃນການຕອບສະໜອງຄວາມຄິດເຫັນ, ຂໍ້ສະເໜີແນະທາງດ້ານນະໂຍບາຍໃຫ້ແກ່ລັດຖະບານ ແລະ ອົງການຈັດຕັ້ງສາກົນອື່ນໆ. ທັງນີ້, ກໍເພື່ອເປັນການສົ່ງເສີມການຮ່ວມມືກັນສຳລັບອານາຄົດຕໍ່ການພັດທະນາທີ່ຮຸ່ງເຮືອງຂອງບັນດາປະເທດແມ່ນ້ຳຂອງ-ແມ່ນ້ຳລ້ານຊ້າງທັງ 6 ປະເທດຄື: ລາວ, ສປ ຈີນ, ກຳປູເຈຍ, ມຽນມາ, ໄທ ແລະ ຫວຽດນາມ.

- Wave100S AD to Website 2020 0 - ເປີດສູນຄົ້ນຄວ້າແມ່ນ້ຳຂອງສາກົນໃນລາວ

 

 

- WhatsApp Image 2020 05 27 at 5 - ເປີດສູນຄົ້ນຄວ້າແມ່ນ້ຳຂອງສາກົນໃນລາວ
- WhatsApp Image 2020 05 27 at 5 - ເປີດສູນຄົ້ນຄວ້າແມ່ນ້ຳຂອງສາກົນໃນລາວ
error: Alert: ເນື້ອຫາຂ່າວມີລິຂະສິດ !!