ນາຍົກລັດຖະມົນຕີ ທອງລຸນ ສີສຸລິດ ຈະເຂົ້າຮ່ວມກອງປະຊຸມສຸດຍອດ ACMECS ຄັ້ງທີ 8 ແລະ CLMV ຄັ້ງທີ 9 ທີ່ບາງກອກ

ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍພັນລະຍາ ຈະນໍາພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດຍຸດທະສາດການຮ່ວມມືດ້ານເສດຖະກິດແມ່ນໍ້າອີຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ ຫລື ແອັກແມັກ (ACMECS) ຄັ້ງທີ 8 ແລະ ກອງປະຊຸມສຸດຍອດ ຂອບການຮ່ວມມືກໍາປູເຈຍ-ລາວ-ມຽນມາ-ຫວຽດນາມ ຫລື ຊີແອວແອັມວີ (CLMV) ຄັ້ງທີ 9 ໃນວັນທີ 15-16 ມິຖຸນານີ້ທີ່ບາງກອກປະເທດໄທ, ຕາມການເຊື້ອເຊີນຂອງທ່ານນາຍົກລັດຖະມົນຕີແຫ່ງຣາຊະ​ອານາ​ຈັກ​ໄທ ປຣະຍຸດ ຈັນ​ໂອ​ຊາ ​ປະທານ​ກອງ​ປະຊຸມສຸດຍອດ ACMECS ຄັ້ງທີ 8 ​ແລະ ສົມ​ເດັດ ​ເຕ​ໂຊ ຮຸນ​ເຊັນ ນາຍົກລັດຖະມົນຕີແຫ່ງຣາຊະ​ອານາ​ຈັກກໍາປູ​ເຈຍ ປະທານ​ກອງ​ປະຊຸມສຸດຍອດ CLMV ຄັ້ງທີ 9.

ກອງປະຊຸມສຸດຍອດ ACMECS ຄັ້ງທີ 8 ຈະ​ດໍາ​ເນີນ​ໄປພາຍ​ໃຕ້​ຫົວ​ຂໍ້: “ກ້າວ​ໄປ​ສູ່​ກາ​ນ​ເຊື່ອມ​ໂຍງ ແລະ ເຊື່ອມຈອດປະຊາ​ຄົມ​ແມ່​ນໍ້າຂອງ (Towards an Integrated and Connected Mekong Community)” ​ເພື່ອ​ໃຫ້​ບັນດາ​ຜູ້​ນໍາ​ໄດ້​ແລກປ່ຽນທັດສະນະກ່ຽວກັບການທົບ​ທວນ ແລະ ຕີ​ລາຄາ​ຄືນການ​ຮ່ວມມື​ໃນ​ໄລຍະ​ຜ່ານ​ມາ ​ແລະ ທິດ​ທາງ​ໃນ​ຕໍ່ໜ້າ, ແນໃສ່ສ້າງຄວາມເຂັ້ມແຂງໃນຂະ​ບວນການ​ຮ່ວມ​ມື ​ແລະ ​ເຊື່ອມ​​ໂຍງ​ເສດຖະກິດ​ພາກ​ພື້ນ ​ແລະ ສາກົນ ແລະ ​ສອດ​ຄ່ອງ​ກັບໃນໄລຍະຂ້າມຜ່ານຂອງ​ຍຸກໄໝແຫ່ງ​ໂລກາ​ພິວັດ. ກອງ​ປະຊຸມຈະຮັບຮອງເອົາຖະແຫລງການບາງກອກ ແລະ ​ແຜນ​ແມ່​ບົດ​ແອັກ​ແມັກ​  2019-2023 ເພື່ອເປັນທິດທາງການຮ່ວມມືໃນຕໍ່ໜ້າ.

ກອງປະຊຸມສຸດຍອດ (CLMV) ຄັ້ງທີ 9 ​ຈະມີ​ຫົວ​ຂໍ້ວ່າ: “ເພື່ອການເຊື່ອມໂຍງເສດຖະກິດ ແລະ ເຊື່ອມຈອດໃຫ້ຫລາຍຂຶ້ນກວ່າເກົ່າ (For Greater Economic Integration and Connectivity)” ເພື່ອໃຫ້ຜູ້ນໍາ 4 ປະເທດ ໄດ້ຕີລາຄາຄືນຜົນການຈັດຕັ້ງຜັນຂະຫຍາຍຜົນກອງປະຊຸມສຸດຍອດ CLMV  ຄັ້ງທີ 8 ໃນປີ 2016 ຜ່ານມາ ແລະ ທິດທາງການຮ່ວມມືໃນ 2 ປີຕໍ່ໜ້າ, ເພື່ອແນໃສ່ຮັດແຄບຊ່ອງຫວ່າງຄວາມແຕກໂຕນດ້ານການພັດທະນາລະຫວ່າງ ປະເທດກໍາປູເຈຍ-ລາວ-ມຽນມາ-ຫວຽດນາມ ແລະ ສະມາຊິກອາຊຽນເກົ່າໃຫ້ຍັບເຂົ້າໃກ້ກັນເທື່ອລະກ້າວ ແລະ ປະກອບສ່ວນເຂົ້າໃນການສ້າງປະຊາຄົມອາຊຽນ. ກອງປະຊຸມຈະຮັບຮອງເອົາຖະແຫລງການຮ່ວມເພື່ອເປັນທິດທາງໃນການຮ່ວມມືໃນຕໍ່ໜ້າ.

ໃນໂອກາດດັ່ງກ່າວ, ​ກອງ​ປະຊຸມ ACMECS CEO Forum ຈະຖືກຈັດຂຶ້ນເປັນຄັ້ງທໍາອິດເພື່ອໂຄສະນາເຜີຍແຜ່ບັນດາທ່າແຮງບົ່ມຊ້ອນ ແລະ ກາລະໂອກາດໃນບັນດາປະເທດແອັກແມັກໃຫ້ແກ່ພາກເອກະຊົນ, ຄູ່ຮ່ວມພັດທະນາ, ສະຖາບັນການເງິນ ແລະ ອົງການຈັດຕັ້ງພາກພື້ນ ແລະ ສາກົນ ລວມທັງບັນດາປະເທດທີ່ມີຄວາມສົນໃຈຕໍ່ຂອບການຮ່ວມມືແອັກແມັກ, ແນໃສ່ສົ່ງເສີມການຄ້າ, ການລົງທຶນ ແລະ ການທ່ອງທ່ຽວໃນພາກພື້ນນີ້ໃຫ້ນັບມື້ຫຼາຍຂຶ້ນ. ຄຽງຄູ່ກັນນີ້, ຈະມີການຈັດງານວາງສະແດງຮູບພາບ ແລະ ວີດີໂອ ທີ່ສະທ້ອນໃຫ້ເຫັນເຖິງຜົນສໍາເລັດ ແລະ ຄວາມຄາດຫວັງຂອງການຮ່ວມມືໃນອະນາຄົດຂອງຂອບການຮ່ວມມືດັ່ງກ່າວ.

ໃນໂອກາດເຂົ້າຮ່ວມກອງປະຊຸມສຸດຍອດຄັ້ງນີ້, ທ່ານນາຍົກລັດຖະມົນຕີແຫ່ງ ສປປ ລາວ ຈະພົບປະສອງຝ່າຍກັບທ່ານນາຍົກລັດຖະມົນຕີຫວຽດນາມ  ແລະ ທ່ານນາຍົກລັດຖະມົນຕີໄທອີກດ້ວຍ.