ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ

- Untitled 1 1 - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ
- AGL banner - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ

​​ເຖິງ​ວ່າ​ເສດຖະກິດມະຫາ​ພາກຂອງ​ປະ​ເທດ​ລາວຂະຫຍາຍຕົວຕໍ່​ເນື່ອງ, ແຕ່​ເມື່ອ​ທຽບ​ໃສ່​ບັນດາປະ​ເທດ​ໃນພາກພື້ນ​ເຫັນ​ວ່າ​ ​ເສດຖະກິດ​ຂອງ​ປະ​ເທດ​ຍັງມີ​ຄວາມ​ບອບ​ບາງ ​ແລະ  ຍັງ​ສືບ​ຕໍ​ຂາດດູນ​ງົບປະມານ,​ເຮັດ​ໃຫ້​ເກີດ​ຄວາມ​ກົດ​ດັນ​ຕໍ່​ສະພາບ​ຄ່ອງ​ແລະ​ມີ​ຄວາມ​ສ່ຽງ​ຕໍ່​ການ​ຄຸ້ມ​ຄອງ​ເສດຖະກິດ​ມະຫາ​ພາກ ນີ້​ແມ່ນ​ຄຳ​ເຫັນ​ບາງ​ຕອນ​ຂອງ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ລາຍ​ງານ​ຕໍ່​ກອງ​ປະຊຸມ​ສະ​ໄຫມ​ສາມັນ​ເທື່ອ 5 ຂອງ​ສະພາ​ແຫ່ງ​ຊາດ ຊຸດ​ທີ VIII  ທີ່​ພວມ​ດຳ​ເນີນ​ຢູ່​ນີ້, ​ໂດຍ​ຊີ້​ໃຫ້​ເຫັນ​ວ່າ ເສດຖະກິດມະຫາພາກ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ແຕ່ຜ່ານການຈັດຕັ້ງປະຕິບັດຕົວຈິງໃນ 4 ເດືອນ ເຫັນວ່າການເຕີບໂຕທາງເສດຖະກິດ ຍັງບໍ່ທັນໜັກແໜ້ນ, ສ່ວນໃຫຍ່ຍັງອີງໃສ່ການລົງທຶນຈາກການກໍ່ສ້າງພື້ນຖານໂຄງລ່າງ, ການຂຸດຄົ້ນຊັບພະຍາກອນທໍາມະຊາດ ເຊິ່ງບັນດາຂະແໜງການເຫຼົ່ານີ້ ຍັງບໍ່ທັນໄດ້ສ້າງລາຍຮັບ ແລະ ວຽກເຮັດງານທໍາໃຫ້ແກ່ຜູ້ອອກແຮງງານລາວເທົ່າທີ່ຄວນ, ຖ້າສະພາບການຂະຫຍາຍຕົວຍັງມີຄວາມບອບບາງລັກສະນະນີ້, ການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ຄາດຄະເນໝົດປີຈະບັນລຸໄດ້ພຽງ 6,7% ຫຼຸດແຜນການທີ່ວາງໄວ້ຄື 7%. ​ສ່ວນ​ສະພາບການ​ເກັບ​ລາຍ​ຮັບງົບປະມານ​​ ເຖິງ​ວ່າ​ຈະ​ບໍ່​ຫຼຸດ​ແຜນການ ​ແຕ່​​ກໍ​ຍັງ​ບໍ່​ພຽງພໍ​ກັບ​ລາຍ​ຈ່າຍທັງ​ຫມົດ​ຂອງ​ພາກ​ລັດ ສະນັ້ນ ​ໃນ 6 ​ເດືອນ​ທ້າຍ​ປີນີ້. ລັດຖະບານ​ຈະ​ສືບ​ຕໍ່​ຈັດຕັ້ງປະຕິບັດ​ນະ​ໂຍບາຍ​ ສ້າງ​ຄວາມ​ເຕີບ​ໃຫຍ່​ທາງ​ເສດຖະກິດ ​ໂດຍ​ອີງ​ໃສ່​ກຳລັງ​ແຮງ​ສັງ​ລວມທົ່ວ​ຂົງ​ເຂດ​ເສດຖະກິດ-ສັງຄົມ ​ເພື່ອ​ໃຫ້​ເສດຖະກິດ​ມະຫາ​ພາກ​ມີ​ສະຖຽນ​ລະ​ພາບ ​ແລະ ​ເຕີບ​ໃຫຍ່​ຢ່າງ​ຕໍ່​ເນື່ອງ, ການ​ພັດທະນາ​ໂດຍ​ລວມ​ໄປ​ຕາມ​ທິດ​ສີຂຽວ ​ແລະ ຍືນ​ຍົງ, ໂດຍ​ຈະ​ສືບ​ຕໍ່​ພະຍາຍາມ​ຫລຸດຜ່ອນ​ການ​ເອື່ອຍ​ອີງ​ໃສ່​ຂະ​ແໜງ​ຊັບພະຍາກອນ​ທຳ​ມະ​ຊາດ​, ຫລຸດຜ່ອນ​ການ​ເພິ່ງ​ພາ ​ແລະ ການ​ດຸ່ນດ່ຽງ​ງົບປະມານ​ຈາກ​ພາຍ​ນອກ, ສືບ​ຕໍ່​ເຂັ້ມງວດ​ໃນ​ດ້ານ​ການ​ປະຕິບັດ​ວິ​ໄນ​ແຜນການ-ການ​ເງິນ ​ແລະ ​ເດັດຂາດ​ບໍ່​ໃຫ້​ມີ​ໂຄງການ​ລົງທຶນ​ນອກ​ແຜນ​ຂອງ​ລັດ. ​ໃຊ້ມາດ​ຕະການ​ກະ​ຕຸ້ນ​ເສດຖະກິດ​ໃຫ້​ມີ​ປະສິດທິ​ຜົນ ຄື: ສືບ​ຕໍ່​ຊຸກຍູ້​ເກັບ​ລາຍ​ຮັບ​ຈາກ​ຖານ​ລາຍ​ຮັບ​ທີ່​ມີ​ແລ້ວ​ໃຫ້​ຄົບ​ຖ້ວນ ​ສູ່​ລະບົບ​ເອ​ເລັກ​ໂຕຣນິກທີ່​ທັນ​ສະ​ໄໝ​ຢ່າງ​ຈິງ​ຈັງ ເພື່ອປິດ​ຊ່ອງ​ຫວ່າງ​ການ​ຮົ່ວ​ໄຫລ​ຂອງ​ລາຍ​ຮັບ​ງົບປະມານ​ເທື່ອ​ລະ​ກ້າວ; ສົ່ງ​ເສີມ​ໃຫ້​ພາກ​ທຸລະ​ກິດ​ຖື​ບັນຊີ​ ເພື່ອ​​ສ້າງ​ສະພາບ​ແວດ​ລ້ອມ​ໃຫ້​ພາກ​ທຸລະ​ກິດສາມາດ​ມອບ​ພັນທະ​ອາກອນ​ໃຫ້​​ລັດຖະບານ,​ໃນ​ເງື່ອນ​ໄຂ​ເຂົ້າຫາ​ແຫ​ລ່ງທຶນ​ໄດ້​ງ່າຍ​ຂຶ້ນ. ທັງສົ່ງ​ເສີມ​ໃຫ້​ຫົວໜ່ວຍ​ທຸລະ​ກິດ ​ແລະ ປະຊາຊົນ​ຫັນ​ມາ​ໃຊ້​ວິທີ​ການ​ມອບ​ພັນທະ​ຕ່າງໆ ດ້ວຍ​ລະບົບ​ໂອນ​ເງິນ​ຜ່ານ​ທາງ​ເອ​ເລັກ​ໂຕຣນິກທີ່​​ໄດ້​ຮັບ​ຜົນ​ດີ​.ໃຫ້​ນັບ​ມື້ຫລາຍ​ຂຶ້ນ.

ການຈັດ​ສັນ​ຄຸ້ມ​ຄອງ​ການ​ນຳ​ໃຊ້ ​ແລະ ພັດທະນາ​ທີ່​ດິນ​ກະສິກຳ, ຂະ​ຫຍາ​ຍການ​ຜະລິດ​ເປັນ​ກຸ່ມ​ເປັນ​ສະຫະກອນ ຍົກ​ປະສິດທິພາບ, ຄຸນ​ນະພາ​ບຂອງ​ການ​ຜະລິດ; ກະກຽມ​ແຫ​ລ່ງສິນ​ເຊື່ອ​ຈາກ​ທະນາຄານ​ນະ​ໂຍບາຍ, ທະນາຄານ​ສົ່ງ​ເສີມ​ກະສິກຳ​ໃຫ້​ຄອບຄົວ​ຊາວ​ກະສິກອນ ຫລື ຜູ້​ປະກອບ​ການ​ທີ່​ມີ​ຄຸນ​ນະພາ​ບ. ​ຊຸກຍູ້​ສົ່ງ​ເສີມ​ການ​ລົງທຶນ ​ແລະ ການ​ຜະລິດ​ເປັນ​ສິນຄ້າ​ໃນ​ຂະ​ແໜງ​ກະສິກຳ,ການ​ພັດທະນາ​ອຸດສາຫະກຳ​ປຸງ​ແຕ່ງ​ກະສິກຳ, ​ ເພື່ອ​ຫລຸດຜ່ອນ​ການ​ນຳ​ເຂົ້າ ​ແຕ່​ສົ່ງ​ອອກ​ຕ່າງປະ​ເທດ​ໃຫ້​ຫລາຍ​ຂຶ້ນ.

ສືບ​ຕໍ່​ແກ້​ໄຂ​ໜີ້ສິນ​ພາຍ​ໃນ​ທີ່​ຍັງ​ຄ້າງ​ຊຳລະ​ໃຫ້​ແກ່​ບັນດາ​ຫົວໜ່ວຍ​ທຸລະ​ກິດ​ພາຍ​ໃນ​ທີ່​ຕິດ​ພັນ​ກັບ​ການ​ລົງທຶນ​ຂອງ​ລັດຖະບານ ​ແລະ ​ເປັນ​ໂຄງການ​ໃນ​ແຜນ​ທີ່​ເຮັດ​ສຳ​ເລັດ​ແລ້ວ 100% ​ ​ຈັດ​ສັນ​ເຂົ້າ​ໃນ​ແຜນ​ຊຳລະ​ປະຈຳ​ປີ ​ແລະ ຄົ້ນຄວ້າ​ຊອກ​ຫາ​ແຫ​ລ່ງທຶນ​ຈາກ​ພາຍ​ໃນ ​ແລະ ພາຍ​ນອກ​ ມາສະ​ໜັບສະ​ໜູນ​ຕື່ມ​ແລະ​ສຸມ​ໃສ່​ແກ້​ໄຂ​ການ​ອວ່າຍ​ໜີ້​ສາມ​ແຈ​ໃຫ້​ສຳ​ເລັດ​ໂດຍ​ໄວ.

- Wave100S AD to Website 2020 0 - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ
- lattana banner 1 - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ
-    AD conten website - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ
- lattana banner - ເສດຖະກິດ​ລາວ​ຂະຫຍາຍຕົວ​ແຕ່ຍັງ​ສືບ​ຕໍ່​ຂາດດູນ​ງົບປະມານ
error: Alert: ເນື້ອຫາຂ່າວມີລິຂະສິດ !!