ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ

- education - ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ
- Untitled design - ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ

ເມື່ອທ້າຍອາທິດຜ່ານມານີ້, ທ່ານລັດຖະມົນຕີກະຊວງສຶກສາທິການ ແລະ ກິລາ ນາງ ແສງເດືອນ ຫລ້າຈັນທະບູນໄດ້ຊີ້ແຈງກ່ຽວກັບກໍລະນີການບັນຈຸລັດຖະກອນຄູຕໍ່ກອງປະຊຸມສະພາແຫ່ງຊາດວ່າ: ການບັນຈຸລັດຖະກອນຄູໃນຜ່ານມາແມ່ນແບ່ງປັນຕາມຄວາມຕ້ອງການຂອງໂຮງຮຽນໃນຂອບເຂດທົ່ວປະເທດ, ໂດຍເລັ່ງໃສ່ອາສາສະໝັກທີ່ສິດສອນແລ້ວຫລາຍປີ ແຕ່ຕ້ອງຜ່ານການສອບເສັງ ແລະ ປະເມີນຈາກໂຮງຮຽນ ຈຶ່ງມີສິດສົ່ງລາຍຊື່ເພື່ອຂໍບັນຈຸລັດຖະກອນໄດ້, ຊຶ່ງໃນສົກປີ 2018 ກະຊວງສຶກສາທິການ ແລະ ກິລາ ໄດ້ຮັບໂກຕ້າລັດຖະກອນຈຳນວນ 1.850 ຄົນ, ຈາກນັ້ນໄດ້ຮ່ວມກັບແຂວງ, ເມືອງ ລົງສຳຫລວດລັດຖະກອນຄູ ແລະ ຄູອາສາສະໝັກໃນໂຮງຮຽນທົ່ວປະເທດທັງໝົດ 12.744 ແຫ່ງ ແລະ ພົບວ່າຍັງມີຄວາມຕ້ອງການຄູຫລາຍກວ່າ 19.750 ຄົນ, ຊຶ່ງບາງໂຮງຮຽນບາງແຫ່ງບໍ່ມີຄູສອນ, ບາງບ່ອນມີຄູສອນແຕ່ບໍ່ຖືກວິຊາ ເຊັ່ນ: ບາງບ່ອນຕ້ອງການຄູສອນເລກແຕ່ບໍ່ມີ ຈຶ່ງໄດ້ເອົາຄູວິຊາອື່ນໄປສອນແທນ, ຊຶ່ງກໍລະນີດັ່ງກ່າວຈະຈັດຢູ່ປະເພດຄູບໍ່ພໍ. ຊຶ່ງຜ່ານການກວດກາພົບວ່າມີຄູເຫລືອຢູ່ 9.660 ກວ່າຄົນ. ດັ່ງນັ້ນ, ເພື່ອຮັບປະກັນການບັນຈຸລັດຖະກອນຄູ ຕາມ ຄຳແນະນຳຂອງລັດຖະບານໃຫ້ມີຄຸນນະພາບ, ມີຄວາມໂປ່ງໃສ, ຍຸຕິທຳ ແລະ ຄັດເລືອກໄດ້ລັດຖະກອນຄູທີ່ເກັ່ງ, ມີພອນສະຫວັນ, ມີຄຸນສົມບັດດີ, ຮັກອາຊີບຄູ, ສອດຄ່ອງຕາມຄວາມຮຽກຮ້ອງຕ້ອງການຂອງແຕ່ລະລາຍວິຊາທີ່ຍັງຂາດຄູ, ທັງຫລີກລ້ຽງຫາງສຽງຂອງສັງຄົມ ແລະ ຮັບປະກັນໃຫ້ແກ່ການສະໜອງລັດຖະ ກອນຄູໃຫ້ເຂດຫ່າງໄກສອກຫລີກ, ບ່ອນທີ່ຂາດເຂີນຄູຕາມຜົນການສຳຫລວດ ສະນັ້ນ, ຈຶ່ງໄດ້ຕົກລົງໃຫ້ໂຮງຮຽນເປັນຜູ້ຄັດເລືອກໂດຍກົງຕາມຄວາມຕ້ອງການຂອງຕົນ ແລ້ວລາຍຊື່ໃຫ້ເມືອງເພື່ອກວດກາ. ຈາກນັ້ນສົ່ງໃຫ້ແຂວງຈະສັງລວມຄືນເພື່ອຈັດລຽງບຸລິມະສິດໃຫ້ເມືອງທີ່ຂາດຄູຕາມຕົວຈິງ.

ທ່ານລັດຖະມົນຕີກະຊວງສຶກສາທິການ ແລະ ກິລາ ໃຫ້ຮູ້ວ່າ: ສຳລັບການຈັດບຸລິມະສິດຢູ່ບັນດາເມືອງໃນນະຄອນຫລວງແມ່ນໃຫ້ສົ່ງລາຍຊື່ເມືອງລະ 5 ຄົນ, ສ່ວນຢູ່ຕົວເມືອງຂອງບັນດາແຂວງແມ່ນ 7 ຄົນ ແລະ ຢູ່ຕາມຊານເມືອງ 10 ຄົນ, ສ່ວນຢູ່ເຂດຊົນນະບົດໃຫ້ສົ່ງລາຍຊື່ມາ 15 ຄົນ, ຊຶ່ງຜ່ານການສັງລວມມີຄວາມຕ້ອງການຄູທັງໝົດ 2.979 ຄົນ, ແຕ່ໂກຕ້າທີ່ໄດ້ຮັບຈາກລັດຖະ ບານມີພຽງ 1.850 ຄົນ. ດັ່ງນັ້ນ, ກະຊວງສຶກສາທິການ ແລະ ກິລາ ຈຶ່ງໄດ້ປຶກສາຫາລືແບ່ງໃຫ້ບັນດາແຂວງທັງໝົດ 1.683 ຄົນ, ໂດຍແຂວງທີ່ຮັບໂກຕ້າຫລາຍກວ່າໝູ່ແມ່ນແຂວງສະຫວັນນະເຂດມີຈຳນວນ 172 ຄົນ ແລະ ໄດ້ໜ້ອຍກວ່າໝູ່ແມ່ນແຂວງໄຊສົມບູນມີ 68 ຄົນ. ສ່ວນກະຊວງ ແລະ ສະຖາບັນ ການສຶກສາ ລວມທັງມະຫາວິທະຍາໄລທັງ 4 ແຫ່ງ ແລະ ວິທະຍາໄລຕ່າງໆໄດ້ຮັບໂກຕ້າພຽງແຕ່ 150 ຄົນ ແລະ ສ່ວນທີ່ເຫລືອ 17 ຄົນແມ່ນໄວ້ແບ່ງໃຫ້ສຶກສາທີ່ໄດ້ຮັບໃບປະກາດແດງ, ນັກກິລາທີມຊາດທີ່ໄດ້ຮັບຫລຽນຈາກການແຂ່ງຂັນລະດັບຊາດ ແລະ ລະດັບສາກົນ ເພື່ອບັນຈຸເຂົ້າສອນຢູ່ໂຮງຮຽນພອນສະ ຫວັນການກິລາ ແລະ ນັກສຶກສາລະດັບປະລິນຍາໂທ ແລະ ປະລິນຍາເອກ ຕາມລາຍວິຊາທີ່ມີຄວາມຕ້ອງການຕົວຈິງ.

- Wave100S AD to Website 2020 0 - ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ
- WhatsApp Image 2020 05 27 at 5 - ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ
- WhatsApp Image 2020 05 27 at 5 - ລັດຖະມົນຕີສຶກສາຊີ້ແຈງການບັນຈຸລັດຖະກອນຄູ
error: Alert: ເນື້ອຫາຂ່າວມີລິຂະສິດ !!