ແມ່ຍິງກະຊວງການຕ່າງປະເທດລາວ- ຫວຽດນາມ ພົບປະແລກປ່ຽນປະຈຳປີທີ່ນະຄອນຫລວງພະບາງ
ເມື່ອດົນມານີ້, ຄະນະສະຫະພັນແມ່ຍິງກະຊວງການຕ່າງປະເທດນຳໂດຍ ທ່ານນາງ ອາລຸນີ ກົມມະສິດ ພັນລະຍາລັດຖະມົນຕີ, ປະທານກິດຕິມະສັກ ສະຫະພັນແມ່ຍິງກະຊວງການຕ່າງປະເທດ ສປປ ລາວ, ໄດ້ຕ້ອນຮັບຄະນະແມ່ຍິງກະຊວງການຕ່າງປະເທດ ສສ.ຫວຽດນາມ ນຳໂດຍທ່ານນາງ ຫງວຽນ ທິ ຫງວຽດ ຫງ່າ ພັນລະຍາຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ທີ່ມາຢ້ຽມຢາມ ແລະ ພົບປະແລກບົດຮຽນກັບ ແມ່ຍິງກະຊວງການຕ່າງປະເທດລາວ ທີ່ນະຄອນຫວງພະບາງ ແລະ ໃນການພົບປະ ສອງຝ່າຍໄດ້ແຈ້ງສະພາບໂດຍຫຍໍ້ກ່ຽວກັບການເຄື່ອນໄຫວຂອງສະຫະພັນແມ່ຍິງຂອງຕົນໃຫ້ກັນຊາບ, ພ້ອມທັງແລກປ່ຽນບົດຮຽນກ່ຽວກັບ ກິດຈະກຳຕ່າງໆ, ໂດຍສະເພາະວຽກງານສົ່ງເສີມຄວາມກ້າວໜ້າຂອງແມ່ຍິງເພື່ອຍົກສູງບົດບາດຂອງແມ່ຍິງເພື່ອຄວາມສະເໝີພາບລະຫວ່າງຍິງ-ຊາຍ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ ແລະ ເດັກ. ນອກນັ້ນ, ສອງຝ່າຍຍັງໄດ້ຊົມເຊີຍຕໍ່ຜົນສຳເລັດການຮ່ວມມືຂອງແມ່ຍິງສອງກະຊວງໃນຜ່ານມາ, ຊຶ່ງມີບາດກ້າວຂະຫຍາຍຕົວເປັນທີ່ໜ້າເພິ່ງພໍໃຈ.
ການຢ້ຽມຢາມພົບປະຄັ້ງນີ້, ສະແດງເຖິງການຜັນຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດເວົ້າລວມ, ເວົ້າສະເພາະແມ່ນການຮ່ວມມືຂອງແມ່ຍິງສອງກະຊວງການຕ່າງປະເທດລາວ-ຫວຽດນາມ ໃຫ້ເຂົ້າສູ່ລວງເລິກເທື່ອລະກ້າວ. ໃນໂອກາດນີ້, ສອງຝ່າຍຍັງໄດ້ໄປຢ້ຽມຢາມສະຖານທີ່ຕ່າງໆ ເຊັ່ນ: ພະລາດຊະວັງ, ວັດຊຽງທອງ, ນ້ຳຕົກຕາດກວ້າງຊີ ແລະ ສູນຫັດຖະກຳແຜ່ນແພ ບ້ານຜານົມ, ຊຶ່ງເປັນເມືອງມໍລະດົກໂລກ, ສະຖານທີ່ທ່ອງທ່ຽວປະຫວັດສາດ, ວັດທະນະທຳ ແລະ ທຳມະຊາດ ທີ່ມີຊື່ສຽງຂອງ ສປປ ລາວ ກໍຄືຂອງໂລກ.
